Yepi yu pikin fu go na fesi na ini a preikiwroko
1 Kresten papa nanga mama abi a seryusu frantwortu fu leri den pikin fu den, fa fu teki prati na a preikiwroko te den de yongu ete. Den kan du disi na difrenti fasi. Son pikin sabi wan bijbeltekst na ede, srefi bifo den man leisi. Disi kan abi furu krakti tapu den sma di e arki. Te yongu pikin e kon moro owru, dan den kan du moro na ini a preikiwroko srefi. Fa unu leki papa nanga mama kan yepi un pikin fu gi kotoigi tu? Kande den eksempre di e kon now kan yepi yu moro fara.
2 Baka te yu taki a sma odi, yu kan taki:
◼ „A boi fu mi, [kari en nen], abi wan moi bijbeltekst di a ben sa wani fruteri yu.” A pikin fu yu kan taki: „A tekst disi na ini Psalm leri mi a nen fu Gado. [A pikin e leisi Psalm 83:18, noso a e taki san skrifi drape.] Den tijdschrift disi e sori san Yehovah Gado sa du gi wi. Mi kan libi den gi yu?” Yu kan tapu a takimakandra fu di yu e fruteri fa sma kan horibaka gi a wroko di e du na heri grontapu.
3 Noso yu kan pruberi fu bigin so:
◼ „Fa a e go? We, mi e leri a meisje fu mi, [kari en nen], fu sori trawan na ini a libimakandra taki a e broko en ede nanga den. A ben sa wani fruteri yu wan syatu boskopu di komoto fu Bijbel.” A meisje fu yu kan taki: „Wan fasi fa mi wani yepi sma na fu fruteri den fu a howpu gi a ten di e kon, soleki fa Bijbel e taki. [A pikin e leisi Openbaring 21:4, noso a e taki san skrifi drape.] Den tijdschrift disi e sori san a Kownukondre fu Gado sa du gi wi. Mi denki taki yu sa lobi fu leisi den.”
4 Te yu e meki den pikin taki wan makriki sani ibri leisi baka, dan dati o meki taki den sa de seiker taki den man prati a Kownukondre boskopu. Oefen nanga den pikin so taki den kan sabi fa fu taki na so wan fasi taki sma e frustan den bun èn fa den kan taki tranga nofo so taki sma e yere den. Disi sa yepi den fu sabi fa den musu taki na ini difrenti sortu situwâsi. Te unu e sreka unsrefi bun na fesi èn te yu e prèise den, dan dati sa yepi den yonguwan fu fruteri trawan fu a bribi fu den.
5 Furu yonguwan di kisi a deki-ati disi, ben doro den markitiki fu tron wan preikiman di no dopu ete. A e gi wi furu prisiri fu si taki den pikin fu wi e go na fesi na ini a Kresten diniwroko!—Ps. 148:12, 13.