Meki den arkiman leri wan sani fu yu

EFU yu wani taki yu arkiman musu leri wan sani fu yu, dan yu sa musu du moro leki fu taki wan kefalek bun tori nomo. Aksi yusrefi: ’Fu san ede den arkiman disi musu yere a tori disi? San mi sa taki so dati den arkiman sa firi taki den kisi trutru winimarki fu a takimakandra?’

Efu yu musu hori wan demonstrâsi tapu a skoro pe yu sa sori fa fu preiki gi wan sma, dan na ososma fu yu na yu arkiman. Te yu e hori tra prati tapu a skoro, dan kande yu sa musu taki nanga a heri gemeente.

San yu arkiman sabi. Aksi yusrefi: ’San den arkiman sabi fu a tori?’ Efu yu kon sabi san den sabi kaba, dan gebroiki dati fu bigin nanga yu lezing. Efu yu e taki nanga wan gemeente pe furu lepi Kresten de, dan no kari den prenspari sani fu waarheid nomo di furu fu den sabi kaba. Ma go taki moro dipi fu den prenspari sani disi. A no de fu taki, dati efu furu nyunwan e arki yu tu, dan yu musu prakseri san ala den tu grupu disi abi fanowdu.

Efu yu kon sabi sortu sani yu arkiman sabi kaba, dan dati musu meki yu taki moro gaw noso moro slow. Efu yu e taki fu wan tu finifini tori di furu fu den sabi kaba, dan taki pikinso gaw fu den tori disi. Ma taki moro slow te yu e taki fu sani di kan de nyun sani gi furu fu den arkiman, so taki den kan frustan den sani disi heri bun.

San yu kan taki fu leri den wan sani. Fu leri tra sma wan sani, no wani taki dati ala ten yu musu taki wan nyun sani. Son takiman e taki fu tori di furu sma sabi kaba, ma den e du dati na so wan makriki fasi, taki gi furu fu den arkiman a de a fosi tron taki den e frustan a tori so kefalek bun.

Na ini a preikiwroko, a no nofo fu kari wan sani di ben de na ini a nyunsu, fu sori taki wi e libi na ini den lasti dei. Gebroiki Bijbel fu sori san a nyunsu dati wani taki. Disi sa de wan sani di trutru sa leri na ososma wan sani. Na so a de tu, te yu ben o taki fu den wet di Gado poti gi sani soleki son, mun, nanga stari, noso te yu ben o taki fu den prani noso fu a libi fu den meti, dan yu no musu du dati nomo fu fruteri wan kefalek moi sabidensi tori di na ososma no yere noiti ete. Na presi fu dati, yu musu wani sori a sma fa den buweisi di wi e si na ini den sani di Gado meki de soifri leki den sani di skrifi na ini Bijbel, èn moksi den tu sani disi fu sori taki wan Mekiman de di lobi wi. Disi sa yepi na ososma fu si a tori na wan fasi fa a no ben si en ete.

Te yu musu taki fu wan tori di den arkiman yere furu tron kaba, dan a kan de wan problema. Ma efu yu wani de wan bun leriman, dan yu musu leri fa fu du disi bun. Fa yu kan du disi?

Te yu e ondrosuku a tori moro fara, dan kande disi kan yepi yu. Na presi fu taki na ini yu lezing fu wan tu tru tori nomo di yu e memre, dan gebroiki den wrokosani fu ondrosuku a tori moro fara soleki fa dati de fu feni na tapu bladzijde 33 teleki 38. Prakseri fu den rai drape di e sori yu sortu sani yu musu pruberi fu doro. Te yu e ondrosuku a tori, dan kande yu sa feni wan sani di ben pasa fositen èn di furu sma no sabi, ma di abi langalanga fu du nanga a tori fu yu. Noso kande yu feni wan sani di wan sma taki na ini a nyunsu, èn di yu sa man gebroiki leki eksempre fu sori san na a sani di yu wani taki.

Te yu e ondrosuku a tori, dan yusrefi musu denki moro fara fu a tori tu fu di yu e poti aksi gi yusrefi soleki san? fu san ede? o ten? pe? suma? nanga fa? Fu eksempre: Fu san ede disi de tru? Fa mi kan sori taki a sani disi tru? San na den pôpi sani di furu sma e bribi èn di e meki en tranga gi den fu frustan a tru tori disi fu Bijbel? Fu san ede a de prenspari? Fa a sani disi musu abi krakti tapu a libi fu wan sma? San na wan eksempre di e sori taki a bun fu fiti disi na ini wi libi? San a tru Bijbel tori disi e sori fu Yehovah? Efu a e fiti na ini a tori fu yu, dan kande yu kan aksi yusrefi wan tu tra sani tu: O ten a sani disi pasa? Fa wi kan gebroiki a tori disi bun na ini a ten disi? Kande yu kan hori a lezing nanga moro faya fu di yu e poti wan tu fu den aksi disi èn e piki den tu te yu e hori a lezing.

Te yu e hori yu lezing, dan kande yu sa musu gebroiki bijbeltekst di yu arkiman sabi kaba. San yu kan du fu meki den arkiman leri wan sani fu den bijbeltekst disi? No leisi den tekst wawan, ma tyari den kon na krin tu.

Te yu e taki fu wan tekst, dan kande den arkiman sa man leri moro fu a tekst te yu e taki fosi fu wán pisi, èn baka dati yu e taki fu a tra pisi fu a tekst. Yu kan teki den pisi di abi fu du nanga a nen fu yu lezing, èn tyari den kon na krin gi den arkiman. Prakseri san yu kan du nanga wan tekst soleki Mika 6:8. San na „retidu”? Fu a retidu fu suma den e taki drape? Sortu eksempre yu ben sa kan gi fu sori san a wani taki fu ’du retidu’? Noso sortu eksempre yu ben sa kan gi fu sori san a wani taki „fu lobi sari-ati”? San na sakafasi? Fa yu ben sa gebroiki a tori disi gi wan owru sma? A no de fu taki, dati den sani di yu o gebroiki te fu kaba sa musu de sani di abi fu du nanga a nen fu yu lezing, a marki di yu wani doro, den arkiman fu yu, èn nanga a ten di yu abi gi a tori fu yu.

Furu tron yu kan yepi den arkiman fu leri wan sani te yu e fruklari soifri san wan tu wortu wani taki. Wan tu sma e fruwondru te den e leri san a „kownukondre” wani taki soleki fa dati skrifi na Mateyus 6:10. Efu yu taki soifri san wan wortu wani taki, dan yu kan yepi wan Kresten srefi di de langa kaba na ini a waarheid, fu a si moro krin san a tekst e taki trutru. Disi de krin fu si te wi e leisi 2 Petrus 1:5-8 èn baka dati e taki moro soifri fu den difrenti sani di kari na ini den vers dati, soleki: bribi, bunfasi, sabi, a dwengi di wan sma e dwengi ensrefi, horidoro, dini Gado na wan getrow fasi, brada-lobi, nanga lobi gi ala sma. Te a gersi leki wan tu wortu wani taki a srefi sani èn te den wortu disi de na ini a srefi pisi di yu e tyari kon na fesi, dan yu kan taki moro soifri san ibriwan fu den wortu disi wani taki. Te yu e du disi, dan yu kan yepi trawan fu si taki toku den wortu disi e difrenti fu makandra pikinso. Dati de tru nanga den wortu soleki koni, sabi, a koni fu si sani krin, nanga frustan, soleki fa dati skrifi na Odo 2:1-6.

Den arkiman fu yu sa man leri wan sani fu yu tu, efu yu e taki-go-taki-kon fu wan tekst. Furu sma e fruwondru te den e kon frustan taki son Bijbel e taki na Genesis 2:7 dati Adam na wan libi sili, èn dati soleki fa Esekièl 18:4 e taki, a sili e dede. Na wan okasi, dan Yesus ben du wan sani di den Saduseisma no ben denki taki a ben o du. Den Saduseisma ben taki dati den ben bribi san skrifi na Exodus 3:6. Sobun, Yesus ben sori go na a tekst disi, èn baka dati a gebroiki a tekst fu sori den taki den dedewan sa opo baka.​—Luk. 20:37, 38.

Sontron den arkiman kan leri wan sani tu te yu e sori den san skrifi na ini den vers lontu a bijbeltekst di yu e kari, noso san ben pasa na a ten di a tekst dati ben skrifi. Yu kan sori tu suma na a sma di e taki drape noso suma na a arkiman drape. Den Fariseiman ben sabi Psalm 110 heri bun. Toku, Yesus ben meki den poti prakseri na wan prenspari pisi di de fu feni na ini a fosi vers. A ben aksi den: „’San unu e denki fu Krestes? Suma manpikin na en?’ Den taigi en: ’Fu David.’ A taigi den: ’Dan fa a kan taki santa yeye ben meki David kari en „Masra”, di a ben taki: „Yehovah ben taigi mi Masra: ’Sidon na mi reti-anusei, teleki mi poti yu feanti na ondro yu futu’”? Fu dati ede, efu David e kari en „Masra”, dan fa a kan de en manpikin?’” (Mat. 22:41-45) Te yu e taki-go-taki-kon fu den Buku fu Bijbel soleki fa Yesus ben du dati, dan yu sa yepi sma fu leisi Gado Wortu moro bun.

Te wan takiman e fruteri o ten wan Bijbel buku ben skrifi, noso o ten wan spesrutu sani ben pasa, dan a musu fruteri tu fa sani ben de na a ten dati. Na a fasi dati, den arkiman sa frustan moro bun o prenspari a buku de noso o prenspari a sani de di ben pasa.

Te yu e teki sani gersi makandra, dan dati kan yepi tu fu meki yu arkiman leri wan sani fu yu. Kande yu kan sori fa furu sma e denki fu wan sani, èn teki dati fu sori fa Bijbel e taki heri tra fasi fu a srefi sani dati. Noso kande yu kan teki tu Bijbel tori di gersi makandra. Difrenti de na mindri den tori disi? Fu san ede? San wi kan leri fu disi? Efu yu e du dati, dan den arkiman kan si a tori na wan fasi fa den no ben si en ete.

Efu yu musu taki fu wan spesrutu sani fu wi Kresten diniwroko, dan yu kan meki a lezing fu yu moro moi efu yu e bigin taki syatu fu ala den sani di abi fu du nanga wi Kresten diniwroko. Taki fu den sani di wi musu du, fu san ede wi musu du en, èn fa a abi fu du nanga den sani di wi wani doro te fu kaba leki Yehovah Kotoigi. Baka dati, dan yu musu fruteri krinkrin pe wi musu du a wroko disi, o ten wi musu du en, èn fa wi musu du en.

San yu kan du te yu musu taki fu „den dipi sani fu Gado” na ini yu lezing? (1 Kor. 2:10) Efu yu e bigin kari prenspari penti fu a tori di yu o taki èn efu yu e bigin tyari den kon na krin, dan den arkiman sa frustan yu moro bun te yu e taki fu den moro finifini tori tu. Èn efu na a kaba fu yu lezing, yu e fruteri syatu, ma soifri, san yu ben taki na ini yu lezing, dan den arkiman fu yu sa firi trutru taki den leri wan sani fu yu.

Rai di e yepi wi fu libi leki Kresten. Den arkiman fu yu sa nyan bun spesrutu efu yu e yepi den fu si fa den sani di yu taki na ini yu lezing, e fiti na ini a libi fu den. Te yu e ondrosuku den bijbeltekst na ini a prati di yu kisi, dan yu musu aksi yusrefi: ’Fu san ede a tori disi tan na ini Bijbel teleki now?’ (Rom. 15:4; 1 Kor. 10:11) Prakseri den sani di e miti yu arkiman na ini a libi fu den. Luku fa den rai nanga gronprakseri fu Bijbel kan yepi den. Na ini yu lezing, dan yu musu taki-go-taki-kon fu san skrifi na ini Bijbel fu sori wan sma sortu koni sani a kan du te den sani disi e miti en. Pruberi fu no taki sani frafra. Ma taki fu spesrutu sani di wan sma musu du èn fa a musu tyari ensrefi.

Efu yu wani pruberi fu du san skrifi na ini a les disi, dan kande yu kan bigin fiti wán noso tu fu den rai di skrifi tapusei, èn gebroiki dati gi wan lezing di yu e sreka nownow. Te yu e kisi moro ondrofeni, dan gebroiki moro fu den rai disi. Bakaten yu sa si taki den arkiman sa wani yere den lezing fu yu, fu di den de seiker taki den sa yere wan sani di trutru den sa nyan bun fu dati.