Taki sani soifri leki fa den de

FA A du kan taki wan Kresten kan taki sani di no tru? Kande a e taki sani di wan tra sma fruteri, sondro fu go ondrosuku fa a tori de trutru. Noso a kan taki a e taki wan tu sani di no tru sondro fu a sabi dati srefi, fu di a no leisi bun san ben skrifi trutru na ini a buku pe a suku a tori. Te wi e poti trutru prakseri fu taki sani soifri leki fa den de, srefi efu dati na pikinpikin sani, dan den arkiman sa si taki den kan frutrow srefi den tra moro prenspari sani fu a boskopu fu wi.

Na ini a preikiwroko. Fu di furu sma sabi taki den musu leri furu ete, dati meki den e frede fu bigin nanga a preikiwroko. Toku, heri esi den sma disi e si taki den kan preiki bun tu, awansi den sabi soso wan tu prenspari sani nomo fu waarheid. Fa dati kan? Dati kan, fu di den e sreka densrefi.

Bifo yu e go na ini a preikiwroko, dan kon frustan san na a tori di yu wani taki nanga den sma. Prakseri sortu aksi den sma sa poti gi yu kande. Luku san Bijbel e taki so taki yu kan piki den aksi disi heri bun. Efu yu e du disi, dan yu no sa senwe-senwe, ma yu sa de srekasreka fu gi soifri piki. Yu o go hori wan bijbelstudie? Luku baka sortu sani yu o studeri nanga a sma, èn luku a sani disi finifini. Sorgu taki yu e frustan fa Bijbel e horibaka gi a piki tapu den aksi na ini a buku.

Ma te wan ososma noso wan mati na wrokope e aksi yu wan sani di yu no man piki wantronso, dan san yu kan du? Efu yu no sabi seiker san fu piki, dan no go rai san yu musu taki. „Na ati fu a regtfardikiwan e prakseri dipi fu sani, so taki a kan gi piki” (Odo 15:28). Kande yu kan feni san yu abi fanowdu na ini a buku Redeneren aan de hand van de Schrift, efu a buku disi de fu kisi na ini a tongo fu yu. Efu yu no abi a buku disi na yu, dan taigi a sma taki yu wani go ondrosuku a tori moro fara èn taki yu wani kon baka na en. Efu a sma di poti na aksi gi yu, de opregti, dan a no sa abi trobi fu wakti pikinso tapu a yoisti piki. Fu taki en leti, disi kan meki taki a sa denki bun fu wi, fu di yu sori so wan sakafasi.

Te yu e wroko na ini a preikiwroko nanga preikiman di e preiki langa ten kaba, dan dati kan yepi yu fu man gebroiki Gado Wortu na wan yoisti fasi. Luku sortu bijbeltekst den e gebroiki, èn fa den e taki nanga sma fu den tekst dati. Nanga sakafasi yu musu teki ibri rai di den e gi yu, noso ibri sani di den e sori yu di yu kan du moro bun. A disipel Apolos ben de fayafaya, ma a ben kisi wini fu a yepi di a kisi fu trawan. Lukas ben skrifi fu Apolos taki a ben de wan sma di „ben man taki bun”, „a ben sabi den Buku fu Bijbel bun”, a ben de wan sma di „ben de fayafaya”, èn a ben ’taki èn leri sma na wan yoisti fasi den sani fu Yesus’. Ma toku a no ben frustan ala sani ete. Di Priskila nanga Akwila ben si disi, dan „den ben teki en kon na den èn den tyari a pasi fu Gado moro soifri kon na krin gi en”.​—Tori. 18:24-28.

„Hori tranga na a tru wortu.” Den sani di wi taki na den konmakandra musu sori taki wi wani hori a gemeente hei leki „wan pilari nanga wan fondamenti fu a waarheid” (1 Tim. 3:15). Fu di wi wani hori a waarheid hei, dati meki a de prenspari taki wi frustan den bijbeltekst di wi wani gebroiki na ini den lezing fu wi. Luku den tra vers lontu a bijbeltekst di yu wani gebroiki èn sosrefi san a bijbeltekst wani tyari kon na krin.

Den sani di yu e taki tapu wan gemeente konmakandra, na sani di trawan kan teki abra fu taki baka nanga tra sma. A tru, „wi alamala e misi furu tron” (Yak. 3:2). Ma yu sa kisi winimarki te yu teki a gwenti fu taki sani soifri leki fa den de. Furu brada di e hori lezing tapu a Theokrasia Diniwroko-skoro sa tron owruman te fu kaba. Gado „o aksi moro” fu den sma di kisi so wan frantwortu (Luk. 12:48). Efu wan owruman no e denki, dan a kan gi fowtu rai. Efu disi e meki den sma na ini a gemeente kisi seryusu problema, dan a kan taki Gado sa atibron nanga san na owruman disi du (Mat. 12:36, 37). Sobun wan brada di bun fu dini leki owruman, musu de wan brada di e sori nanga „a fasi fa a e gi leri”, „taki a e hori tranga na a tru wortu”.​—Tit. 1:9.

Sorgu taki te yu e taki nanga tra sma, dan dati musu kruderi nanga „na eksempre fu gosontu wortu” soleki fa dati de fu feni na ini ala den tru tori fu Bijbel (2 Tim. 1:13). Disi no musu meki yu kon frede. Kande yu no kaba leisi a heri Bijbel ete. Tan meki muiti fu leisi a heri Bijbel. Ma aladi yu e du dati, dan toku yu kan luku fa den rai di e kon now, kan yepi yu fu ondrosuku den sani di yu wani gebroiki fu gi leri.

Na a fosi presi, aksi yusrefi: ’Den sani disi e kruderi nanga san mi leri kaba fu Bijbel? Den sani disi sa meki taki den arkiman sa wani sabi moro fu Yehovah? Noso den sa gi sma deki-ati fu go suku a koni fu grontapu?’ Yesus ben taki: „Yu wortu na waarheid” (Yoh. 17:17; Deut. 13:1-5; 1 Kor. 1:19-21). Baka dati, meki bun gebroiki fu den wrokosani di a getrow èn koni srafu grupu gi wi. Disi sa yepi yu frustan den bijbeltekst soifri. Ma boiti dati, disi sa yepi yu sosrefi fu gebroiki den na wan fasi di fiti. Efu den lezing fu yu e kruderi nanga „na eksempre fu gosontu wortu”, èn efu yu e frutrow tapu a srafu di Yehovah e gebroiki te yu e fruklari èn e fiti bijbeltekst, dan den sani di yu sa taki sa de soifri sani.

Luku baka o soifri den sani de di yu wani taki. Sani fu a nyunsu, sani di tra sma taki, sani di yu teki puru fu wan buku, èn sosrefi ondrofenitori, kan yepi yu efu yu wani tyari wan spesrutu tori kon na krin èn efu yu wani sori sma fa fu gebroiki dati. Ma fa yu kan de seiker taki den sani disi de soifri? Wan fasi na fu teki soso sani fu sma di trawan sabi taki den no e lei. No frigiti fu luku efu a sani di yu wani fruteri, a no wan owru tori. Sontron nomru fu sani e kenki, so taki den no tru moro. Te sabidensiman e feni sani, dan esi-esi tra sabidensiman e feni moro fini tori fu dati. Sosrefi te libisma e kon frustan a historia èn den fositen tongo moro bun, dan den musu kenki wan tu sani di den ben taki bifo. Luku heri bun efu yu abi na prakseri fu gebroiki nyunsu fu koranti, telefisi, radio, e-mail, noso fu na Internet. Odo 14:15 e gi leki rai: „Ibriwan sma di no abi ondrofeni, e bribi ibri wortu, ma a koniwan e luku pe a e poti en futu.” Aksi yusrefi: ’Fa trawan e denki fu a presi, noso a sma, pe mi yere a sani disi? Den sabi en leki wan presi, noso wan sma, di e taki sani soifri? Mi kan go luku na wan tra presi noso aksi tra sma fu kon sabi efu san mi yere tru?’ Efu yu no sabi seiker efu wan sani tru noso efu a no tru, dan no gebroiki en.

Boiti taki yu e ondrosuku efu a presi, noso a sma, pe yu feni a nyunsu, abi a gwenti fu taki sani soifri, dan yu musu ondrosuku bun tu fa yu wani gebroiki a tori di yu feni. Kande den tori di yu feni na sani di wan sma taki, sani di yu teki puru fu wan buku, noso kande yu feni wan tu nomru fu wan tori. Sorgu taki den sani disi de soifri leki fa a skrifi na a presi pe yu feni den noso pe yu teki den. Luku bun fu no taki sani di no de so soifri, soso fu di yu wani poti krakti tapu wan sani. Disi kan pasa te yu e taki „furu sma”, na presi fu yu taki „wan tu sma”. Noso yu e taki „ala sma”, na presi fu taki „furu sma”, èn na presi fu taki „wan tu leisi”, yu e taki „ala ten”. No taki sani di no tru soso fu meki wan tori kon moro switi. Fu eksempre efu yu no e taki soifri san na a trutru nomru fu wan sani, noso o bigi wan sani de, noso o seryusu wan sani de, dan sma kan go aksi densrefi efu den kan frutrow den tra sani di yu e taki.

Te ala ten yu e taki sani soifri leki fa den de, dan trawan sa kon sabi yu leki wan sma di e lespeki tru tori. Disi sa meki taki sma sa denki bun fu Yehovah Kotoigi. Ma moro prenspari srefi, efu ala ten yu e taki sani soifri leki fa den de, dan dati sa gi grani na „Yehovah, a Gado fu waarheid”.​—Ps. 31:5.