Fa fu bigin wan takimakandra nanga wan traktaat

Sensi yanuari 2018, a Studie-buku fu wi abi na artikel „Eksempre fa fu hori wan takimakandra”. Wi kisi deki-ati fu abi takimakandra nanga sma na presi fu prati buku nomo. Den felem di e sori fa fu hori wan takimakandra, yepi preikiman fu du sani tra fasi. Den yepi wi fu gebroiki soso wi Bijbel fu bigin wan takimakandra. Ma disi wani taki dati wi no musu prati buku noso tra sani te wi e preiki oso fu oso? Nôno! Fu eksempre, wi kan gebroiki traktaat fu bigin wan takimakandra. Fa wi kan du dati? Luku san kan yepi yu:

1. Gebroiki na aksi nanga den dri piki na fesisei fu a traktaat.

2. Sori a sma a piki di Bijbel e gi na tapusei fu a di fu tu bladzijde. Efu ten de ete, dan leisi èn taki fu wan tu fu den sani di skrifi na ini a traktaat.

3. Gi a sma a traktaat èn gi en deki-ati fu leisi en go doro te a abi ten.

4. Fosi yu gowe, sori a sma na aksi di skrifi na a pisi „Prakseri fu a sani disi” èn seti sani fu go baka fu taki fu a piki di Bijbel e gi.

Te yu go baka, dan taki fu a piki èn libi wan tra aksi gi a sma fu taki fu en wan tra leisi. Yu kan gebroiki wan aksi fu a website fu wi, noso fu a buku di kari na bakasei fu a traktaat. Te a fiti fu du dati, dan sori a sma a brochure Gado abi bun nyunsu gi wi! noso wan tra buku di wi e gebroiki fu studeri nanga sma. Luku na ini a Teaching Toolbox sortuwan fu den ben o bun gi a sma.