Gebroiki agersitori fu gi leri

Mateyus 13:34, 35

SAN YU MUSU DU: Gebroiki makelek agersitori di o hari a prakseri fu yu arkiman èn di o leri den prenspari sani. Disi o yepi yu fu de wan bun leriman.

FA YU KAN DU DISI:

• Gebroiki makelek agersitori. Yesus ben e gebroiki sani di sma sabi fu fruklari prenspari leri fu Bijbel èn a ben e gebroiki makelek sani fu meki sma frustan muilek tori. Wi kan du a srefi. No taki fu tumusi furu sani di o meki na agersitori kon moro muilek. Sorgu taki na agersitori di yu e gebroiki e fiti a sani di yu wani leri den arkiman. Efu dati no de so, dan yu kan bruya den arkiman.

• Prakseri den arkiman fu yu. Te yu e gebroiki agersitori, dan taki fu sani di den arkiman fu yu lobi èn di den gwenti du. Luku bun taki yu no e taki fu sani di o meki den firi syen noso di o meki den atibron.

• Gebroiki agersitori fu fruklari prenspari penti. No fruteri wan agersitori gi ala pikinpikin sani na ini wan lezing, ma gebroiki agersitori fu fruklari prenspari penti. Sorgu taki den arkiman no memre na agersitori wawan, ma taki den memre san den leri fu en.