San trawan e leri te den e luku yu?
1. San den disipel fu Yesus ben leri te den ben e luku den sani di a ben e du?
1 Yesus ben taki: „Teki mi tyatyari na un tapu èn leri fu mi” (Mat. 11:29). A de krin fu si taki a no ben taigi trawan wawan san den musu du, ma a ben gi den wan bun eksempre tu. Prakseri san den disipel ben leri te den ben e luku san Yesus ben e du. Den ben e si taki a ben abi switifasi, èn taki a ben lobi sma (Mat. 8:1-3; Mark. 6:30-34). A ben abi trutru sakafasi (Yoh.13:2-5). Te den disipel ben e go makandra nanga Yesus na ini a diniwroko, dan den ben e si taki a ben e preiki fayafaya èn taki a ben sabi heri bun fa fu gi leri fu den tru tori fu Gado Wortu (Luk. 8:1; 21:37, 38). Sortu krakti a abi tapu trawan te den e luku fa wi e du wi diniwroko?
2. Fa a moi fasi fa wi e weri krosi èn e tyari wisrefi na ini a diniwroko, abi bun krakti tapu den ososma?
2 Den ososma: Te den ososma e si taki wi weri krosi na wan fasi di fiti, taki wi abi bun maniri, èn taki wi e broko wi ede trutru nanga den, dan dati kan abi furu krakti tapu den (2 Kor. 6:3; Fil. 1:27). Den ososma e si taki wi abi a gwenti fu gebroiki Bijbel. A abi krakti tapu trawan te den e si taki wi e arki den na wan lespeki fasi. Noiti no frigiti taki te wi de wan bun eksempre na ini den sani disi, dan dati kan meki taki sma o wani arki a Kownukondre boskopu.
3. Sortu bun krakti wi kan abi tapu wi brada nanga sisa?
3 Wi brada nanga sisa: Prakseri tu sortu bun krakti wi kan abi tapu wi Kresten brada nanga sisa. Te wi e du wi diniwroko fayafaya, dan dati kan meki taki trawan kon kisi a srefi faya di wi abi. Neleki fa isri e srapu isri, na so a de tu taki te wi e sreka wisrefi bun fu taki nanga sma na ini a diniwroko, dan wi kan gi trawan deki-ati fu tron moro bun preikiman (Odo 27:17). Te wi e skrifi den nen fu den sma di wani sabi moro èn te wi e go baka na den wantewante, dan dati kan gi trawan deki-ati fu du a srefi. Wi o abi bun krakti tapu wi brada nanga sisa te wi e du wi diniwroko dorodoro.—2 Tim. 4:5.
4. Fu san ede a bun taki ten na ten wi e prakseri fu na eksempre di wi e gi trawan?
4 A ben o bun taki ten na ten yu e prakseri fu den sani di yu e taki èn e du, èn luku fa na eksempre fu yu abi krakti tapu trawan. Te wi de wan bun eksempre, dan dati e plisi Yehovah, èn wi o man ondrofeni a srefi sani leki na apostel Paulus di ben taki: „Waka baka na eksempre fu mi, neleki fa mi e waka baka na eksempre fu Krestes.”—1 Kor. 11:1.