Taki sani ete wan tron fu poti krakti na en tapu

TE WAN sma e gi bun leri, dan dati wani taki tu dati a e taki sani ete wan tron. Te wan takiman e kari wan sani moro leki wán tron, dan den arkiman no sa frigiti a sani dati so esi. Efu a takiman e taki a tori pikinso tra fasi ete wan leisi, dan kande den arkiman sa frustan a tori dati moro bun tu.

Efu den arkiman no man memre san yu taki, dan den wortu fu yu no sa abi krakti tapu san den e bribi noso tapu a libi fu den. Soleki fa a sori, dan den arkiman sa memre den sani di yu ben poti spesrutu krakti na tapu.

Yehovah, wi Gran Leriman, e gi wi na eksempre fu di ensrefi e taki sani moro leki wán leisi. A ben gi a pipel fu Israel den Tin Komando. Nanga yepi fu wan engel, a ben meki a pipel yere den komando dati na tapu a bergi Sinai. Baka dati a ben skrifi den komando disi èn a ben gi Moses den (Ex. 20:1-17; 31:18; Deut. 5:22). Yehovah ben taigi Moses fu a kari den komando dati ete wan tron gi a pipel bifo den ben go na ini a Pramisi Kondre, èn baka dati, nanga yepi fu santa yeye, Moses ben skrifi a tori dati soleki fa a de fu feni na Deuteronomium 5:6-21. Wan fu den komando di Gado ben gi Israel, ben de taki den ben musu lobi èn dini Yehovah nanga den heri ati, nanga den heri sili, èn nanga ala den libi krakti. Ibri tron baka den ben kisi fu yere a sani disi tu (Deut. 6:5; 10:12; 11:13; 30:6). Fu san ede? Bika soleki fa Yesus ben taki, a sani disi ben de „a fosi èn a moro bigi komando” (Mat. 22:34-38). Nanga yepi fu a profeiti Yeremia, Yehovah ben memre den sma fu Yuda moro leki 20 tron o seryusu a ben de fu den gi yesi na En na ini ala sani di a ben gi den leki komando (Yer. 7:23; 11:4; 12:17; 19:15). Èn nanga yepi fu Esekièl, Gado ben taki moro leki 60 tron taki ala den kondre „sa musu sabi taki mi na Yehovah”.​—Esek. 6:10; 38:23.

Na ini a tori di e taki fu a diniwroko fu Yesus, wi e si fa sani ben taki moro leki wán tron fu poti krakti na den tapu. Fu eksempre, yu abi den fo Evangelietori. Ibriwan fu den e skrifi fu prenspari sani di ben pasa. Den tori disi de fu feni na ini wán noso moro fu den tra Evangelietori. Ma a wan Evangelietori e skrifi en pikinso tra fasi leki a trawan. Di Yesus srefi ben gi leri, dan moro leki wán tron a ben leri sma a srefi sani, ma ibri tron a ben taki en pikinso tra fasi (Mark. 9:34-37; 10:35-45; Yoh. 13:2-17). Èn di Yesus ben de na tapu na Olèifbergi wan tu dei fosi a dede, dan a ben gi wan kefalek prenspari rai. Fu sori o prenspari a rai disi ben de, meki a ben gi a rai disi ete wan tron di a taki: „Tan na ai bika unu no sabi sortu dei un Masra o kon.”​—Mat. 24:42; 25:13.

Na ini a preikiwroko. Te yu e preiki gi tra sma, dan yu e howpu taki den sa memre san yu taki. Efu yu e taki sani ete wan tron èn efu yu e du dati bun, dan dati kan yepi yu fu meki yu arkiman no frigiti san yu taki.

Furu tron te wan takiman e taki wan sani ete wan tron, dan dati sa yepi den sma di e arki en fu memre a sani dati. Sobun, baka te yu leisi wan bijbeltekst, dan yu kan poti krakti tapu a tekst fu di yu e sori tapu a moro prenspari pisi fu a tekst èn fu di yu e aksi a sma: „Yu si fa a tekst e taki fu a sani dati?”

Te yu e taki nanga wan sma, dan yu kan gebroiki den lasti wortu di yu e taki fu poti krakti tapu wan sani tu. Fu eksempre, yu kan taki: „A moro prenspari sani di mi howpu yu sa memre fu a tori di wi ben taki na . . .” Baka dati, dan taki ete wan tron san yu wani dati a sma musu memre. A sani di yu kan taki ete wan tron, kan de wan sani leki disi: „San Gado abi na prakseri, na fu kenki grontapu tron wan paradijs. Dati seiker sa kon tru.” Noso yu kan taki: „Bijbel e sori krinkrin taki wi e libi na ini den lasti dei fu a grontapu disi. Efu wi wani pasa a kaba fu a grontapu disi libilibi, dan wi musu leri san Gado e aksi fu wi.” Noso wan tra sani di yu kan taki na disi: „Soleki fa wi si, dan Bijbel e gi bun rai di wi kan gebroiki na ini wi libi fu lusu den problema na ini na osofamiri.” Son leisi, yu kan kari wan bijbeltekst di yu wani a sma musu memre. A no de fu taki, dati efu yu wani du dati bun, dan yu musu prakseri na fesi fa yu o du dati.

Te yu e go baka na sma, sosrefi te yu e hori bijbelstudie, dan yu kan taki fu sani ete wan tron tu. Disi yu kan du kande te yu e luku den aksi di poti na a kaba fu a studie.

Te wan sma e feni en muilek fu frustan wan rai fu Bijbel noso te a no man fiti a rai fu Bijbel na ini en libi, dan kande yu sa musu taki fu a tori disi na difrenti okasi. Meki muiti fu ibri tron te yu e taki fu a tori disi, fu taki en pikinso tra fasi. Den takimakandra no abi fu de langa bere, ma den musu gi a studenti deki-ati fu tan prakseri fu a tori. Memre taki Yesus ben taki sani ete wan tron, fu yepi den disipel fu en so taki den ben kan lusu a problema di den ben abi fu de nomru wán.​—Mat. 18:1-6; 20:20-28; Luk. 22:24-27.

Te yu e hori wan lezing. Efu yu de na tapu a podium fu hori wan lezing, dan a no tori yu wani fruteri nomo. Ma yu wani taki den arkiman musu frustan san yu taki, den musu memre dati, èn den musu gebroiki dati na ini den libi. Fu man doro dati, dan yu musu pruberi fu taki prenspari sani ete wan tron, èn yu musu du dati heri bun.

Ma toku, efu yu e taki tumusi furu leisi fu den prenspari sani, dan dati kan meki taki den arkiman no sa arki yu moro. Prakseri bun tapu sortu sani yu sa poti spesrutu krakti. Furu tron disi na den moro prenspari penti fu yu lezing, ma den kan de tra sani tu di kan warti furu gi den arkiman fu yu.

Efu yu wani taki sani ete wan tron fu poti krakti tapu den, dan na ini a bigin kaba fu yu lezing yu kan kari den moro prenspari penti fu san yu sa taki. Du dati fu di yu e taki syatu fu den prenspari penti disi di sa yepi den arkiman frustan fu sortu tori yu sa taki. Yu kan sori tapu den moro prenspari penti tu fu di yu e poti wan tu aksi, noso fu di yu e fruteri syatu fu wan tu eksempre fu problema di musu lusu. Yu kan fruteri den arkiman omeni prenspari penti yu abi èn yu kan gi ibriwan fu den penti wan nomru. Baka dati, taki fu ibriwan fu den prenspari penti disi wan-fru-wan na ini a lezing srefi di yu e hori. Yu kan poti krakti baka tapu ibriwan fu den moro prenspari penti disi, fu di na ini yu lezing srefi yu e kari ibriwan fu den moro prenspari penti, bifo yu e kanti go abra tapu a tra prenspari penti. Noso yu kan du disi fu di yu e fruteri wan eksempre di e sori fa sma kan gebroiki a prenspari penti disi. Yu kan poti krakti tapu den moro prenspari penti fu yu lezing tu na ini a bosroiti fu yu. Disi yu kan du, fu di yu e kari den prenspari penti disi baka na ini a bosroiti, noso fu di yu e sori fa a ben o de efu sani ben de tra fasi. Wan tra sani di yu kan du na ini a bosroiti tu, na fu gi piki tapu den aksi di yu ben poti, noso fu sori syatu fa fu lusu den problema di yu ben kari na ini a bigin.

Boiti den sani di wi kari tapusei, dan wan bun takiman e luku ala den arkiman fu en bun tu. Efu wan tu fu den no e frustan so bun san a e fruteri den, dan a takiman sa si dati. Efu a sani di a e taki na wan prenspari sani, dan a sa taki baka fu en. Ma efu a e taki den srefi wortu ibri tron baka, dan toku a kan taki den arkiman no sa frustan a tori ete. Efu wan takiman wani gi leri, dan a sa musu du moro leki fu taki den srefi wortu baka. A musu man taki sani di den arkiman kan frustan. Kande a sa musu taki fu wan tu sani di a no ben abi na prakseri fu taki. Efu na so wan fasi yu leri fu gi den arkiman san den abi fanowdu, dan yu sa tron wan bun leriman.