Gi sma deki-ati fu gebroiki bijbel

A SANI di wi wani na fu poti a prakseri fu ibri sma na Gado Wortu, Bijbel. A boskopu di wi e preiki, komoto fu a santa buku dati, èn wi wani ala sma fu frustan taki den sani di wi e taki, no komoto fu wisrefi, ma den komoto fu Gado. Sma musu leri fu frutrow na ini Bijbel.

Na ini a preikiwroko. Te yu e sreka yusrefi gi a preikiwroko, dan ala ten teki wán noso tu tekst, èn taki fu dati nanga den sma di wani arki yu. Srefi efu yu abi na prakseri fu pristeri buku noso tijdschrift èn fu no meki en langa, toku furu tron, a moro bun fu leisi wan bijbeltekst di fiti gi na okasi dati. Bijbel abi furu krakti, moro leki iniwan sani di wisrefi kan taki, èn a kan sori sma di de leki skapu, san den musu du. Pe yu no man leisi langalanga fu Bijbel, dan yu kan fruteri wan sani di skrifi na ini Bijbel. Na ini a fosi yarihondro, den bukulolo fu Bijbel no ben de fu feni na ala presi. Toku, Yesus nanga den apostel fu en, ben fruteri furu tron san skrifi na ini den Buku fu Bijbel. Wisrefi sa musu meki furu muiti fu memre san skrifi na ini den bijbeltekst èn wi musu gebroiki den na ini a preikiwroko te a fiti. Sontron wi kan fruteri nomo san skrifi drape.

Te yu kisi na okasi fu leisi komoto fu Bijbel, dan hori a Bijbel na so wan fasi taki na ososma kan luku makandra nanga yu na ini a Bijbel te yu e leisi. Efu na ososma e leisi tu na ini en eigi Bijbel, dan dati kan gi en moro deki-ati fu du wan sani.

Ma yu musu sabi taki son sma di poti Bijbel abra go na ini wan tra tongo, poti wan tu fu den eigi prakseri na ini Gado Wortu. A fasi fa den vertaal wan tu sani, kande no e kruderi nanga den sani di ben de na ini den fosi tongo di sma gebroiki fu skrifi Bijbel. Wan tu sma di vertaal Bijbel na ini a ten disi, puru a nen fu Gado na ini Bijbel. Den no sori krinkrin san e pasa nanga den dedewan soleki fa dati skrifi na ini den fosi tekst, èn den no sori soifri san Bijbel e taki fu den sani di Gado abi na prakseri nanga grontapu. Efu yu wani sori wan sma san trawan du na ini den Bijbel dati, dan kande yu musu teki prenspari tekst èn luku san skrifi na ini wan tu tra Bijbel, noso kande yu musu luku san skrifi na ini den fosi Bijbel fu a srefi tongo dati. Yu kan gebroiki a buku Redeneren aan de hand van de Schrift fu sori fa difrenti Bijbel vertaal prenspari wortu. Iniwan sma di lobi waarheid, sa de nanga tangi na ati fu kon sabi den tru tori disi.

Na den gemeente konmakandra. Ala sma musu kisi a deki-ati fu gebroiki den Bijbel tapu den gemeente konmakandra. Wan tu sani de di e meki taki disi na wan bun sani fu du. A e yepi den arkiman fu tan kaka yesi arki a tori di a takiman e taki nanga den. A e meki taki den arkiman no e yere nomo, ma den e si tu na ini den eigi Bijbel san a takiman e leri den. Èn a e yepi den sma di nyun tapu a konmakandra, fu frustan krinkrin taki ala sani di wi e bribi, trutru komoto fu Bijbel.

Efu den arkiman fu yu sa leisi makandra nanga yu na ini den eigi Bijbel, e anga furu fu a deki-ati di yu e gi den. Wan fu den moro bun fasi fu gi den a deki-ati dati, na fu aksi den langalanga fu luku makandra nanga yu san skrifi na ini Bijbel.

Na yu leki takiman musu teki a bosroiti tapu sortu tekst yu wani poti krakti. Disi yu kan du, fu di yu e aksi den arkiman fu luku den tekst dati na ini den Bijbel. A moro bun te yu e leisi bijbeltekst di sa yepi yu fu tyari den moro prenspari sani kon na fesi. Baka dati, efu ten de ete, dan kari wan tu tra tekst di e horibaka gi den sani di yu taki.

A no de fu taki, dati furu tron a no nofo fu kari a bijbeltekst nomo, noso fu gi den arkiman a kari fu leisi a tekst. Efu yu e leisi wan tekst, èn baka dati yu e go leisi wan tra tekst bifo den arkiman kisi a ten fu kaba leisi a fosiwan, dan den sa lasi-ati gawgaw èn den sa tapu fu leisi nanga yu na ini den Bijbel. Sobun, luku san den e du. Te furu fu den arkiman feni a tekst kaba, dan yu musu leisi a tekst.

Prakseri na fesi san kan pasa. Taki sortu tekst yu wani leisi, bifo yu e leisi a tekst srefi. Disi sa meki taki yu no sa lasi so furu ten te yu musu wakti den arkiman fu feni a tekst. Aladi yu no sa abi so furu ten fu taki fu tra sani efu yu e gi den arkiman ten fu suku a tekst, toku den sa kisi furu wini te yu du dati.