Fa yu kan kisi wini te yu e leisi Bijbel?
„Na ini mi ati mi e prisiri trutru nanga a wèt fu Gado.”—ROM. 7:22.
1-3. Sortu wini yu kan kisi te yu e leisi Bijbel èn te yu e du san yu leri fu Bijbel?
„IBRI mamanten mi e taki Yehovah tangi taki a e yepi mi fu frustan Bijbel”, na so wan owru sisa taki. A sisa disi leisi Bijbel moro leki 40 leisi kaba èn te now ete a e leisi en. Wan yongu sisa skrifi taki a leisi di a e leisi Bijbel yepi en fu si Yehovah leki wan trutru sma. Dati meki a kon tron wan moro bun mati fu en hemel Papa. A taki: „Noiti ete mi ben de so koloku!”
2 Na apostel Petrus ben gi a deki-ati disi: „Neleki fa nyunyun pikin e angri fu dringi soifri merki, na so un musu angri fu a wortu fu Gado” (1 Petr. 2:2). Wi musu studeri Bijbel fu tapu na angri disi. Den sma di e du dati èn di e du san den leri fu Bijbel, abi wan krin konsensi èn den de koloku. Den e tron bun mati fu tra sma di lobi a tru Gado tu èn di e dini en. Ala den sani disi e meki wi „prisiri trutru nanga a wèt fu Gado” (Rom. 7:22). Ma sortu tra wini wi kan kisi te wi e leisi Bijbel?
3 O moro yu e leri fu Yehovah nanga en Manpikin, o moro yu o lobi den nanga tra sma. Te yu abi soifri sabi fu Bijbel, dan yu o frustan taki a grontapu disi o lasi gowe heri esi èn taki Gado o frulusu den sma di e gi yesi na en. Boiti dati, yu o abi bun nyunsu fu fruteri sma te yu e preiki. Yehovah o blesi yu tu te yu e leri sma den sani di yu kon sabi fu di yu e leisi Bijbel.
LEISI BIJBEL ÈN PRAKSERI FU SAN YU LEISI
4. San a wani taki fu leisi Bijbel „nanga wan safri sten”?
4 Yehovah no wani taki den futuboi fu en leisi en Wortu esi-esi noso frafra. Na ini owruten a ben taigi Yosua: „Yu musu tan taki fu a wèt di skrifi na ini a buku disi. Dei nanga neti yu musu leisi en nanga wan safri sten” (Yos. 1:8; Ps. 1:2). Yu denki taki disi wani taki dati wi musu leisi ala den Bijbel buku fu Genesis te go miti Openbaring nanga wan safri sten? Nôno. Den wortu „nanga wan safri sten” wani taki dati wi musu leisi en safrisafri, so taki wi man prakseri fu san wi e leisi. Te yu e leisi Bijbel na a fasi disi, dan yu o man feni pisi di yu kan gebroiki na ini yu eigi libi èn di e gi yu deki-ati. Te yu feni so wan pisi na ini Bijbel, dan leisi en safrisafri. Kande yu kan leisi en nanga wan safri sten so taki yu kan yere san yu e leisi. Te yu e du dati, dan den sani di yu e leisi kan naki yu ati trutru. Fu san ede disi prenspari? We, te yu frustan san Gado wani leri yu, dan yu o wani du dati tu.
5-7. Wi kan kisi furu wini te wi e teki ten fu prakseri fu den sani di wi e leisi na ini Bijbel. Gi wan tu eksempre di e sori fa disi kan yepi yu fu (a) kakafutu gi tesi; (b) fu taki na wan switi fasi; (c) fu frutrow na tapu Yehovah, srefi na ini muilek ten.
5 Te wi feni taki wan Bijbel buku muilek fu frustan, dan a bun fu leisi en safrisafri, so taki wi kan prakseri fu san wi e leisi. Fu eksempre, kon meki wi taki dati wan yongu brada abi a gwenti fu leisi Bijbel ibri dei èn a doro na a Bijbel buku Hosea. Baka te a leisi kapitel 4 vers 11 te go miti 13, a e teki ten fu prakseri fu den vers disi. (Leisi Hosea 4:11-13.) Fu san ede a e du dati? Den vers disi e hari en prakseri fu di den pikin na skoro e gi en deki-ati fu du hurudu. Te a e prakseri fu den vers disi, a e taigi ensrefi: ’Yehovah e si den ogri di sma e du, srefi te tra sma no e si den. Mi no wani du wan sani di ben o meki a firi sari.’ Sobun, a brada e bosroiti fu kakafutu gi a tesi disi èn fu tan du a wani fu Yehovah.
6 Meki wi luku wan tra eksempre: Wan sisa e leisi a Bijbel buku Yoèl èn a e doro na kapitel 2 vers 13. (Leisi Yoèl 2:13.) A e leisi a tekst disi safrisafri èn a e prakseri fa a kan de leki Yehovah di ’abi switifasi nanga sari-ati, di ati no e bron esi, èn di abi bun-ati pasa marki’. Son leisi a sisa disi e taki grofu nanga sma èn a e taigi sma hati sani. Ma di a leisi a tekst disi, a bosroiti fu no taki so moro nanga en masra èn nanga tra sma.
7 Luku wan tra eksempre: Wan Kresten papa lasi en wroko èn a e aksi ensrefi fa a o sorgu gi en wefi nanga en pikin. A e leisi Nahum 1:7 pe skrifi: „Yehovah bun. A de wan fortresi na ini ten fu banawtu. A sabi den sma di e kon kibri na en.” Te a brada e prakseri fu a tekst disi, a no e broko en ede so furu moro. A e firi taki Yehovah lobi en èn taki a o sorgu gi en. Baka dati, a e leisi vers 15 èn a e prakseri fu dati. (Leisi Nahum 1:15.) A brada e frustan taki te a e preiki a bun nyunsu na ini muilek ten, a e sori taki a e si Yehovah leki en fortresi trutru. Fu dati ede, a brada bosroiti fu go na preikiwroko mindriwiki tu, aladi a e suku wan tra wroko.
8. Fruteri syatu sortu moi sani yu leri di yu leisi Bijbel.
8 Den moi tori di wi luku didyonsro, komoto fu Bijbel buku di son sma feni muilek fu frustan. Ma te wi feni vers na ini di wi kan gebroiki na ini wi libi, dan dati o gi wi deki-ati fu leisi den buku disi moro bun. Den buku fu den profeiti dati kan meki yu kisi furu koni èn den kan gi yu furu deki-ati! Ma fa a de nanga tra buku fu Bijbel? Gado Wortu de leki wan presi pe furu dyamanti de dipi na ini a gron. Te yu e leisi Bijbel, dan pruberi fu feni rai nanga deki-ati na ini di de leki dyamanti!
MEKI MUITI FU FRUSTAN SAN YU E LEISI
9. San wi kan du fu frustan Bijbel moro bun?
9 A prenspari fu leisi Bijbel ala dei, ma yu musu du muiti tu fu frustan san yu e leisi. Fu dati ede a bun fu gebroiki den tra buku fu na organisâsi fu Yehovah di kan yepi yu fu frustan son sani di pasa na ini Bijbel ten. Den kan yepi yu tu fu kon sabi moro fu den sma nanga presi di kari na ini Bijbel. Te yu leisi wan sani na ini Bijbel, ma yu no sabi fa yu kan gebroiki dati na ini yu libi, dan yu kan aksi wan owruman, wan lepi brada noso wan lepi sisa fu yepi yu. Meki wi luku na eksempre fu wan Kresten na ini Bijbel ten di ben abi yepi fanowdu fu frustan sani moro krin. A man disi ben nen Apolos.
10, 11. (a) Fa Apolos kisi yepi fu tron wan moro bun preikiman fu a bun nyunsu? (b) San wi kan leri fu a tori fu Apolos? (Luku a faki „Den sani di yu e leri sma de soleki fa wi e si sani now?”)
10 Apolos ben de wan Dyu Kresten di ben „sabi Gado Buku bun”. A Bijbel buku Tori fu den apostel taki fu en: „Fu di a santa yeye fu Gado meki a de fayafaya, meki a bigin taki nanga sma èn na wan yoisti fasi a bigin leri sma sani di abi fu du nanga Yesus. Ma a ben sabi soso fu a dopu fu Yohanes.” Apolos no ben sabi taki Yesus ben leri den disipel fu en wan nyun sani di abi fu du nanga dopu. Di a Kresten trowpaar Akwila nanga Preskela yere san Apolos ben e leri sma na ini Efeise, „den fruteri en moro fini fu a pasi fu Gado” (Tori 18:24-26). Sortu wini Apolos kisi fu disi?
11 Baka di Apolos preiki na ini Efeise, a go na Akaya. „Di a doro drape, a du furu fu yepi den wan di tron bribiman fu di Gado ben sori den bun-ati. A ben de fayafaya di a sori den Dyu krinkrin na fesi ala sma taki den leri fu den no bun. A ben e gebroiki Gado Buku tu fu sori den taki Yesus na a Krestes” (Tori 18:27, 28). Fu di Apolos ben frustan now san a Kresten dopu ben wani taki, meki a ben man „du furu fu yepi” nyun bribiman fu go na fesi na ini a tru anbegi. San wi kan leri fu a tori disi? Neleki Apolos, wi musu du muiti fu frustan san wi e leisi na ini Bijbel. Ma te wan lepi brada noso sisa e sori wi fa wi kan gi leri moro bun, dan wi musu abi sakafasi èn wi musu de nanga tangi taki a wani yepi wi. Te wi e du dati, dan wi o tron moro bun leriman.
GEBROIKI DEN SANI DI YU LERI FU YEPI TRAWAN
12, 13. Fa wi kan gebroiki Bijbel fu yepi wan Bijbelstudie fu go na fesi?
12 Neleki Preskela, Akwila nanga Apolos, wi srefi kan yepi trawan tu. Fa yu e firi te yu yepi wan sma fu tyari kenki kon na ini en libi, so taki a kan go na fesi na ini a tru anbegi? Kande yu na wan owruman di gi wan brada noso sisa Bijbel rai di a ben de na nowtu. Fa yu e firi te a brada noso sisa kon taki yu tangi fu di a rai di yu gi en yepi en? A no de fu taki dati yu e firi prisiri te yu man gebroiki Gado Wortu fu yepi trawan fu abi wan moro bun libi.a Meki wi luku fa yu kan du dati.
13 Na ini a ten fu Elia, furu Israelsma no ben man bosroiti efu den ben musu anbegi a tru Gado noso tra falsi gado. A rai di Elia gi den sma dati, kan yepi wan Bijbelstudie di no man bosroiti efu a wani dini Yehovah trutru. (Leisi 1 Kownu 18:21.) Kande yu miti wan sma di wani sabi moro fu Bijbel, ma a e frede san den mati noso famiri fu en o taki. Efu yu wani gi a sma disi deki-ati fu dini Yehovah, yu kan leisi Yesaya 51:12, 13 gi en.—Leisi en.
14. Efu yu wani gebroiki wan Bijbeltekst fu yepi wan sma, dan san kan yepi yu fu feni a tekst makriki?
14 Na ini Bijbel wi kan leisi furu sani di e gi wi deki-ati èn di e tranga wi bribi. Bijbel abi furu rai tu di kan yepi wi na ini wi aladei libi. Ma kande yu e aksi yusrefi: ’Fa mi kan feni wan tekst makriki efu mi wani gebroiki en fu yepi wan sma?’ Leisi Bijbel ibri dei èn prakseri fu san yu e leisi. Na so yu o kon sabi Bijbel moro bun, èn Yehovah kan gebroiki en santa yeye fu yepi yu memre den tekst.—Mark. 13:11; leisi Yohanes 14:26.b
15. San o yepi yu fu frustan Gado Wortu moro bun?
15 Neleki Kownu Salomo, yu musu begi Yehovah fu gi yu koni fu du a preikiwroko bun èn fu tyari den frantwortu di yu abi na ini a gemeente (2 Kron. 1:7-10). Du leki den profeiti fu owruten di ben e ondrosuku Gado Wortu finifini. Disi o yepi yu fu kisi soifri sabi fu Yehovah nanga a wani fu en (1 Petr. 1:10-12). Na apostel Paulus ben gi Timoteyus a deki-ati fu tan studeri, so taki a ben kan ’sabi den wortu fu a bribi èn fu a bun leri di a ben hori finifini’ (1 Tim. 4:6). Te yu e du dati tu, yu o man yepi trawan moro bun fu go na fesi na ini a tru anbegi èn a bribi fu yu o kon moro tranga.
WI O ABI WAN TRANGA BRIBI TE WI ABI A GWENTI FU LEISI BIJBEL
16. (a) Fa den Bereyasma kisi wini di den „ondrosuku Gado Buku finifini ibri dei”? (b) Fu san ede a prenspari taki wi na ini a ten disi leisi Bijbel ibri dei?
16 Den Dyu di ben e tan na ini a foto Bereya na Masedonia, ben abi a gwenti fu „ondrosuku Gado Buku finifini ibri dei”. Di Paulus preiki a bun nyunsu gi den Dyu dati, den ben e go luku efu den sani di Paulus taki e kruderi nanga den sani di den ben sabi fu den Buku fu Bijbel. San ben de a bakapisi? Furu fu den „tron bribiman” fu di den kon si taki den sani di Paulus leri den, tru (Tori 17:10-12). Disi e sori taki wan sma di e leisi Bijbel ibri dei, e kisi wan moro tranga bribi na ini Yehovah. Na a bribi disi wi musu abi efu wi wani pasa go na ini a nyun grontapu fu Gado.—Hebr. 11:1.
17, 18. (a) Fa wan tranga bribi èn lobi kan kibri na agersi ati fu wan Kresten? (b) Fa howpu kan kibri wi?
17 Paulus ben abi leti di a skrifi: „Meki wi di de fu deiten, de na ai èn meki a bribi nanga a lobi fu wi de leki wan sani di wi e weri fu kibri a borsu fu wi. Meki a howpu di wi abi taki wi o kisi frulusu, de leki wan hèlm gi wi” (1 Tes. 5:8). Wan srudati ben musu weri wan sani fu kibri en borsu, so taki den feanti no ben kan sutu en na en ati. Na so a de tu taki wan Kresten musu kibri en agersi ati gi sondu. Te wan futuboi fu Yehovah e bribi trutru san Gado pramisi èn te a lobi Gado nanga tra libisma, dan a e kibri en agersi ati. So wan sma o meki ala muiti fu no du sani di kan pori en matifasi nanga Gado.
18 Paulus ben taki tu: „A howpu di wi abi taki wi o kisi frulusu, de leki wan hèlm gi wi.” Efu wan srudati na ini Bijbel ten no ben weri wan sani fu kibri en ede, a ben kan lasi en libi na ini a feti. Ma efu a ben abi wan bun hèlm, dan a no ben o kisi hebi mankeri awinsi sma ben o naki en na en ede. Te wi e studeri Gado Wortu, dan a howpu di wi abi taki Gado o frulusu wi o kon moro tranga. Wan tranga howpu e yepi wi fu kakafutu gi sma di fadon komoto na bribi. Wi no o arki den „lawlaw takitaki” fu den di kan pori wi bribi (2 Tim. 2:16-19). A howpu fu wi e gi wi deki-ati tu fu kakafutu gi den sma di wani meki wi du sani di Yehovah no feni bun.
YU O MAN PASA DEN LASTI DEI TE YU ABI A GWENTI FU LEISI BIJBEL
19, 20. Fu san ede wi abi furu warderi gi Gado Wortu, èn fa wi e sori dati? (Luku a faki „Yehovah sabi soifri san mi abi fanowdu”.)
19 O moro a kaba e kon krosibei, o moro wi musu frutrow na tapu a Wortu fu Yehovah. Den rai na ini Bijbel kan yepi wi fu tapu nanga takru gwenti èn fu basi den sondu firi fu wi. A deki-ati nanga a trowstu fu Gado Wortu o yepi wi fu pasa den tesi fu Satan èn fu a grontapu fu en. A tiri di Yehovah e gi wi nanga yepi fu en Wortu o yepi wi fu tan na tapu a pasi fu libi.
20 Hori na prakseri taki Gado wani taki „ala sortu sma musu kisi frulusu”. Den sma disi na ala den futuboi fu en nanga den sma di e arki te wi e preiki a bun nyunsu gi den èn te wi e gi den leri fu Bijbel. Ma ala sma di wani kisi frulusu musu „kon sabi a tru leri finifini” (1 Tim. 2:4). Sobun, efu wi wani pasa den lasti dei, dan wi musu leisi Bijbel èn wi musu du san skrifi na ini. Iya, a leisi di wi e leisi Bijbel ibri dei e sori omeni warderi wi abi gi a Wortu fu Yehovah.—Yoh. 17:17.
a Noiti wi musu gebroiki Bijbel fu dwengi wan sma fu kenki en libi. Wi no musu gebroiki Bijbel tu fu gi wan sma a firi taki a no bun. Te wi e studeri Bijbel nanga wan sma, dan wi musu abi pasensi èn wi musu abi switifasi neleki fa Yehovah abi dati gi wi.—Ps. 103:8.
b San yu kan du efu yu e memre wan tu prenspari wortu fu wan tekst, ma yu no sabi na ini sortu buku, kapitel, noso vers fu Bijbel a skrifi? Na bakasei fu a Bijbel—Nyun-Grontapuvertaling, yu abi wan pisi di nen „Wortu di yu kan feni na ini a Bijbel disi”. Drape yu kan feni den wortu di yu e suku èn den tekst pe den skrifi.