Den tijdschrift fu wi skrifi gi difrenti sortu sma
1. Fa a getrow èn koni srafu-grupu e teki na eksempre fu na apostel Paulus?
1 Neleki fa na apostel Paulus ben fiti ensrefi fu man pristeri a bun nyunsu gi „ala sortu sma”, na so a getrow èn koni srafu-grupu e gebroiki den tijdschrift fu wi fu doro sma fu difrenti kulturu nanga bribi (1 Kor. 9:22, 23). Efu wi wani gebroiki A Waktitoren nanga Ontwaakt! bun, dan wi musu hori na prakseri gi suma den tijdschrift disi skrifi.
2. Gi suma Ontwaakt! skrifi?
2 Ontwaakt!: A tijdschrift disi skrifi spesrutu gi den srefi sortu sma di na apostel Paulus ben taki fu den di a ben e taki nanga den „sma fu Ateine” (Tori. 17:22). Den sma dati no ben de Kresten, èn den no ben sabi furu fu den Buku fu Bijbel. Na a srefi fasi, Ontwaakt! skrifi spesrutu gi sma di no sabi furu fu Bijbel noso di no sabi noti fu Bijbel. A kan de so taki den sma disi no sabi noti fu den Kresten leri, kande den no e frutrow kerki, noso den no sabi taki Bijbel kan tyari wini kon gi den. Ontwaakt! skrifi spesrutu fu overtoigi den leisiman taki wan tru Gado de. Boiti dati, a e meki den leisiman abi moro bribi na ini Bijbel èn a e yepi den fu frustan taki Yehovah Kotoigi de tra fasi leki tra kerki grupu.
3. Gi suma A Waktitoren gi a publiki èn A Waktitoren nanga studie-artikel skrifi?
3 A Waktitoren: A Waktitoren gi a publiki, skrifi spesrutu gi sma di abi lespeki gi Gado èn gi Bijbel. Den sma disi sabi wan tu sani fu Bijbel, ma den no e frustan den leri fu Bijbel soifri. Den sma disi de leki den arkiman di Paulus ben kari den wan di „e frede Gado” (Tori. 13:14-16). A Waktitoren nanga studie-artikel skrifi spesrutu gi Yehovah Kotoigi. Paulus ben sabi taki den sma di ben leisi den brifi fu en, ben sabi den Buku fu Bijbel èn den ben abi soifri sabi fu den tru tori di skrifi na ini (1 Kor. 1:1, 2). Na so a de tu taki den artikel na ini A Waktitoren nanga studie-artikel, skrifi gi den sma di e kon na den konmakandra fu wi èn di sabi den wortu di Kotoigi e gebroiki èn a fasi fa den e denki fu sani.
4. Fu san ede wi musu leisi ibriwan fu den tijdschrift di wi e gebroiki na ini a preikiwroko?
4 Aladi wi gwenti fu pristeri A Waktitoren nanga Ontwaakt! makandra, toku a de so nofo tron taki wi e taki fu wán fu den tijdschrift dati nomo. Fu dati ede, du muiti fu leisi ibriwan fu den tijdschrift dati. Na so yu o man sabi sortu tori o hari a prakseri fu den sma di yu e miti.