„Taigi wi: Oten den sani disi sa de?”
„Njoen sani mi e tjari kon na fesi. Bifo den bigin sproiti, mi e meki oenoe kon sabi den.” — JESAJA 42:9.
1, 2. (a) San den apostel foe Jesus ben aksi foe a ten di e kon? (b) Fa a piki foe Jesus di abi foe doe nanga wan marki di meki foe difrenti pisi, ben kon troe?
LERI foe Gado e bigin na Jehovah Gado, „a Sma di foe a bigin kaba e froeteri a bakapisi” (Jesaja 46:10). Neleki fa na artikel na fesi ben sori, dan den apostel ben soekoe sowan leri na Jesus, di den ben aksi en: „Taigi wi: Oten den sani disi sa de, èn san sa de a marki te ala den sani disi sa kon na wan kaba?” — Markus 13:4.
2 Leki piki, Jesus ben taki foe wan „marki” di meki foe difrenti pisi èn di abi boeweisi na ini, di ben sa sori taki a djoe seti ben sa kaba heri esi. Disi ben kon troe nanga a pori di den ben pori Jerusalem ini 70 Gewoon Teri. Ma Jesus profeititori ben sa abi wan moro bigi kontroe, foeroe jari moro fara ini a ten di e kon. So esi leki „den fasti ten foe den nâsi” ben kon na wan kaba ini 1914, wan marki di panja na alasei ben sa de foe si, di e sori wi taki heri esi a disiten ogri seti ben sa kon na wan kaba ini wan „bigi banawtoe”a (Lukas 21:24). Miljoenmiljoen sma di de na libi now, kan kotoigi taki a marki disi ben kon troe ini den grontapoe orlokoe nanga tra prenspari sani di pasa na ini a di foe 20 jarihondro disi. Den sani disi e marki so srefi a moro bigi kontroe foe Jesus profeititori, a disiten kontroe disi di e kroederi nanga san ben pasa foe 33 Gewoon Teri te go miti 70 Gewoon Teri.
3. Di Jesus ben taki foe wan tra marki, dan sortoe tra sani di ben sa pasa, Jesus ben taki na fesi?
3 Baka di Lukas e taki foe den fasti ten foe den nâsi, dan den srefi tori ini Mateus, Markus nanga Lukas, e taki foe wan lo sani di ben o pasa moro fara, di abi wan marki na ini toe, boiti a ’marki [di meki foe difrenti pisi] foe a kaba foe a seti foe sani’(Mateus 24:3). (Na bladzijde 25, den marki a penti disi ini a tori nanga wan dobroe lin.) Mateus e taki: „Wantewante baka a banawtoe foe den dei dati a son sa kon doengroe, èn a moenkenki no sa gi a leti foe en, èn den stari sa fadon komoto na hemel, èn den sa seki den krakti foe den hemel. Èn dan a marki foe a Manpikin foe libisma sa de foe si na hemel, èn dan ala den lo foe grontapoe sa bari krei, èn den sa si a Manpikin foe libisma e kon tapoe den wolkoe foe hemel nanga krakti èn bigi glori. Èn a sa seni den engel foe en go nanga wan tranga trompeti babari, èn komoto na ala oekoe foe grontapoe den sa tjari denwan kon makandra di a froekisi, foe a wan kaba pisi foe den hemel te go miti a tra kaba pisi foe den hemel.” — Mateus 24:29-31.
Banawtoe nanga sani di ben de foe si na hemel
4. Sortoe aksi opo kon di abi foe doe nanga den sani di ben de foe si na hemel, di Jesus ben taki foe en?
4 Oten dati ben sa kon troe? Ala den dri Evangelie tori e taki foe san wi kan kari sani di ben de foe si na hemel — son nanga moenkenki di e kon doengroe èn den stari di e fadon. Jesus ben taki dati den sani disi ben sa pasa baka „a banawtoe”. Jesus ben abi na prakseri a banawtoe di ben doro en heimarki ini 70 Gewoon Teri, noso a ben e taki foe a bigi banawtoe di moesoe kon ete ini a ten disi foe wi? — Mateus 24:29; Markus 13:24.
5. San den ben prakseri wanten foe a banawtoe ini a ten disi?
5 Sensi den fasti ten foe den nâsi ben kon na wan kaba ini 1914, Gado pipel ben abi belangstelling troetroe gi „a bigi banawtoe” (Openbaring 7:14). Foeroe jari den ben prakseri taki a disiten bigi banawtoe ben abi wan bigin pisi di ben kroederi nanga a ten foe a Fosi Grontapoe Orlokoe, dan a abi wan pisi ten di kon na mindri pe a ben tapoe foe wan pisi ten, èn te foe kaba wan kaba pisi,„a feti foe a bigi dei foe Gado na Almaktiwan”. Efoe dati ben de so, dan san ben sa pasa ini den someni tenti jari, di e kon na mindri, foe a „kaba foe a seti”? — Openbaring 16:14; Mateus 13:39; 24:3; 28:20.
6. San den ben denki taki ben o de a kontroe foe a profeititori foe Jesus, foe den sani di ben de foe si na hemel?
6 We, den ben prakseri taki ini a pisi ten disi di kon na mindri, sma ben sa si a marki di meki foe difrenti pisi, di abi na ini toe a preikiwroko di a pipel foe Gado, di ben tjari kon makandra, e doe. A ben sori toe taki den sani di ben de foe si na hemel èn di den ben taki na fesi foe den, den ben kan froewakti den ini a pisi ten di kon na mindri, baka a bigin pisi ini 1914-1918 (Mateus 24:29; Markus 13:24,25; Lukas 21:25). Den ben poti prakseri na tapoe sani di wi kan si troetroe ini den hemel — leki ruimte sonde (wan sortoe aparaat di kan tjari bodoi foe a loktoe kon na grontapoe), raket, radio-aktief straal, nanga den lanpresi noso gron foe den raket na tapoe a moenkenki.
7. Sortoe kenki ini a fasi foe froestan sani, di abi foe doe nanga a bigi banawtoe, den ben gi?
7 Ma, A Waktitoren foe 15 juli 1970 (Bakratongo), ben ondrosoekoe Jesus profeititori baka, spesroetoe a bigi banawtoe di e kon. A ben sori taki efoe wi loekoe san ben pasa ini a fosi jarihondro, dan a disiten banawtoe no ben kan abi wan bigin pisi ini 1914-1918, wan pisi ten di e kon na mindri someni tenti jari langa, èn baka dati a e go doro. A tijdschrift dati ben bosroiti: „A ’bigi banawtoe’ so leki no sa kon moro baka dati, de na wi fesi ete, bika a wani taki a pori foe a grontapoemakti foe falsi fasi foe anbegi (san abi na ini krestenhèit toe) èn a ’feti foe a bigi dei foe Gado na Almaktiwan’ ini Armagedon sa kon na en baka.”
8. Nanga a kenki ini a fasi fa foe si a banawtoe ini a ten disi, fa den ben froeklari Mateus 24:29?
8 Ma Mateus 24:29 e taki dati den sani di ben de foe si na hemel e kon „wantewante baka a banawtoe”. Fa dati kan? A Waktitoren foe 15 juli 1975 (Bakratongo), ben sori na tapoe taki djaso „a banawtoe” ben wani taki a wan di ben kisi en heimarki na a ten dati ini 70 Gewoon Teri. Ma na sortoe fasi wi ben kan taki dati den sani di ben de foe si na hemel ini wi ten, ben e pasa „wantewante” baka wan sani di ben pasa ini 70 Gewoon Teri? A prakseri ben de taki ini na ai foe Gado, den jarihondro na mindri ben sa de sjatoe (Romesma 16:20; 2 Petrus 3:8). Ma, wan moro dipi ondrosoekoe foe a profeititori disi, spesroetoe foe Mateus 24:29-31, e sori go na wan heri tra froeklari foe a tori. Disi e sori wi fa a leti e skèin „moro nanga moro te a dei e kon boen dorodoro” (Odo 4:18, American Standard Version).b Meki wi go loekoe foe san ede wan njoen, noso kenki ini a froeklari foe a tori disi de joisti.
9. Fa den Hebrew Boekoe foe bijbel e gi wi wan background foe den wortoe foe Jesus, di abi foe doe nanga den sani di sa pasa na hemel?
9 Jesus ben gi fo foe den apostel foe en a profeititori foe ’a son di e kon doengroe, a moenkenki di no e gi leti, èn den stari di e fadon’. Leki djoe, den ben sa kan sabi den sortoe taki disi kaba, foe di den Hebrew Boekoe foe bijbel foe den e taki foe dati, foe eksempre, ini Sefania 1:15 den ben kari Gado en ten foe kroetoe „wan dei foe tranga winti èn foe pori, wan dei foe doengroe èn foe blaka, wan dei foe wolkoe èn foe deki doengroe”. Difrenti Hebrew profeiti ben taki toe foe son di e kon doengroe, a moenkenki di no e skèin, èn den stari di no e gi leti. Den sortoe taki disi joe sa feni ini den boskopoe foe Gado kontrari Babilon, Edom, Egipti nanga a noordsei kownoekondre foe Israèl. — Jesaja 13:9, 10; 34:4, 5; Jeremia 4:28; Esekièl 32:2, 6-8; Amos 5:20; 8:2, 9.
10, 11. (a) San Joèl ben taki ini a profeititori, foe sani di abi foe doe nanga den sani na hemel? (b) Sortoe pisi foe a profeititori foe Joèl ben kon troe ini 33 Gewoon Teri, èn sortoe pisi no ben kon troe?
10 Di Petrus nanga den dri trawan ben jere san Jesus ben taki, dan so leki fa a sori, den ben memre Joèl profeititori di wi e feni ini Joèl 2:28-31 nanga 3:15: „Mi sa kanti mi jeje na tapoe ibri sortoe foe skin, èn oen manpikin nanga oemapikin seiker sa taki profeititori. . . . Mi wani gi wondroemarki na den hemel èn na grontapoe, broedoe nanga faja nanga foeroe wolkoe foe smoko. A son srefi sa kenki kon doengroe, èn a moenkenki na ini broedoe, bifo Jehovah en bigi dei, di e gi frede, e kon.” „Son nanga moenkenki srefi seiker sa kon doengroe, èn den stari srefi troetroe no sa gi a krin leti foe den moro.”
11 So leki fa Tori foe den Apostel 2:1-4 nanga 14-21 e taki, dan na a Pinksterfesa foe 33 Gewoon Teri, Gado ben kanti santa jeje na tapoe 120 disipel, man nanga oema. Na apostel Petrus ben meki sma kon sabi taki disi na san Joèl ben taki na fesi. Ma, fa foe den wortoe foe Joèl foe ’a son di ben sa kenki kon doengroe, èn a moenkenki ini broedoe èn den stari di no ben sa gi a krin leti foe den moro’? Noti e sori taki disi ben kon troe ini 33 Gewoon Teri noso ini a heri pisi ten foe moro leki 30 jari foe a kaba foe a djoe seti foe sani.
12, 13. Fa den sani di ben de foe si na hemel, èn di Joèl ben taki foe den na fesi, ben kon troe?
12 So leki fa a sori, dan a lasti pisi dati foe san Joèl ben taki na fesi, ben abi foe doe moro krosibei nanga „a kon foe Jehovah en bigi dei, di e gi frede” — a pori foe Jerusalem. A Waktitoren foe 15 februari 1967 (Bakratongo), ben taki foe a banawtoe di ben kon na tapoe Jerusalem ini 70 Gewoon Teri: „Dati ben de troetroe wan ’dei foe Jehovah’ di abi foe doe nanga Jerusalem nanga den pikin foe en. Èn ini a tori foe a dei dati, foeroe ’broedoe nanga faja nanga smoko’ ben de, a son no ben gi krin leti na a doengroe foe a foto na deiten, èn a moenkenki ben gi wi wan idea foe broedoe di ben lon, no solfroe moenkenki leti na netiten di e gi vrede.”c
13 Ija, so leki den tra profeititori di wi ben si, na so den sani di ben de foe si na hemel èn di Joèl ben taki foe den na fesi, ben sa kon troe te Jehovah ben sa tjari kroetoe kon. Na presi foe a doengroe di a son, moenkenki nanga stari ben kon doengroe ini a heri pisi ten foe a kaba foe a djoe seti foe sani, den sani disi pasa, di den legre di ben tjari kroetoe kon, ben kon kontrari Jerusalem. A e taki foe ensefi, taki wi kan froewakti wan moro bigi kontroe foe a pisi dati foe Joèl profeititori, te Jehovah kroetoe foe a disiten seti foe sani e bigin foe kon.
Sortoe banawtoe bifo den sani di ben de foe si na hemel?
14, 15. Fa Joèl profeititori kan jepi wi foe froestan Mateus 24:29?
14 A kontroe foe Joèl profeititori (ini akroederi nanga den tra profeititori di e taki foe den srefi sani), e jepi wi foe froestan den wortoe di skrifi na Mateus 24:29. A de krin, taki san Jesus ben taki foe ’a son di sa kon doengroe, a moenkenki di no sa gi leti èn den stari di sa fadon’, no e sori go tapoe sani di o pasa ini den someni tenti jari foe a kaba foe a disiten seti foe sani, so leki raket di den soetoe go na loktoe, a saka di den sa saka na tapoe a moenkenki, èn den sortoe sani dati. Nôno, a ben sori tapoe sani di ben abi foe doe nanga „a bigi dei foe Jehovah di e gi frede”, a pori di moesoe kon ete.
15 Disi e jepi wi foe froestan moro boen fa den sani di ben de foe si na hemel, ben sa de „wantewante baka a banawtoe”. Jesus no ben e sori tapoe a banawtoe di doro en heimarki ini 70 Gewoon Teri. Na presi foe dati, a ben sori tapoe a bigin foe a bigi banawtoe di ben sa miti a grontapoe sistema ini a ten di e kon, èn di sa meki a „denoja” foe en, di a ben pramisi, kon na wan heimarki (Mateus 24:3). A banawtoe dati de na wi fesi ete.
16. Na sortoe banawtoe Markus 13:24 ben sori go èn foe san ede dati de so?
16 San wi kan taki foe den wortoe ini Markus 13:24: „Ini den dei dati, baka a banawtoe dati, a son sa kon doengroe èn a moenkenki no sa gi a leti foe en?” Djaso den wortoe „den dati” èn „dati” na fasi foe a Griki wortoe e·keiʹnos, wan aanwijzend voornaamwortoe di e sori tapoe wan sani di de fara ini ten. Wi kan gebroiki E·keiʹnos foe sori tapoe sani di pasa langa ten kaba (noso di den kari na fesi kaba), noso wan sani di de foeroe jari moro fara ini a ten di e kon (Mateus 3:1; 7:22; 10:19; 24:38; Markus 13:11, 17, 32; 14:25; Lukas 10:12; 2 Tesalonikasma 1:10). So boen, Markus 13:24 e sori tapoe „a banawtoe dati”, no tapoe a banawtoe di den Romesma ben tjari kon, ma tapoe Jehovah en maktifasi foe handri na a kaba foe a disiten seti.
17, 18. Sortoe leti Openbaring e trowe na tapoe a fasi fa a bigi banawtoe sa pasa?
17 Kapitel 17 te nanga 19 foe Openbaring e kroederi nanga a kenki ini a fasi foe froestan disi foe Mateus 24:29-31, Markus 13:24-27, nanga Lukas 21:25-28 èn e sori taki a de troe. Na sortoe fasi? Den evangelie e sori taki a banawtoe disi no sa bigin èn no sa kon na wan kaba wantewante. Baka te a bigi banawtoe e bigin, dan wantoe foe a trangajesi libisma famiri sa de na libi ete foe si „a marki foe a Manpikin foe libisma” èn foe doe wan sani na tapoe dati — foe bari krei, èn, so leki fa a skrifi ini Lukas 21:26, foe „kon weri foe frede èn froewakti foe den sani di e kon tapoe a grontapoe pe libisma e libi”. Den sa abi a frede dati, di e moro den, foe di den e si „a marki”, di wani taki a pori foe den di de krosibei.
18 A tori ini Openbaring e sori taki a bigi banawtoe, di de na wi fesi, sa bigin te den sroedati „toetoe” foe na internationaal „werdri meti” sa drai teige „a bigi hoeroe-oema”, Babilon a Bigiwand (Openbaring 17:1, 10-16). Ma foeroe sma sa tan abra, bika kownoe, bisnisman, boto kapten nanga trawan e sari foe a kaba di falsi fasi foe anbegi e kon na en kaba. Sondro misi, foeroe sma sa sabi taki a kroetoe foe den sa kon baka dati. — Openbaring 18:9-19.
San de foe kon?
19. San wi kan froewakti te a bigi banawtoe e bigin?
19 Den pisi foe den Evangelie ini Mateus, Markus, nanga Lukas, makandra nanga Openbaring kapitel 17 te nanga 19 e trowe foeroe leti tapoe san sa pasa heri esi. Na a fasti ten foe Gado, a bigi banawtoe sa bigin nanga a feti di den sa kon feti nanga a grontapoemakti foe falsi fasi foe anbegi (Babilon a Bigiwan). Disi sa de hebi, spesroetoe kontrari krestenhèit, di de neleki a Jerusalem di no ben de getrow. „Wantewante baka” a pisi disi foe a bigi banawtoe, „marki sa de ini son nanga moenkenki nanga stari, èn na grontapoe broeja skreki foe den nâsi”. — Mateus 24:29; Lukas 21:25.
20. Sortoe sani di sa de foe si na hemel, wi kan froewakti ete?
20 Na sortoe fasi ’a son sa kon doengroe, a moenkenki no sa gi en leti, den stari sa fadon komoto na hemel, èn den hemelkrakti sa seki’? Degedege no de, taki na a bigin foe a bigi banawtoe, „den tin toetoe” di den kari ini Openbaring 17:16, sa poeroe den doe foe den foeroe hemel mekisani di e gi leti — den prenspari tiriman foe den difrenti fasi foe anbegi — kon na doro èn den sa pori den. Degedege no de ini a tori, taki den sani disi sa seki den politiek makti toe. A ben sa kan, taki sani di pasa èn di e gi frede ben sa de toe na den hemel di sma kan si? Ija, a kan, èn den sa gi moro frede moro leki san Josefus ben skrifi, foe san ben e pasa krosibei foe a kaba foe a djoe seti. Wi sabi taki fositen, Gado ben sori en makti foe meki den sortoe rampoe bakapisi disi kon èn a kan doe dati agen. — Exodus 10:21-23; Josua 10:12-14; Kroetoebakra 5:20; Lukas 23:44, 45.
21. Fa wan „marki” di de ini a ten di e kon, sa feni presi?
21 Na a penti disi, ala dri Evangelie skrifiman e gebroiki to’te (dan), foe bigin nanga a tra sani di o pasa. „Dan a marki foe a Manpikin foe libisma sa de foe si na hemel” (Mateus 24:30; Markus 13:26; Lukas 21:27). Sensi a Fosi Grontapoe Orlokoe, den troe disipel foe Jesus ben si a marki di meki foe difrenti pisi, foe a denoja foe en di no de foe si, ala di moro foeroe foe den sma no ben kon sabi dati. Ma Mateus 24:30 e sori go na fesi na wan tra „marki” di sa sori ensrefi ini a ten di e kon, a marki foe „a Manpikin foe libisma” èn ala nâsi sa moesoe poti prakseri na tapoe en. Te Jesus e kon ini den wolkoe, na wan fasi di sma no man si, dan den sma na heri grontapoe di de kontrari en, sa moesoe kon sabi a „kon” dati (Griki, er·khoʹme·non), foe di na wan froewondroe fasi a sa demo en kownoe makti. — Openbaring 1:7.
22. Sortoe krakti a si di sma sa si „a marki” foe Mateus 24:30, sa abi na den tapoe?
22 Mateus 24:30 e gebroiki toʹte ete wan tron, foe sori san e kon baka dati. Dan den nâsi, di sabi a bakapisi foe a situwâsi foe den, sa bari krei, foe di den kon sabi kande taki a pori foe den de krosibei. Fa a de tra fasi nanga den foetoeboi foe Gado, foe di wi sa man foe opo wi ede, foe di wi sabi taki froeloesoe de krosibei! (Lukas 21:28) Openbaring 19:1-6 e sori toe, taki troe anbegiman na hemel èn na grontapoe e prisiri foe a kaba foe a bigi hoeroe-oema.
23. (a) San Jesus o doe nanga denwan di a froekisi?(b) San wi kan taki foe a tjari di den sa tjari a fikapisi go na hemel?
23 Jesus profeititori e go doro foe taki ini Markus 13:27: „Dan [toʹte] a sa seni den engel go èn den sa tjari denwan kon makandra di a froekisi, komoto na ala oekoe foe grontapoe, foe a kaba pisi foe grontapoe te go miti a kaba pisi foe hemel.” Djaso Jesus e poti prakseri na tapoe a fikapisi foe den 144.000, „denwan di a froekisi”, di e libi na grontapoe ete. Froekoe ini a kaba foe a seti foe sani, den ben tjari den salfoe disipel disi foe Jesus kon na wán na ini wan theokrasia seti. Ma foe a fasi fa den sani ben pasa baka makandra, Markus 13:27 nanga Mateus 24:31 e taki foe wan tra sani. „Nanga wan tranga trompeti babari”, den sa tjari a fikapisi foe „denwan di a froekisi”, kon makandra komoto na ala oekoe foe grontapoe. Fa den sa tjari den kon makandra? Sondro misi, den sa „kisi wan lakstampoe” èn Jehovah sa meki sma kon sabi den leki wan pisi foe „denwan di a ben kari èn di a ben froekisi èn di de getrow”. Èn na a ten di Gado poti, den sa tjari den kon makandra foe opo go na hemel foe de kownoe-priester.e Disi sa tjari prisiri gi den èn gi den getrow kompe foe den, a „bigi ipi” di densrefi sa kisi wan marki, foe ’komoto na a bigi banawtoe’ foe njanboen foe den blesi na wan paradijs grontapoe. — Mateus 24:22; Openbaring 7:3, 4, 9-17; 17:14; 20:6; Esekièl 9:4, 6.
24. San Mateus 24:29-31 e tjari kon na krin foe a fasi fa sani sa pasa baka makandra, ini den sani di sa pasa ini a ten di e kon?
24 Di den apostel ben taki: „Taigi wi. . . .”, a piki foe Jesus ben abi moro na ini leki san den ben man graboe. Tokoe, ini a libiten foe den, den ben prisiri foe si a spesroetoe kontroe foe a profeititori foe en. Ini a stoeka di wi e stoeka a piki foe Jesus, wi ben e poti prakseri na tapoe a pisi foe a profeititori foe en di sa kon troe ini a krosibei ten di e kon (Mateus 24:29-31; Markus 13:24-27; Lukas 21:25-28). Wi kan si kaba taki a froeloesoe foe wi e kon moro krosibei. Wi kan loekoe go na fesi na a bigin foe a bigi banawtoe, dan wi kan loekoe go na a marki foe a Manpikin foe libisma èn dan loekoe go na a tjari di Gado sa tjari denwan di den froekisi kon na wan. Te foe kaba, leki a Sma di tjari a kroetoe strafoe foe Jehovah kon ini Armagedon, a Fetiman-Kownoe foe wi, Jesus, di ben poti tapoe kownoestoeroe, sa „klari a wini foe en” (Openbaring 6:2). A dei dati foe Jehovah, te a sa tjari en atibron kon, sa kon leki wan bigi heimarki na a kaba foe a seti foe sani di marki a dei foe Masra Jesus, foe bigin nanga 1914.
25. Fa wi kan abi wan prati ini a kontroe foe Lukas 21:28, di de ini a ten di e kon ete?
25 Meki a de so, taki joe e go doro foe njanboen foe a leri foe Gado, so taki joe e doe wan sani na tapoe a kontroe foe den wortoe foe Jesus, di de ini a ten di e kon ete: „Te den sani disi bigin foe pasa, opo tanapoe leti-opoe èn opo oen ede, bika oen froeloesoe e kon krosibei” (Lukas 21:28). Fa dati na wan moi tamara di de na fesi denwan di a froekisi èn na fesi a bigi ipi te Jehovah e go doro foe krin en santa nen!
[Foetoewortoe]
a Jehovah Kotoigi e prisiri foe gi boeweisi foe disi, di e sori fa den sani di pasa troetroe èn di wi e si ini wi ten, e meki bijbel profeititori kon troe.
b Foe tra sani foe a tori disi, loekoe a boekoe God’s duizendjarige koninkrijk is nabij gekomen, di a Watchtower Bible & Tract Society of New York, Inc., tjari kon na doro ini 1974, bladzijde 296-322 èn A Waktitoren foe 15 december 1982, bladzijde 293-298 (Sranantongo).
c Josefus e skrifi foe den sani di ben pasa na mindri a fosi leisi di den Romesma ben kon foe feti nanga Jerusalem (66 Gewoon Teri) èn a pori foe Jerusalem: „Na neti joeroe wan bigi winti di e tjari pori kon, ben broko kon; wan bigi orkan ben rigeri, hebi alen ben fadon neleki joe e trowe emre watra, doronomo faja ben koti, den dondroe babari ben meki sma frede, grontapoe ben seki nanga tranga babari di ben broko jesi. A fadon broko disi foe a heri seti foe sani ben prenki krinkrin taki rampoe ben o kon na tapoe a libisma ras, èn no wan sma kan degedege taki den sani di den ben taki foe den na fesi, ben sori tapoe wan bigi rampoe di no abi en speri.”
d Foe san Jesus ben taki leki „bigi banawtoe” èn „wan banawtoe” ini a fosi kontroe foe dati, ben de a pori foe a djoe seti. Ma ini den vers di e fiti den dei foe wi nomo, a ben gebroiki a bepaald lidwoord „a”, te a e taki „a banawtoe” (Mateus 24:21, 29; Markus 13:19, 24). Openbaring 7:14 e kari a sani disi di sa pasa ini a ten di e kon „a bigi banawtoe”, san wani taki troetroe „a banawtoe a bigiwan”.
e Loekoe „Aksi foe leisiman” ini A Waktitoren foe 15 augustus 1990 (Bakratongo).
Joe e memre disi ete?
◻ Fa difrenti pisi foe Joèl 2:28-31 nanga 3:15, ben kon troe ini a fosi jarihondro?
◻ Foe sortoe banawtoe Mateus 24:29 e taki, èn foe san ede wi e kon na a bosroiti dati?
◻ Mateus 24:29 e sori go na sortoe sani di de foe si na hemel, èn fa disi kan pasa wantewante baka a banawtoe?
◻ Fa Lukas 21:26, 28 sa kon troe ini a ten di e kon?
[Prenki na tapoe bladzijde 26, 27]
A tempel kontren
[Sma di abi a reti foe a prenki]
Pictorial Archive (Near Eastern History) Est.