Fa wi kan kisi wini fu a preikiwroko grupu pe wi de?
1. Sortu wini fu a Gemeente Bukustudie wi kan kisi te now ete na a preikiwroko grupu pe wi de?
1 Yu e misi wan tu sani fu a Gemeente Bukustudie? Fu di a bukustudie grupu ben de moro pikin èn a presi pe a ben hori ben meki en moro makriki fu meki mati, meki dati ben yepi wi fu tan abi wan tranga bribi (Odo 18:24). A bukustudie-opziener ben kon sabi a situwâsi fu ibriwan fu wi èn a ben man gi wi a deki-ati di wi abi fanowdu (Odo 27:23; 1 Petr. 5:2, 3). Den wini disi wi kan kisi te now ete na a preikiwroko grupu pe wi de.
2. Fa wi kan du muiti fu tron bun mati fu trawan na ini wi preikiwroko grupu so taki wi kan gi makandra deki-ati?
2 Du muiti fu kon sabi trawan: Nofo tron den preikiwroko grupu bigi a srefi leki fa den bukustudie grupu ben de. Wi kan tron bun mati fu trawan te wi e wroko „sei na sei” nanga den na ini a preikiwroko (Fil. 1:27). Nanga omeni sma na ini yu grupu yu wroko kaba? Yu kan ’opo yu ati moro’ fu wroko nanga tra sma? (2 Kor. 6:13) Wanwan leisi wi kan aksi wan sma fu wi grupu fu kon na a Osofamiri Anbegi fu wi noso fu kon nyan nanga wi. Na ini son gemeente, ibri wiki wan tra preikiwroko grupu e sreka wan nyanyan gi a takiman di e kon hori wan lezing. Te wan grupu musu sreka wan nyanyan na ini wan fu den wiki, dan ala sma na ini a grupu e kon makandra fu nyan èn fu gi makandra deki-ati, srefi efu a takiman no man de drape nanga den.
3. Sortu okasi wi abi na ini wi preikiwroko grupu, fu kisi deki-ati fu den brada di e luku den skapu?
3 Aladi a gemeente e kon makandra tu leisi wan wiki nomo, toku disi no wani taki dati den owruman no abi fu luku den preikiman so furu moro. Na ini ibri grupu yu abi grupu-opziener di musu gi ibri sma deki-ati èn leri den fa fu du a preikiwroko moro bun. Efu a grupu-opziener fu yu no wroko ete nanga yu na ini a preikiwroko, dan yu kan aksi en fu wroko nanga en. Boiti dati, ibri mun a dienst-opziener e go wan leisi tapu satra nanga sonde makandra nanga wan tra grupu na ini a preikiwroko. Na ini pikin gemeente pe wan tu preikiwroko grupu nomo de, a kan seti sani fu go tu leisi wan yari na ibri grupu. Yu e seti sani so taki yu kan go na ini a preikiwroko te a de na ini yu grupu?
4. (a) Fa den preikiwroko konmakandra seti? (b) Fu san ede wi musu luku efu preikiwroko konmakandra kan hori na wi oso?
4 A moro bun efu den grupu no e miti na a srefi presi gi a preikiwroko konmakandra tapu satra nanga sonde. Te difrenti presi de pe a preikiwroko konmakandra e hori na a srefi ten, dan dati e meki en moro makriki gi den preikiman fu go na den preikiwroko konmakandra èn na a kontren pe den musu wroko. A brada kan seti sani moro esi èn den preikiman o man go wantewante na ini a kontren pe den musu wroko. A moro makriki tu gi a grupu-opziener fu poti prakseri na ibriwan fu den sma na ini en grupu. Ma na ini son situwâsi a kan de moro bun taki tu noso moro grupu e moksi nanga makandra. Son leisi a heri gemeente e kon makandra gi a preikiwroko tapu a fosi satra fu a mun noso baka a Waktitoren-studie. Na ini den situwâsi dati a moro bun taki ibri grupu e sidon makandra èn den grupu-opziener o abi wan tu miniti fu seti den grupu fu den fosi den tapu a preikiwroko konmakandra nanga wan begi.—Luku a faki „Konmakandra kan hori na yu oso?”
5. Aladi wi no e hori a Gemeente Bukustudie moro, toku san wi sabi seiker?
5 Aladi wi no e hori a Gemeente Bukustudie moro, toku Yehovah e tan sorgu taki wi abi ala sani di de fanowdu fu du a wani fu en (Hebr. 13:20, 21). Yehovah e sorgu bun gi wi èn wi no e mankeri noti (Ps. 23:1). Wi kan kisi furu blesi fu den preikiwroko grupu fu wi. Efu wi e du muiti fu „sai bogobogo”, dan wi „o koti bogobogo tu”.—2 Kor. 9:6.
[Faki na tapu bladzijde 6]
Konmakandra kan hori na yu oso?
Na ini son gemeente, difrenti grupu musu moksi gi a preikiwroko konmakandra tapu satra nanga sonde, fu di nofo oso no de pe den kan hori a konmakandra dati. Den preikiwroko konmakandra na wan seti fu a gemeente, èn fu dati ede a de wan bigi grani te a konmakandra dati e hori na wi oso. Preikiwroko konmakandra kan hori na yu oso? No denki taki dati no kan fu di yu no abi wan kefalek oso. Den owruman o luku efu a kontren pe yu oso de bun fu hori den konmakandra èn den o luku tra sani tu neleki te den ben luku fosi pe bukustudie ben kan hori. Efu yu ben o wani taki preikiwroko konmakandra hori na yu oso, dan taigi a grupu-opziener fu yu.