Gebroiki en na ibri okasi
1. Fa wi kan gebroiki a traktaat Yu wani sabi a piki tapu den aksi disi?, na wan bun fasi?
1 A traktaat Yu wani sabi a piki tapu den aksi disi?, meki spesrutu fu yepi wi bigin Bijbelstudie. Ma wi kan gebroiki en tu fu panya den siri fu waarheid (Preik. 11:6). Meki wi go luku wan tu eksempre di kan yepi wi fu gebroiki a traktaat disi bun.
2. Fa wi kan gebroiki a traktaat fu bigin wan takimakandra?
2 Fu bigin wan takimakandra: Yu kan gi na ososma a traktaat, sori en den siksi aksi na fesisei, èn aksi en: „Sortuwan fu den sani disi yu ben aksi yusrefi?” Te a sma gi piki, dan sori san Bijbel e taki fu a tori disi èn leisi wan fu den Bijbeltekst di kari na ini a traktaat. Leisi noso taki syatu fu den sani di skrifi na bakasei fu a traktaat, èn pristeri a Bijbel leri-buku. Awansi na ososma no teki a buku, toku a traktaat di a teki kan meki taki den tru tori fu Bijbel naki en ati.—Mat. 13:23.
3. San wi kan du efu na ososma no abi ten?
3 Efu na ososma no abi ten: Yu kan taki: „Mi e si taki mi no kon na wan bun ten, ma mi wani gi yu a traktaat disi. A e poti prakseri na siksi prenspari sani di furu fu wi aksi wisrefi, èn a e sori krin sortu piki Bijbel e gi tapu ibriwan fu den aksi disi. Te wi o miti baka, dan yu kan taigi mi fa yu ben feni a traktaat.”
4. San wi kan taki te wi e pristeri a traktaat te wi e du stratiwroko?
4 Te wi e du stratiwroko: Yu kan taki: „Fa a e go nanga yu? Oiti yu aksi yusrefi wan fu den sani disi? [Gi a sma na okasi fu piki.] Na ini a traktaat disi yu kan leisi den krin piki di Bijbel e gi tapu den aksi disi.” Efu a sma abi ten fu arki, dan yu kan taki nanga en fu wan fu den piki na ini a traktaat èn yu kan pristeri en a Bijbel leri-buku.
5. Fa wi kan gebroiki a traktaat te sma no de na oso?
5 Te sma no de na oso: Na ini son kontren den preikiman e libi traktaat na baka na den oso pe sma no de, èn den e du dati na so wan fasi taki sma di e waka pasa no e si a traktaat. Efu dati na a gwenti na ini a gemeente fu yu, dan ten na ten yu kan libi a traktaat Yu wani sabi a piki tapu den aksi disi?, na baka. Te yu e go baka, dan yu kan taki: „Di wi ben de dyaso yu no ben de na oso, èn fu dati ede wi libi a traktaat disi na baka. Tapu sortuwan fu den aksi disi yu ben sa wani kisi piki?”
6. San e meki taki a traktaat Yu wani sabi a piki tapu den aksi disi?, bun fu gebroiki na ini a preikiwroko?
6 A traktaat Yu wani sabi a piki tapu den aksi disi?, e leri sma den tru tori fu Bijbel na wan krin èn makriki fasi. A e hari a prakseri fu sma fu ala bribi nanga kulturu èn a makriki fu pristeri en. Srefi den yonguwan nanga nyun preikiman kan pristeri en. Yu e gebroiki a traktaat disi na ibri okasi di fiti?