„Mi no wani sabi noti”
1 Disi na san furu sma e taki na ini son kontren, te wi wani fruteri den a boskopu fu wi. San sa yepi wi fu no lasi-ati te sma abi wan mi-no-ke-fasi na ini a kontren fu wi? Fa wi kan gi sma deki-ati fu wani arki a bun nyunsu?
2 Tan abi prisiri: Te wi e prakseri fu san ede furu sma abi wan mi-no-ke fasi, dan wi sa tan abi prisiri. A kan taki sma ben leri na evolutie-leri (A leri di e taki dati sma komoto fu yapi-yapi), noso den ben kweki na ini wan libimakandra pe sma no e bribi na ini Gado, èn fu dati ede den no sabi o prenspari a Bijbel boskopu de. A kan taki trawan lasi-ati di den si a hoigri-fasi na ini den kerki. A kan taki son sma abi wan mi-no-ke fasi fu di den bruya èn fu di den no abi howpu (Ef. 2:12). Sonwan fu den ’no e poti prakseri’ na a boskopu fu wi, fu di den e broko den ede nanga den sorgu fu a libi.—Mat. 24:37-39.
3 Awansi son sma no wani arki, wi kan abi prisiri na ini a preikiwroko, fu di wi sabi taki a muiti di wi e du e gi Yehovah glori (1 Petr. 4:11). Boiti dati, te wi e taki fu Bijbel, dan wi e tranga wi eigi bribi, awinsi wi e taki nanga sma di feni taki a boskopu no prenspari. Meki wi du muiti fu si den sma na ini a kontren fu wi, neleki fa Yehovah e si den. A ben firi sari nanga den sma fu Ninefei di no ben „sabi a difrenti na mindri a reti-anu nanga a kruktu-anu fu den” (Yona 4:11). Den sma di e libi na ini wi kontren abi a bun nyunsu fanowdu trutru! Fu dati ede, wi no musu lasi-ati, ma wi musu du ala muiti fu yepi den fu kon sabi moro fu a Bijbel boskopu.
4 Taki fu problema di de na ini yu kontren: Kande yu kan taki fu problema di de na ini yu kontren, èn aksi na ososma fa a e denki fu den tori dati. Arki te a e taki, èn sori en sortu deki-ati Bijbel e gi ini a tori disi. Baka di wan ogri sani pasa na ini wan birti, dan wan Kotoigi ben taigi ibri ososma taki a ben firi sari fu a tori. A Kotoigi taki: „Wantronso sma bigin taki fu a tori, èn mi ben abi furu takimakandra nanga sma a dei dati, fu di mi ben sori sma taki mi ben broko mi ede nanga den.
5 A Kownukondre fu Gado sa puru ala den problema fu a libisma famiri. Pruberi fu si san na a moro bigi problema di na ososma abi. Kande a o arki a boskopu fu Bijbel di e gi howpu. Ma awansi yu no e kisi na okasi dati, dan kande a sma sa wani arki yu „wan tra leisi”—Tori 17:32.