Leri yu pikin fu de preikiman
1. San Psalm 148:12, 13 e taigi Kresten papa nanga mama fu du?
1 Yehovah e gi yonguwan a kari fu prèise en (Ps. 148:12, 13). Fu dati ede, Kresten papa nanga mama e du moro leki fu leri den pikin den tru tori fu Bijbel èn den wet fu Gado di e sori fa wi musu tyari wisrefi. Den e leri den pikin tu fu de preikiman fu a bun nyunsu. Fa den kan du dati?
2. Fa a bun eksempre fu wan papa noso wan mama kan abi krakti tapu den pikin?
2 De wan bun eksempre: Krutuman Gideon ben taigi den 300 man fu en: „Un musu luku san mi e du èn na dati un musu du tu” (Krut. 7:17). Nofo tron pikin e luku san den papa nanga mama e du èn den du dati tu. Wan papa di e wroko na neti, no e go sribi te a kon na oso satra mamanten. Na presi fu dati, a e go nanga den pikin fu en na ini a preikiwroko, aladi a weri srefisrefi. Sondro fu taki wan sani, a e leri den taki a preikiwroko prenspari (Mat. 6:33). Den pikin fu yu e si taki yu e prisiri fu teki prati na den difrenti sani di wi e du na ini na anbegi fu wi? Den e si taki yu lobi fu du sani soleki fu begi, fu leisi Bijbel, fu gi piki, èn fu go na ini a preikiwroko? A no de fu taki dati yu o meki fowtu son leisi. Ma a de so moro furu taki den pikin fu yu o wroko makandra nanga yu te yu e du muiti fu leri den fu anbegi Yehovah, fu di den e si taki yu e dini en fayafaya.—Deut. 6:6, 7; Rom. 2:21, 22.
3. Sortu marki papa nanga mama kan yepi den pikin fu doro?
3 Tan poti marki: Papa nanga mama e du furu muiti fu leri den pikin fu waka, fu taki, fu weri krosi densrefi, èn go so moro fara. Te den pikin doro wan fu den marki disi, dan den e poti tra marki gi den baka. Te a papa nanga mama na Kresten, den e yepi den pikin tu fu poti marki na ini na anbegi, èn fu doro den marki dati, solanga dati e kruderi nanga a yari fu den èn nanga san den man du (1 Kor. 9:26). Yu e leri yu pikin fu gi piki nanga den eigi wortu èn fu sreka densrefi gi den eigi lezing na a Theokrasia Diniwroko-skoro? (Ps. 35:18) Yu e leri den fu teki prati na den difrenti fasi fa wi e preiki? Yu e yepi den fu poti leki marki fu teki dopu èn fu go na ini a furuten diniwroko? Yu e yepi den fu abi demakandra nanga fayafaya preikiman di de nanga prisiri, èn di kan gi den pikin deki-ati?—Odo 13:20.
4. Sortu wini pikin o kisi te den abi papa nanga mama di e bigin leri den yonguyongu kaba fu de wan preikiman?
4 A psalm skrifiman ben taki: „Mi Gado, yu gi mi leri sensi di mi yongu èn te now ete mi e fruteri sma fu den bigi sani di yu du” (Ps. 71:17). Bigin leri yu pikin yonguyongu kaba fu tron preikiman. Te yu e yepi den na so wan fasi na ini na anbegi fu wi, dan dati sa tyari wini kon gi den te den kon bigi.—Odo 22:6.