Foe san ede wi moesoe froeteri na ogri di wan sma doe?
„A SMA di e tjari wan afersi kon na krin, e tron wan feanti foe a pipel”, na so son sma e taki na ini West-Afrika. Dati na san ben pasa nanga Oloe di a ben taki dati en bigi brada ben abi seks nanga a jongoe sisa foe Oloe. „Joe na wan leiman!”, a brada ben bari. Dan a ben fon Oloe na wan ogri-atifasi, ben jagi en komoto foe na oso foe a famiri, èn ben bron ala den krosi foe Oloe. Den dorpoesma ben agri nanga a bigi brada. Foe di den no ben wani Oloe moro na ini a dorpoe, a ben abi foe gowe. Soso na baka di a meisje ben sori foe de nanga bere, dan den sma ben kon froestan taki san Oloe ben froeteri, ben de troe. A brada ben taki san pasa, èn a nen foe Oloe ben kon krin. Sani ben kan waka heri tra fasi. Den ben kan kiri Oloe.
A de krin, taki den sma di no abi lobi gi Jehovah, no sa warderi en taki sma tjari den fowtoe foe den kon na krin. A sondoe gwenti di sma abi, na foe kakafoetoe gi piri-ai èn foe hori awansi soema e gi a piri-ai, na ati. (Teki gersi Johanes 7:7.) A no de foe froewondroe taki foeroe sma e tan pî te den moesoe tjari den fowtoe foe tra sma kon na krin gi den wan di abi a makti foe poti sani reti.
Warderi a waarde foe piri-ai
Ma na mindri a pipel foe Jehovah, sma e prakseri heri tra fasi foe piri-ai. Man nanga oema di e libi na a fasi fa Gado wani, abi foeroe warderi gi a seti di Jehovah meki foe jepi den sma di sondoe na ini a kresten gemeente. Den e si a sortoe tranga leri disi leki wan fasi fa En e sori en lobi boen-atifasi. — Hebrewsma 12:6-11.
Disi wi kan sori nanga wan kefal na ini a libi foe kownoe David. Ala di a ben de wan regtfardiki man foe sensi en jongoe jari, tokoe wan ten ben de di a ben doe serjoesoe sondoe. Fosi, a ben doe soetadoe. Dan, foe kibri a fowtoe foe en, a ben sorgoe taki den ben kiri a masra foe na oema. Ma Jehovah ben tjari a sondoe foe David kon na krin gi a profeiti Natan, di nanga deki-ati ben sori David a tori. Nanga wan krakti agersitori, Natan ben aksi David san ben moesoe doe nanga wan goedoe man di ben abi foeroe skapoe, ma di ben teki èn ben srakti a wan-enkri pikin skapoe foe wan pôti man di ben lobi na osometi foe en, foe prisiri nanga en mati. David, di ben de wan skapoeman fosi toe, ben firi tegoe èn ben bigin atibron. A ben taki: „A man di e doe disi, froedini foe dede!” Ne Natan ben gebroiki na agersitori disi na David, di a ben e taki: „Joesrefi na a man dati!” — 2 Samuèl 12:1-7.
David no ben atibron nanga Natan; èn a no ben proeberi foe kibri ensrefi èn a no ben teki refensi. Na presi foe dati, a piri-ai di Natan ben gi en, ben naki en konsensi srefisrefi. Nanga dipi sari-ati, David ben taki foe en fowtoe: „Mi sondoe teige Jehovah.” — 2 Samuèl 12:13.
A tjari di Natan ben tjari a sondoe foe David kon na krin èn a piri-ai di a ben kisi foe Gado baka dati, ben abi boen bakapisi. Ala di David no ben kisi kibri gi den bakapisi foe a sondoe foe en, tokoe a ben abi berow èn ben kon boen baka nanga Jehovah. Fa David ben denki foe a sortoe piri-ai disi? A ben skrifi: „Efoe a regtfardikiwan ben sa naki mi, a ben sa de wan lobi boen-atifasi; èn efoe a ben sa piri-ai gi mi, a ben sa de oli na tapoe na ede, san mi ede no ben sa wani weigri.” — Psalm 141:5.
So srefi na ini a ten foe wi, foetoeboi foe Jehovah kan fadon na ini serjoesoe ogridoe, srefi den wan di ben de getrow foeroe jari langa kaba. Foe di moro foeroe foe den sabi taki den owroeman kan gi jepi, meki densrefi e bigin go na den foe kisi jepi (Jakobus 5:13-16). Ma son tron wan sma di doe wan ogri, kan proeberi foe kibri a sondoe foe en, soleki fa kownoe David ben doe dati. San wi moesoe doe te wi kon sabi wan serjoesoe ogridoe na ini a gemeente?
Soema abi a frantiwortoe?
Te den owroeman kon jeri foe wan serjoesoe ogridoe, dan den e go na a sma di doe a sani disi, foe gi en a jepi di de fanowdoe èn foe tjari en kon reti baka. A de a frantiwortoe foe den owroeman foe kroetoe den sortoe sma disi na ini a kresten gemeente. Foe di den e hori ai finifini na tapoe a jeje kondisi foe a gemeente, den e jepi èn e froemane ibriwan sma di e doe wan don noso wan fowtoe sani. — 1 Korentesma 5:12, 13; 2 Timoteus 4:2; 1 Petrus 5:1, 2.
Ma fa a de te joe no de wan owroeman èn joe kon sabi wan serjoesoe ogri di wan tra kresten doe? Tirilin de foe feni na ini a Wet di Jehovah ben gi a nâsi Israèl. A Wet ben taki dati efoe wan sma ben de kotoigi foe a doe di wan sma ben doe sani di abi foe doe nanga a fadon di sma e fadon komoto na bribi, foe oproeroe, foe kiri, noso foe tra serjoesoe ogridoe, dan a ben de en frantiwortoe foe froeteri en èn foe taki san a ben sabi. Lefitikus 5:1 e taki: „Now efoe wan sili sondoe, foe di a jere wan sma floekoe na poebliki èn a de wan kotoigi noso a si en noso a kon sabi en, dan, efoe a no e go froeteri disi, a moesoe gi frantiwortoe foe a sondoe foe en.” — Teki gersi Deuteronomium 13:6-8; Ester 6:2; Odo 29:24.
Ala di kresten na ini a ten disi no de na ondro a Wet foe Moses, tokoe den gronprakseri foe a Wet kan tiri den (Psalm 19:7, 8). So boen, efoe joe kon sabi wan serjoesoe ogridoe foe wan kompe kresten, san joe moesoe doe?
Fa joe moesoe handri a tori
Na a fosi presi, a de prenspari taki wan troetroe reide moesoe de foe bribi taki wan serjoesoe ogridoe ben doe troetroe. „No tron wan kotoigi teige joe kompe sondro foe abi wan boeweisi”, na so a koni man ben taki. „Bika dan joe ben sa moesoe taki don sani nanga joe mofoboeba.” — Odo 24:28.
Joe kan bosroiti foe go langalanga na den owroeman. A no de wan fowtoe sani foe doe dati. Ma moro foeroe, a moro lobi-ati sani foe doe, na foe go na a sma di doe a sani. Kande a tori no de leki fa a gersi. Noso kande den owroeman e handri a tori kaba. Taki na wan safri fasi foe a tori nanga a sma. Efoe tokoe reide de foe bribi taki wan serjoesoe ogri doe, gi en deki-ati dan foe go na den owroeman foe soekoe jepi, èn taigi en foe san ede a de wan koni sani foe doe dati. No taki nanga tra sma foe na afersi, bika dati ben sa de gongosa.
Efoe a sma no e froeteri den owroeman na ini wan reidelek pisi ten, dan joe moesoe doe dati. Dan wán noso toe owroeman sa taki foe na afersi nanga a sma foe soema den taki dati a sondoe. Den owroeman moesoe „soekoe èn ondrosoekoe èn aksi finifini” foe si efoe wan ogri doe. Efoe a troe, dan den sa handri na afersi akroederi den tirilin foe den Boekoe foe bijbel. — Deuteronomium 13:12-14.
No moro mendri leki toe sma di si na afersi de fanowdoe foe man taki efoe wan ogri doe (Johanes 8:17; Hebrewsma 10:28). Efoe a sma taki dati a sani di joe taki no troe èn na joe wawan de leki kotoigi, dan na afersi sa poti na ini den anoe foe Jehovah (1 Timoteus 5:19, 24, 25). Disi wi e doe foe di wi sabi taki ala sani de „krin foe si” na Jehovah, èn dati, efoe a sma abi fowtoe, dan te foe kaba, den sondoe foe en sa „kisi” en. — Hebrewsma 4:13; Numeri 32:23.
Ma kon meki wi taki dati a sma e taki dati a no doe no wan ogri, èn joe na a wan-enkri sma di e kotoigi teige en. A ben kan kroetoe joe dan taki joe ben froeteri wan ogri-ati lei? Nôno, no te joe no gongosa nanga sma di no de na ini a tori. A no de wan ogri-ati lei foe froeteri foe situwâsi di abi krakti na tapoe wan gemeente, na den sma di abi a makti foe hori ai na tapoe sani èn foe poti sani kon reti. Foe taki en leti, a de akroederi a wani foe wi foe doe alaten sani di boen èn foe de loyaal. — Teki gersi Lukas 1:74, 75.
Hori a gemeente santa
Wán reide foe san ede wi moesoe froeteri na ogri di sma doe, na taki a e sorgoe taki a gemeente e tan krin. Jehovah na wan krin Gado, wan santa Gado. A wani taki ala sma di e anbegi en, moesoe de krin na jejefasi èn na moreel sei. A wortoe foe en di skrifi nanga en santa jeje, e froemane: „Leki pikin di e gi jesi, no seti oensrefi moro akroederi den lostoe di oenoe ben abi fositen, di oenoe no ben sabi, ma oenoe so srefi moesoe kon santa toe, akroederi a Santa Sma di ben kari oenoe, na ini ala fasi fa oenoe e tjari oensrefi, bika Boekoe taki: „Oenoe moesoe de santa, bika mi de santa” (1 Petrus 1:14-16). Sma di e doe sani di no krin noso di e doe ogridoe, kan tjari doti kon na tapoe wan heri gemeente èn a kan meki taki Jehovah no feni a gemeente boen, boiti te sani e doe foe strafoe den noso foe poeroe den. — Teki gersi Josua, kapitel 7.
A brifi foe na apostel Paulus gi a kresten gemeente na Korente, e sori fa a froeteri di sma ben froeteri foe wan ogridoe, ben abi leki bakapisi taki a pipel drape foe Jehovah ben kon krin. Na ini en fosi brifi, Paulus ben skrifi: „Foe troe, sma e froeteri taki hoeroedoe e doe na oen mindri, èn so wan hoeroedoe di no de srefi na mindri den nâsi, taki wan seiker man abi a wefi foe en papa.” — 1 Korentesma 5:1.
Bijbel no e froeteri wi foe soema na apostel ben kisi a tori disi. A kan taki Paulus ben jere a tori foe Stefanas, Fortunatus, nanga Akajikus, di ben rèis foe Korente go na Efeise pe Paulus ben e tan. Paulus ben kisi so srefi wan brifi foe a kresten gemeente na ini Korente na ini san den ben aksi bodoi. Awansi foe pe Paulus ben jere a tori, baka di a ben jere a njoensoe foe kotoigi di a ben man bribi, a ben man foe gi tiri ini na afersi. „Poeroe a godelowsoe man na oen mindri”, a ben skrifi. Den ben poeroe a man komoto foe a gemeente. — 1 Korentesma 5:13; 16:17, 18.
A komando foe Paulus ben abi boen bakapisi? Seiker a ben abi boen bakapisi! Soleki fa a de krin foe si, a sma di ben doe na ogri, ben kon si na ogri di a ben doe. Na ini a di foe toe brifi foe Paulus gi den Korentesma, Paulus ben gi a gemeente deki-ati foe gi a man di ben abi berow „pardon nanga safoe-ati èn trowstoe” (2 Korentesma 2:6-8). So boen, a froeteri di na ogridoe ben froeteri, ben meki sani ben doe di ben abi leki bakapisi taki a gemeente ben kon krin èn taki a sma di ben broko en matifasi nanga Gado, ben feni a boen-ati foe En baka.
Wi abi wan tra moi eksempre na ini a fosi brifi foe Paulus gi a kresten gemeente na Korente. A leisi disi, na apostel e kari den nen foe den kotoigi di ben froeteri en na afersi. A ben skrifi: „Den wan foe na oso foe Kloewe, ben tjari kon na krin gi mi, mi brada, taki pratifasi de na oen mindri” (1 Korentesma 1:11). Paulus ben sabi taki a pratifasi disi, makandra nanga a gi di sma ben gi grani na libisma di no ben fiti, ben meki taki sma ben tjari densrefi leki wan sekte èn a sani disi ben kan broko a wánfasi foe a gemeente. Foe dati ede, foe di Paulus ben abi dipi lespeki gi a gosontoe na jejefasi foe den kompe bribiman foe en drape, meki a ben doe wan sani esi-esi èn ben skrifi rai di ben moesoe tjari a gemeente kon boen baka.
Na ini a ten disi, a moro bigi pisi foe den brada nanga sisa na ini den gemeente na heri grontapoe, e wroko tranga foe tan hori a gemeente krin na jejefasi, foe di ibriwan foe den e tan hori wan boen nen na Gado. Son wan foe den e njan pina foe man doe dati; trawan dede srefi foe hori den soifri retifasi. Foe troe, foe tapoe wi ai gi ogridoe noso foe kibri ogridoe, ben sa sori taki wi no abi warderi gi den moeiti disi.
Jepi gi den wan di e meki fowtoe
Foe san ede den wan di doe wan serjoesoe sondoe, no e go na den gemeente owroeman? Nofo tron, a de foe di den no sabi den winimarki te den e go na den owroeman. Son wan abi a fowtoe denki, taki efoe den taki san pasa, dan a sondoe foe den sa meki bekènti na a heri gemeente. Trawan e kori densrefi taki a sani di den ben doe, no de so serjoesoe. Èn trawan e denki taki den kan kenki densrefi sondro a jepi foe den owroeman.
Ma den sortoe sma disi di doe ogri abi a lobi jepi foe den gemeente owroeman fanowdoe. Jakobus ben skrifi: „Wan sma de na oen mindri di siki? Meki a kari den owroeman foe a gemeente kon na en, èn meki den begi gi en, lobi en nanga oli na ini a nen foe Jehovah. Èn a begi foe bribi sa meki a wan di no e firi boen, kon betre, èn Jehovah sa opo en. Èn efoe a doe sondoe, a sa kisi pardon foe dati.” — Jakobus 5:14, 15.
Disi na wan moi sani di seti foe jepi den sma di e meki fowtoe, foe meki a jejefasi foe den kon boen baka! Te den owroeman e gebroiki a safoe rai foe Gado Wortoe gi den sma di siki na jejefasi èn te den e begi gi den, dan den owroeman kan jepi den foe betre foe den fowtoe fasi foe den. So boen, na presi foe firi taki den no boen moro, den sma di abi berow nofo tron e firi switi èn froelekti te den miti nanga den lobi-ati owroeman. Wan jongoe man foe West-Afrika, ben doe hoeroedoe èn ben kibri a sondoe foe en wan toe moen langa. Baka di a sondoe foe en ben kon de foe si, a ben taigi den owroeman: „Mi ben winsi taki wan sma ben sa aksi mi san mi abi nanga a meisje dati! A e gi foeroe froelekti foe tjari a sani disi kon na krin.” — Teki gersi Psalm 32:3-5.
Wan sani di doe nanga lobi leki gronprakseri
Den foetoeboi foe Gado di teki dopoe „komoto na dede go na ini libi” (1 Johanes 3:14). Ma efoe den doe wan serjoesoe sondoe, dan den drai go baka na a pasi foe a dede. Efoe den no kisi jepi, den kan kon tron tranga na ini ogridoe, no wani foe sori berow èn foe drai kon baka na a anbegi foe a troe Gado. — Hebrewsma 10:26-29.
A froeteri di wan sma e froeteri na ogri di wan sma doe, e sori taki a e broko en ede troetroe nanga a sma di doe na ogri. Jakobus ben skrifi: „Mi brada, efoe sani kori wan sma na oen mindri poeroe foe a waarheid èn wan trawan e meki a drai kon baka, sabi dan taki a sma di meki wan sondari drai kon baka foe a fowtoe pasi foe en, sa froeloesoe en sili foe dede èn sa tapoe foeroe sondoe.” — Jakobus 5:19, 20.
So boen, foe san ede wi moesoe froeteri na ogri di wan sma doe? Bikasi a abi boen bakapisi. Foe troe, foe froeteri ogridoe, na wan sani di e sori kresten lobi di gron tapoe gronprakseri, gi Gado, gi a gemeente, èn gi a sma di doe na ogri. Te ibri memre foe a gemeente e hori den regtfardiki markitiki foe Gado hei na wan loyaal fasi, dan Jehovah sa blesi a heri gemeente boen foeroe. Na apostel Paulus ben skrifi: „A [Jehovah] sa meki oenoe kon de stanfaste te na a kaba, so taki no wan sma kan kragi oenoe na a dei foe wi Masra, Jesus Krestes.” — 1 Korentesma 1:8.
[Prenki na tapoe bladzijde 26]
Na lobi foe gi wan Kotoigi di e meki fowtoe deki-ati foe taki nanga den owroeman
[Prenki na tapoe bladzijde 28]
Den owroeman e jepi den wan di e meki fowtoe, foe feni a boen-ati foe Gado baka