San de a moro prenspari sani gi yu?
1 Furu kerki organisâsi e poti krakti tapu a du di den musu du bun wroko, soleki a bow fu skoro noso ati-oso, noso den e gi moni fu horibaka gi den sortu sani disi. Ma aladi Yehovah Kotoigi no e frigiti fu „du bun èn fu prati sani nanga trawan”, toku a moro prenspari sani gi den na fu yepi sma na yeye fasi.—Hebr. 13:16.
2 Na eksempre fu a fosi yarihondro: Yesus du furu bun wroko di a ben e du en diniwroko na grontapu, ma a moro prenspari wroko gi en ben de fu gi kotoigi fu a waarheid (Luk. 4:43; Yoh. 18:37; Tori. 10:38). A ben gi en bakaman a komando fu „go fu dati ede, èn meki disipel fu sma fu ala nâsi, . . . èn leri den” (Mat. 28:19, 20). A ben sori tu taki den wan di ben o sori bribi na ini en ben sa du a srefi wroko, ma den ben o du en na moro furu presi (Yoh. 14:12). A moro prenspari sani gi Yesus ben de a preikiwroko, bika a preikiwroko e yepi sma fu sabi fa den kan kisi frulusu.—Yoh. 17:3.
3 Na apostel Paulus ben si a preikiwroko leki wan „fruplekti”, wan sani di a ben musu fu du (1 Kor. 9:16, 17). A ben de klariklari fu gi ala sani, fu horidoro ondro iniwan tesi, èn fu nyan pina, soso fu du en diniwroko (Tori. 20:22-24). Na apostel Petrus nanga den mati fu en ben abi a srefi fasi fu denki. Awinsi den ben e sroto den na ini dungru-oso noso awinsi den ben e kisi fonfon, toku „den tan go doro sondro fu tapu fu gi leri èn fu meki a bun nyunsu fu a Krestes Yesus, bekènti”.—Tori. 5:40-42.
4 Fa a de nanga wi? Wi e si a preiki fu a bun nyunsu fu a Kownukondre èn a meki fu disipel, leki a moro prenspari sani di wi musu du? Wi e broko wi ede trutru neleki Yesus, nanga den wan di e „kisi kwinsi” èn den wan di e „waka bruyabruya leki skapu sondro skapuman”? (Mat. 9:36). Den sani di e pasa na grontapu nownow èn Bijbel profeititori e sori taki heri esi wan kaba sa kon na a ogri seti fu sani disi! Te wi e frustan o prenspari a preikiwroko de, dan disi sa pusu wi fu tan preiki fayafaya.
5 Luku a situwâsi fu yu: Fu di sani e kenki ibri tron baka na ini a libi fu wi, meki ten na ten a bun fu luku efu wi kan kenki sani na ini wi libi so taki wi kan du moro na ini a preikiwroko. Wan sisa ben de wan gewoon pionier na ini den yari baka 1950 te go miti den yari syatu bifo 1980, ma a no ben man du disi moro fu di a ben kon siki. Ma baka wan pisi ten a gosontu fu en ben kon moro bun. Fu dati ede a go luku baka fa a situwâsi fu en ben de èn a teki a bosroiti fu go na ini a pionierwroko baka. A ben breiti srefisrefi fu go na a Pionierskoro aladi a ben abi 90 yari kaba! Fa a de nanga yu? A de so taki heri esi yu o go nanga pensyun noso yu o kaba nanga skoro? Sani kenki na so wan fasi taki yu man pionier?
6 Di Yesus si taki Marta „no ben man poti prakseri bun na sani fu di a ben du furu wroko”, dan na wan switi fasi a gi en a rai taki a ben o kisi moro bigi blesi efu a no ben o broko en ede nanga sani di no de so prenspari (Luk. 10:40-42). Yu kan kenki yu libi so taki yu no abi so furu broko-ede? A de fanowdu trutru taki masra nanga wefi abi wan grontapuwroko? Efu unu e tyari kenki kon, dan a de so taki wán sma nomo man wroko fu sorgu gi na osofamiri? Furu sma ben kisi furu wini na yeye fasi di den kenki den libi so taki den ben man du moro na ini a diniwroko.
7 Meki wi alamala waka baka na eksempre di Yesus nanga den apostel gi wi! Wi kan abi a dyaranti taki Yehovah sa blesi den muiti di wi e meki fu du moro na ini a tumusi prenspari wroko fu preiki a bun nyunsu fu a Kownukondre.—Luk. 9:57-62.