Feifi sani di yu kan du fu feni wan Bijbelstudie
1. Efu a muilek fu feni wan Bijbelstudie na ini wi kontren, dan san wi musu du èn fu san ede?
1 Yu e feni en muilek fu feni wan sma di yu kan studeri Bijbel nanga en? Tan du muiti fu feni wan Bijbelstudie. Yehovah e blesi den sma di e tan horidoro fu du en wani (Gal. 6:9). Luku feifi sani di kan yepi yu.
2. San wi kan du fu bigin wan Bijbelstudie wantewante?
2 Aksi a sma wantewante efu a wani studeri: Furu sma sabi taki wi e pristeri A Waktitoren nanga Ontwaakt!, ma kande den no sabi taki wi e aksi sma fu studeri Bijbel nanga den. Fu san ede yu no e aksi a sma wantewante efu a wani studeri Bijbel, te yu e go oso fu oso? Yu kan aksi sma di wani sabi moro tu efu den ben o wani wan Bijbelstudie. Efu den no wani, yu kan tan tyari den publikâsi gi den so taki den o wani sabi moro nanga moro. Wan brada ben gwenti tyari den nyun tijdschrift gi wan trowpaar wan tu yari kaba. Wan leisi di a libi den moro nyun tijdschrift gi den èn a ben de fu gowe, a kisi a prakseri fu aksi den: „Unu ben o wani studeri Bijbel?” A ben fruwondru fu yere taki a trowpaar ben wani. Now den tu sma disi dopu.
3. Fruteri fu san ede wi no musu denki taki ala den sma di e kon na den konmakandra e studeri Bijbel kaba.
3 Den sma di e kon na den konmakandra: No denki taki ala den sma di e kon na den gemeente konmakandra e studeri Bijbel kaba. Wan brada e taki: „Moro leki afu fu ala den studie di mi ben abi, mi ben bigin fu di mi taki nanga den di den kon na den konmakandra.” Wan sisa ben go na wan uma di ben syensyen èn di abi tu dopu umapikin na ini a gemeente. Na uma ben e kon 15 yari kaba na den konmakandra èn ala ten a ben kon ini a zaal te a konmakandra ben bigin èn a ben gowe wantewante baka a konmakandra. Na uma ben wani studeri èn te fu kaba a tron wan Kotoigi. A sisa skrifi: „A e hati mi nomo taki mi wakti 15 yari langa fosi mi aksi en efu a wani studeri!”
4. Fa wi kan feni wan Bijbelstudie?
4 Aksi a sma efu a sabi trawan di wani studeri: Wan sisa e du muiti fu go nanga trawan na den Bijbelstudie. Efu a preikiman di abi a studie wani dati, dan a sisa e aksi a studenti na a kaba fu a studie efu a sabi wan sma di ben o wani studeri. Te yu e pristeri a Bijbel leri-buku na wan gobaka, dan yu kan aksi en: „Yu sabi wan sma di ben o wani abi a buku disi tu?” Son leisi, a e pasa taki preikiman nanga pionier no man studeri nanga wan sma di den e miti na ini a preikiwroko. Sobun, taigi tra preikiman taki yu o man hori wan Bijbelstudie.
5. Fu san ede wi kan aksi a trowpatna di no de na bribi efu a wani studeri Bijbel?
5 Trowpatna di no de na bribi: Preikiman de na ini yu gemeente di trow nanga wan sma di no de na bribi? Son sma di no de na bribi no wani taki fu Bijbel nanga den trowpatna di de wan Kresten, ma den ben o wani studeri nanga wan sma di no de na ini den osofamiri. Nofo tron a moro bun fu taki fosi nanga a masra noso a wefi di de na bribi, bifo yu e go aksi a patna di no de na bribi efu a wani studeri. Na so fasi yu o man sabi san na a moro bun fasi fa yu kan aksi a sma efu a wani studeri.
6. O prenspari a de fu begi te yu wani feni wan Bijbelstudie?
6 Begi: No denki taki begi no o man yepi yu (Yak. 5:16). Yehovah e pramisi wi taki a o arki wi te wi e aksi en sani di e kruderi nanga a wani fu en (1 Yoh. 5:14). Wan brada di no ben abi furu ten bigin begi fu abi wan Bijbelstudie. En wefi ben aksi ensrefi efu a ben o abi ten gi wan studenti, spesrutu efu a studenti abi furu problema. Fu dati ede a wefi ben taigi Yehovah a sani disi te a ben begi gi en masra fu feni wan Bijbelstudie. Gado ben arki den begi fu den. Sowan tu wiki baka dati, wan pionier fu a gemeente ben miti wan man di ben wani studeri èn a pionier ben gi a brada disi a Bijbelstudie. A wefi skrifi: „Iniwan sma di denki taki a o hebi tumusi gi en fu hori wan Bijbelstudie, mi e taigi disi: Aksi finifini san yu wani na ini begi èn tan begi fu a tori. A sani disi gi wi moro prisiri leki san wi ben denki.” Te yu e horidoro, dan yu srefi kan feni wan Bijbelstudie èn yu kan abi a prisiri tu fu yepi wan sma fu kon na tapu a pasi „di e tyari sma go na libi”.—Mat. 7:13, 14.