MWBR17 09 Verwijzing gi Wi Kresten libi nanga a preikiwroko studie-buku
4-10 SEPTEMBER
GUDU NA INI GADO WORTU | ESEKIÈL 42-45
„A tru anbegi seti baka!”
(Esekièl 43:10-12) Manpikin fu libisma, yu musu fruteri den Israelsma fa a tempel de. Dan den o firi syen taki den sondu. Meki den luku den papira pe skrifi finifini o bigi a tempel de. 11 Efu den e syen fu ala den sani di den du, dan yu musu meki den kon sabi fa a tempel meki. Sori den fa a tempel seti. Sori den pe den doro de fu go na dorosei èn fu kon na inisei. Skrifi finifini gi den fa a tempel meki èn san den gebroiki fu meki en. Taigi den ala den wèt di abi fu du nanga a tempel, so taki den kan poti prakseri na den. Meki den kon sabi den wèt disi, so taki den kan du ala sani di skrifi na ini den wèt.12 Disi na a wèt di abi fu du nanga a tempel: A heri kontren lontu a tempel di de na tapu a bergi-ede, santa srefisrefi. Iya, disi na a wèt di abi fu du nanga a tempel.
it-2-O 1008 ¶2
Tempel
A fisyun di Esekièl kisi fu a tempel. Na ini 593 F.K., a di fu 14 yari baka di Yerusalem kisi pori makandra nanga a tempel fu Salomo, a yeye fu Yehovah meki a profeiti Esekièl kisi wan fisyun pe a tyari en go na a ede fu wan hei bergi. Na ini a fisyun Esekièl si wan bigi tempel fu Yehovah (Ese 40:1, 2). Fu meki den Dyu ini katibo firi syen èn fu meki den sori berow, Esekièl ben musu „fruteri den” ala san a si. A no de fu taki dati reti-ati Dyu ben o kisi trowstu tu te den ben yere san Esekièl taki (Ese 40:4; 43:10, 11). A man na ini a fisyun ben e marki sani finifini. A markitiki di a ben gebroiki ben de na „èl” (wan langa èl na 3 m nanga 11 cm) nanga a bradi fu wan anu (51.8 cm) (Ese 40:5, futuwortu). Fu di ala sani fu a tempel ben marki finifini, meki son Dyu ben denki taki a tempel disi ben de leki eksempre gi a tempel di Serubabel bow baka di den Dyu komoto na ini katibo. Ma buweisi no de di e sori efu disi de so trutru.
Diki moro dipi
(Esekièl 43:8, 9) Den ben meki a doromofo fu den leti na sei a doromofo fu mi oso. Boiti dati, den ben meki a doropostu fu den leti na sei a doropostu fu mi oso. Na soso a skotu fu a tempel ben de na mindri mi nanga den. Den pori mi santa nen nanga den tegu sani di den ben e du. Dati meki mi kiri den, fu di mi ati ben bron nanga den. 9 Den no musu du hurudu moro èn den musu puru den dedeskin fu den kownu fu den èn poti den farawe fu mi. Dan mi o tan na den mindri fu ala ten.
it-2-O 385 ¶2
Nen
Fu di Israel, a pipel fu Gado di ben e tyari en nen, no ben e hori densrefi na den bun wet di Gado ben gi den, meki den pori Gado nen (Ese 43:8; Am 2:7). Gado ben strafu den Israelsma fu di den ben trangayesi en. Disi ben meki tu taki den tra pipel no ben e lespeki Gado nen. (Luku Ps 74:10, 18; Yes 52:5.) Den pipel disi no ben si taki na strafu Yehovah ben e strafu Israel. Den ben denki taki na fu di Yehovah no man kibri en pipel, meki ogri ben e miti den now. Fu di Yehovah ben wani krin en nen, meki a tyari den Dyu di ben sori berow go baka na ini den kondre.—Ese 36:22-24.
(Esekièl 45:9, 10) Disi na san a Moro Hei Masra Yehovah taki: ’Un edeman fu Israel, un musu tapu nanga den sani di unu e du!’ ’Un no musu du ogri moro èn un no musu fufuru sani fu a pipel, ma un musu du san reti èn san bun. Un no musu puru gron na a anu fu mi pipel moro’, na so a Moro Hei Masra Yehovah taki. 10 ’Un musu gebroiki wegi di soifri. Den bigi baki nanga den bigi emre di unu e gebroiki fu marki sani, musu de soifri tu.
it-1-O 795
Retidu
Fu dati ede Yehovah abi a reti fu fruwakti taki ala sma di wani taki a prisiri nanga den, musu kon sabi a retidu fu en èn den musu du san reti tu (Yes 1:17, 18; 10:1, 2; Yer 7:5-7; 21:12; 22:3, 4; Ese 45:9, 10; Am 5:15; Mik 3:9-12; 6:8; Sak 7:9-12).
11-17 SEPTEMBER
GUDU NA INI GADO WORTU | ESEKIÈL 46-48
Diki moro dipi
(Esekièl 47:6) Ne a man taigi mi: „Manpikin fu libisma, yu si a sani disi?”Dan a meki mi waka na ini a watra fu drai go baka na a syoro fu a liba.
it-2-O 1375
Manpikin fu libisma
Na ini den Hebrew Buku fu Bijbel den wortu disi de fu feni moro furu na ini a buku Esekièl. Drape Gado e kari a profeiti „manpikin fu libisma” 90 leisi (Ese 2:1, 3, 6, 8). Den wortu disi e sori taki a profeiti na wan libisma nomo. Den e sori taki Esekièl lagi moro a sma di gi en a boskopu fu en, a Moro Hei Gado. Bijbel e gebroiki den srefi wortu disi gi a profeiti Danièl na Danièl 8:17.
25 SEPTEMBER–1 OKTOBER
Diki moro dipi
(Danièl 5:17) Ne Danièl piki Kownu: „Kownu, yu kan hori den kado fu yu èn yu kan gi tra sma den presenti. Ma mi o leisi gi Kownu san skrifi dyaso èn mi o fruteri Kownu san a wani taki.
(Danièl 5:29) Ne Belsasar taigi sma fu weri diri redi krosi gi Danièl èn fu anga wan gowtu keti na en neki. Baka dati den meki bekènti taki boiti den tu sma di ben de tiriman fu a kondre kaba, Danièl ben o de a di fu dri tiriman na ini a kownukondre.
w88-O 1/10 30 ¶3-5
Aksi fu leisiman
Di sma tyari a Hebrewman Danièl kon inisei te fu kaba, a kownu taigi sma fu weri diri redi krosi gi Danièl, fu anga wan gowtu keti na en neki èn fu meki a tron a di fu dri tiriman na ini a kownukondre. A profeiti piki na wan lespeki fasi: „Kownu, yu kan hori den kado fu yu èn yu kan gi tra sma den presenti. Ma mi o leisi gi Kownu san skrifi dyaso èn mi o fruteri Kownu san a wani taki.”—Danièl 5:17.
Sobun, a kownu no ben abi fu gi Danièl wan tyuku noso pai en fu a fruteri en san ben skrifi na tapu a skotu. A kownu ben kan hori den kado fu en noso a ben kan gi wan tra sma den. Danièl ben o fruteri en san skrifi na tapu a skotu. A no ben o du dati fu di a ben wani kisi pai, ma a ben o du en fu di Yehovah, a tru Gado di ben o strafu Babilon heri esi, ben gi en a koni fu man du dati.
Soleki fa wi e leisi na Danièl 5:29, dan baka di Danièl leisi san skrifi na tapu a skotu èn a fruteri a kownu san a wani taki, dan a kownu taigi sma fu gi Danièl den kado. A no Danièl srefi weri den krosi nanga a keti. Na Kownu Belsasar, a makti tiriman, ben taigi sma fu du dati. Ma disi no e sori taki Danièl no hori ensrefi na san skrifi na Danièl 5:17, pe a ben sori taki a no e suku gudu gi ensrefi.