Yehovah e leri wi fa fu du a wroko disi
1. San Yehovah e du tu te a e gi libisma wan wroko fu du?
1 Te Yehovah e gi sma wan wroko fu du, dan a e gi den a yepi tu di de fanowdu fu man du a wroko dati. Fu eksempre, di Yehovah taigi Noa fu bow wan ark, wan sani di Noa noiti ben du bifo, dan Yehovah taigi en tu fa a ben musu du dati (Gen. 6:14-16). Di a safu-ati skapuman Moses ben kisi a wroko fu go na den owruman fu Israel èn na Farao, dan Yehovah gi en a dyaranti: „Misrefi o yepi yu te yu o taki, èn mi o taigi yu san yu musu taki” (Eks. 4:12). Yehovah sori wi tu fa wi musu du a wroko di a gi wi fu preiki a bun nyunsu. A e leri wi fu du a wroko disi nanga yepi fu a Theokrasia Diniwroko-skoro nanga a Diniwroko Konmakandra. Fa wi kan kisi wini fu a leri disi di a e gi wi?
2. Fa wi kan kisi wini fu a Theokrasia Diniwroko-skoro?
2 A Theokrasia Diniwroko-skoro: Leisi èn studeri den tori na ini a schema, fosi yu kon na den konmakandra. Te yu e si fa den studenti e gebroiki den tori disi na ini den lezing, dan yu o sabi moro bun fa fu gi sma leri (Odo 27:17). Tyari yu Diniwroko-skoro-buku go na a konmakandra èn gebroiki en leki wan leribuku. Te a skoro-opziener e sori go na a buku ibri leisi te wan studenti hori en lezing, dan hari strepi na ondro den prenspari penti di yu wani gebroiki, èn skrifi sani di yu wani gebroiki na seisei fu den bladzijde. Ma a moro bun fasi fu kisi wini fu a skoro disi, na te yu abi wan prati na a skoro. Yu gi yu nen fu hori lezing na a Theokrasia Diniwroko-skoro? Te yu musu hori wan lezing na a skoro, dan sreka yusrefi bun èn gebroiki den rai di yu kisi. Gebroiki den sani di yu leri te yu de na ini a diniwroko.
3. San o yepi wi fu kisi wini fu a Diniwroko Konmakandra?
3 A Diniwroko Konmakandra: Wi sa man memre den rai di wi kisi na a konmakandra disi moro bun, te wi e leisi na fesi san wi o leri, èn te wi e sreka wisrefi fu gi piki. Efu wi e gi syatu piki, dan trawan sa man gi piki tu. Arki bun te den demonstrâsi e hori, èn gebroiki den rai di yu denki taki o yepi yu fu du yu diniwroko moro bun. Te Wi Kownukondre diniwroko abi artikel na ini di kan yepi yu na ini yu diniwroko, dan kibri den so taki yu kan gebroiki den bakaten.
4. Fu san ede wi musu du den sani di Yehovah e leri wi?
4 Neleki fa a ben de nanga a wroko di Noa nanga Moses ben kisi fu du, na so a no makriki gi wi fu preiki a bun nyunsu gi sma na heri grontapu (Mat. 24:14). Wi kan du wi wroko bun te wi e frutrow na tapu Yehovah, wi Gran Leriman, èn te wi e du den sani di a e leri wi.—Yes. 30:20.