Teki a tjalensi foe de loyaal
„Weri a njoen fasi fa wan sma de, di ben meki akroederi a wani foe Gado na ini troetroe regtfardikifasi nanga loyaalfasi.” — EFEISESMA 4:24.
1. Foe san ede wi moesoe de loyaal na Jehovah Gado?
FOE teki a tjalensi foe de loyaal, abi foeroe sani na ini. A moro prenspari sani na a teki di wan sma e teki a tjalensi foe de loyaal na Jehovah Gado. Troetroe, te wi e hori na prakseri soema na Jehovah èn san a doe gi wi, èn foe di wi gi wisrefi abra na en, dan wi de froeplekti foe de loyaal na en. Fa wi e sori taki wi de loyaal na Jehovah Gado? Wan prenspari fasi, na foe de loyaal na den regtfardiki gronprakseri foe Jehovah.
2, 3. San den wortoe loyaalfasi nanga regtfardikifasi abi foe doe nanga makandra?
2 Te wi wani teki a tjalensi dati, dan wi moesoe poti prakseri na tapoe den wortoe di de foe feni na ini 1 Petrus 1:15, 16: „Oenoe so srefi moesoe kon santa toe, akroederi a Santa Sma di ben kari oenoe, na ini ala fasi fa oenoe e tjari oensrefi, bika Boekoe taki: „Oenoe moesoe de santa, bika mi de santa.’” Te wi de loyaal na Jehovah Gado, dan wi sa gi jesi na en ala ten, èn e meki den prakseri foe wi, den wortoe foe wi, èn san wi e doe, kroederi nanga en santa wani. A wani taki dati wi moesoe tan abi wan boen konsensi, soleki fa 1 Timoteus 1:3-5 e gi wi a komando foe dati: „Troetroe, a prakseri foe a komando disi [foe no kon nanga wan tra leri noso foe poti prakseri na tapoe tori di no troe] na lobi di komoto na wan krin ati èn di komoto na wan boen konsensi èn di komoto na bribi di de sondro hoigrifasi.” A troe, taki no wan foe wi de volmaakti, ma wi moesoe proeberi foe doe ala san wi man, a no so?
3 Te wi de loyaal na Jehovah, dan dati sa meki taki wi e hori tranga na regtfardiki gronprakseri, sondro taki wi e prakseri wi eigi afersi nomo. Ija, te wi de loyaal, dan dati sa meki taki wi no e hoigri. A psalm singiman ben abi loyaalfasi na prakseri, di a ben singi: „Leri mi, o Jehovah, foe den pasi foe joe. Mi sa waka na ini joe waarheid. Meki mi ati kon de wán so taki mi kan frede joe nen” (Psalm 86:11). Na wan joisti fasi den ben taki dati loyaalfasi na „a gi di wan sma e gi jesi na wet noso gronprakseri di libisma no man dwengi trawan foe hori densrefi na dati” èn dati na a sani di loyaalfasi e aksi foe wan sma.
4, 5. Gi sortoe fowtoe sani di wi kan doe, loyaalfasi sa kibri wi?
4 Te wi de loyaal na Jehovah Gado, dan wi no sa doe no wan sani di sa tjari sjen kon na tapoe en nen nanga en Kownoekondre. Foe eksempre, wan leisi toe kresten ben abi someni problema nanga makandra, taki den ben meki a fowtoe foe go na wan grontapoe kroetoebangi foe tjari wan loesoe kon ini a tori. A kroetoeman ben aksi: ’Na oen ala toe na Jehovah Kotoigi?’ A ben de krin, taki a no ben man froestan foe san ede den ben kon na fesi kroetoe. Dati ben de wan bigi sjen srefisrefi! Efoe den brada dati ben sa de loyaal na Jehovah Gado, dan den ben sa poti prakseri na tapoe a rai foe na apostel Paulus: „Ija, troetroe disi wani taki, dati oenoe lasi krinkrin taki oenoe e tjari makandra go na fesi kroetoe. Foe san ede oenoe no meki wan ogri pasa nanga oenoe na presi foe dati? Foe san ede oenoe no e meki sma handri takroe nanga oenoe na presi foe dati?” (1 Korentesma 6:7) Troetroe, efoe wi wani de loyaal na Jehovah Gado, dan dati wani taki, dati wi sa moesoe lasi persoonlijk sani na presi taki wi e tjari sjen kon na tapoe Jehovah nanga na organisâsi foe en.
5 Efoe wi de loyaal na Jehovah Gado, dan dati wani taki toe dati wi no moesoe frede gi libisma. „A frede gi libisma, na dati e seti wan trapoe, ma a sma di e froetrow tapoe Jehovah, sa kisi kibri” (Odo 29:25). So boen, wi e hori wisrefi tranga na a bribi foe wi te wi e kisi foe doe nanga froefolgoe, èn wi e waka baka na eksempre foe den Jehovah Kotoigi na Rosiakondre foe fosi, den di na Malawi, na Etiopia, èn na foeroe tra kondre.
6. Nanga soema wi no sa abi demakandra te wi de loyaal?
6 Efoe wi de loyaal na Jehovah Gado, dan wi no sa tron mati foe no wan sma di de wan feanti foe en. Dati meki a disipel Jakobus ben skrifi: „Soeta-oema, oenoe no sabi taki matifasi nanga grontapoe na feantifasi nanga Gado? Foe dati ede, a sma di wani foe de wan mati foe grontapoe, e meki ensrefi tron wan feanti foe Gado” (Jakobus 4:4). Wi wani foe de loyaal leki fa kownoe David ben de loyaal, di a ben taki: „A no de so, taki mi abi bita-ati gi den wan di abi troetroe bita-ati gi joe, o Jehovah, èn mi no e tegoe foe den wan di e opo densrefi teige joe? Troetroe, nanga krinkrin bita-ati mi abi bita-ati gi den. Den tron troetroe feanti gi mi” (Psalm 139:21, 22). Wi no wani abi demakandra nanga sma di e sondoe foe espresi, bika wi no abi noti foe doe nanga den. A no de so, taki efoe wi de loyaal na Gado dan dati sa tapoe wi foe abi demakandra nanga den sortoe feanti dati, efoe a de nanga wan sma srefi noso nanga jepi foe telefisi?
Opo taki gi Jehovah
7. San wi sa doe ini a tori foe Jehovah, te wi de loyaal, èn fa Elihu ben doe disi?
7 Te wi de loyaal, dan wi sa opo taki gi Jehovah Gado. Elihu e gi wi troetroe wan boen eksempre! Job 32:2, 3 e froeteri wi: „Na ati foe Elihu . . . ben kon faja. En ati ben bron nanga Job foe di a ben e froeklari en eigi sili regtfardiki, moro leki foe froeklari Gado regtfardiki. En ati ben bron nanga den dri kompe foe en toe, foe di den no ben feni wan piki, ma den ben go abra foe froeklari dati Gado ben fowtoe.” Na ini Job kapitel 32 te nanga 37, Elihu e opo taki gi Jehovah. A ben taki foe eksempre: „Abi pikinso pasensi nanga mi, èn mi sa tjari kon na krin gi joe taki wortoe de ete di moesoe taki gi a boen foe Gado. . . . Mi sa taki foe mi Mekiman taki a de regtfardiki. . . . A no sa poeroe en ai foe wan sma di de regtfardiki.” — Job 36:2-7.
8. Foe san ede wi moesoe opo taki gi Jehovah?
8 Foe san ede wan sma moesoe opo taki gi Jehovah? Na ini a ten disi, sma e pori a nen foe wi Gado Jehovah na someni fasi. Den taki dati a no de, taki a de wan pisi foe wan Dri-wánfasi, taki a e pina sma foe têgo na ini wan hèl di e bron, taki a no e proeberi nofo foe kenki grontapoe, taki a no e broko en ede nanga libisma, èn so moro fara. Wi e sori taki wi de loyaal na en, te wi e opo taki gi en èn e boeweisi taki Jehovah de troetroe; taki a de wan Gado di koni, di abi retidoe, di de almakti, èn wan Gado di abi lobi; taki a abi wan ten gi ala sani; èn taki, te a joisti ten foe en doro, a sa tjari wan kaba kon na ala ogri èn a sa meki heri grontapoe kon tron wan paradijs (Preikiman 3:1). Disi wani taki dati wi moesoe gebroiki ibri okasi foe gi kotoigi foe Jehovah en nen nanga en Kownoekondre.
De loyaal na Jehovah en organisâsi
9. Na sortoe afersi a ben sori taki son sma no ben de loyaal?
9 Now wi o taki foe a tori taki wi moesoe de loyaal na Jehovah en organisâsi di wi kan si. Troetroe, wi de froeplekti foe de loyaal na a organisâsi, so srefi na „a getrow èn koni srafoe”, di Gado e gebroiki foe gi a kresten gemeente njanjan na jejefasi (Mateus 24:45-47). Kon meki wi taki dati wan sani skrifi na ini den poeblikâsi foe a Waktitoren Genootschap di wi no e froestan noso di wi no e agri nanga dati tapoe a momenti dati. San wi sa doe? Wi sa naki foetoe èn gowe libi na organisâsi? Dati na san son sma ben doe di The Watch Tower someni jari pasa de, ben taki dati a njoen froebontoe ben abi foe doe nanga a Doesoen Jari Tiri. Trawan ben naki foetoe na san A Waktitoren ben taki wan leisi foe a tori foe neutraliteit. Efoe den sma di ben naki foetoe na den sani disi ben de loyaal na a organisâsi èn na den brada foe den, dan den ben sa wakti meki Jehovah tjari den tori disi kon na krin, san a ben doe na en joisti ten. So boen, efoe wan sma de loyaal, dan dati wani taki toe dati a e wakti nanga pasensi te leki a getrow èn koni srafoe tjari moro kon na krin foe a tori.
10. San wi no sa gridi foe kon sabi, te wi de loyaal?
10 Efoe wan sma de loyaal na Jehovah en organisâsi di wi kan si, dan dati wani taki toe dati a no moesoe abi noti foe doe nanga sma di fadon komoto na bribi. Kresten di de loyaal no sa gridi foe kon sabi san den sortoe sma disi abi foe taki. A troe, taki den sma di Jehovah Gado e gebroiki foe tiri a wroko foe en na grontapoe, no de volmaakti. Ma san a Wortoe foe Gado e taigi wi foe doe? Taki foe moesoe gowe libi na organisâsi foe Gado? Nôno. A brada firi foe lobi moesoe jepi wi foe tan loyaal na a organisâsi, èn wi moesoe go doro foe „lobi makandra tranga, nanga lobi di komoto na a ati”. — 1 Petrus 1:22.
De loyaal na loyaal owroeman
11. Sortoe negatief fasi foe denki wi no sa kisi makriki, te wi de loyaal?
11 Te den taki noso doe wan sani na ini a gemeente èn wi no man froestan disi so boen, dan efoe wi de loyaal, wi no sa kroetoe den reide di sma ben abi foe disi, èn a sa jepi wi foe si taki kande a de wan tori di abi foe doe nanga a koni foe man si sani krin. A no de moro boen foe loekoe den boen eigifasi foe den owroeman di poti na wroko èn di foe tra kompe bribiman, na presi foe loekoe den fowtoe foe den? Ija, wi wani foe tan farawe foe den sortoe fasi disi foe denki negatief, bika a abi foe doe nanga a de di wan sma no de loyaal! Efoe wi de loyaal, dan dati sa jepi wi toe foe gi jesi na a rai foe Paulus taki „foe no wan sma [wi] moesoe taki wan takroe sani”. — Titus 3:1, 2.
12, 13. Nanga sortoe spesroetoe problema owroeman e kisi foe doe?
12 Spesroetoe gi owroeman a de wan tjalensi foe de loyaal. Wan foe den tjalensi disi na a tori di abi foe doe nanga froetrow takimakandra. Wan memre foe a gemeente kan froetrow ini wan owroeman. Efoe na owroeman de loyaal na a sma dati, dan dati sa tapoe en foe broko a gronprakseri di abi foe doe nanga froetrow takimakandra. A sa poti prakseri na tapoe a rai na ini Odo 25:9: „No meki sma kon sabi a froetrow takimakandra foe wan trawan.” Dati wani taki no foe taki a tori nanga en wefi srefi!
13 Owroeman e kisi foe doe nanga tra tjalensi toe di abi foe doe nanga loyaalfasi. Den sa de sma di e plisi libisma, noso a de so taki nanga deki-ati èn nanga safoefasi den sa jepi den wan di moesoe kisi wan joisti fasi foe denki, srefi efoe den sma disi na famiriman noso krosibei mati? Efoe den wan foe wi di de owroeman de loyaal na Jehovah en organisâsi, dan wi sa proeberi foe jepi ala sma di abi jepi fanowdoe na jejefasi (Galasiasma 6:1, 2). Ala di wi sa de nanga switifasi, tokoe loyaalfasi sa meki taki wi sa de eerlijk nanga wi kompe owroeman, neleki fa Paulus ben taki nanga na apostel Petrus na wan eerlijkfasi (Galasiasma 2:11-14). Na a tra sei, a de so taki opziener moesoe loekoe boen, taki den no e handri na wan fasi di no koni noso sori taki den e teki sma partèi noso e gebroiki a makti foe den na wan fasi di no fiti, èn na so fasi den e meki en moeilek gi den wan di den opziener disi moesoe loekoe, foe de loyaal na Gado en organisâsi. — Filipisma 4:5.
14, 15. Sortoe sani ben sa kan tesi a loyaalfasi foe memre foe a gemeente?
14 Tra sani de ete di abi foe doe nanga a teki di wan sma e teki a tjalensi foe de loyaal na a gemeente noso na den owroeman foe a gemeente. Efoe sani no e waka so boen na ini a gemeente, dan disi e gi wi na okasi foe sori taki wi de loyaal na Jehovah èn na den sma di e teki presi gi en. (Loekoe A Waktitoren foe 15 juni 1987, bladzijde 6, 7.) Te den sluit wan sma uit, dan wi moesoe horibaka gi den owroeman efoe wi de loyaal, èn wi no moesoe proeberi foe go loekoe bakaten efoe nofo reide ben de foe den owroeman doe so wan sani.
15 Foe de loyaal na a gemeente wani taki toe dati wi e go na ala den feifi alawiki konmakandra, soleki fa wi omstandigheid e gi pasi foe dati èn someni leki wi kan. Te wi de loyaal, dan dati no wani taki wawan dati wi e go na den konmakandra doronomo, ma so srefi taki wi e sreka wisrefi gi den èn gi komentaar di e bow sma, te na okasi de gi dati. — Hebrewsma 10:24, 25.
De loyaal na ini a trowlibi
16, 17. Nanga sortoe tjalensi di abi foe doe nanga loyaalfasi, kresten di trow, e kisi foe doe?
16 Na soema moro wi moesoe de loyaal? Efoe wi trow, èn te wi e hori na ini prakseri san wi ben pramisi di wi ben trow, dan wi moesoe teki a tjalensi foe de loyaal na a trowpatna foe wi. Efoe wi de loyaal na wi trowpatna, dan dati sa tapoe wi foe meki a fowtoe foe abi moro switifasi gi tra oema noso man leki wi abi gi wi eigi wefi noso masra. Te wi de loyaal na a trowpatna foe wi, dan dati e aksi foe wi dati wi no e sori tra sma san na den swakifasi noso den fowtoe foe a patna foe wi. A moro makriki foe kragi na trawan leki foe wroko tranga meki a komunikâsi nanga a patna foe wi tan, wan sani di wi moesoe doe soleki fa a Gowtoe Lin e taki (Mateus 7:12). Te joe e loekoe en boen, dan a trowlibi na wan troetroe tjalensi gi wi foe tan loyaal leki kresten.
17 Te wi wani teki a tjalensi disi foe de loyaal, dan a no de nomo taki wi moesoe tan farawe foe tjari wisrefi na wan fasi di no boen srefisrefi, ma wi moesoe loekoe boen toe srefi gi den prakseri nanga den firi foe wi (Psalm 19:14). Foe eksempre, efoe wi ati di e bedrigi wi, wani prisiri nanga span sani nomonomo, dan a no moeilek foe froewondroe foe wan sani ini a bigin, èn baka ten wi wani en srefisrefi, foe di wi e prakseri wi eigi afersi nomo. Kownoe Salomo ben gi tranga foe tan getrow na ini a trowlibi, èn a ben gi trowmasra a rai na wan agersifasi foe ’dringi watra foe den eigi peti’ (Odo 5:15). Èn Jesus ben taki: „Ibriwan sma di e tan loekoe wan oema foe kan abi sekslostoe gi en, na ini en ati a doe soetadoe kaba nanga en” (Mateus 5:28). Te masra gi densrefi abra na a loekoe foe seks prenki, dan a kefar de taki den kan kisi a firi foe doe soetadoe, èn na so fasi den e bedrigi a wefi foe den èn no de loyaal na en. Ma a ben kan de so toe, taki wan wefi di no man libi tv-programa di abi foe doe nanga lobitori, èn pe pisi de na ini di e sori soetadoe, e kon ini a tesi foe no de loyaal na a masra foe en. Ma te wi de troetroe loyaal na a patna foe wi, dan wi sa meki a trowbanti kon moro tranga, èn wi sa jepi makandra ini a moeiti di wi e doe foe plisi Jehovah Gado.
Sani di e jepi wi foe de loyaal
18. Warderi gi san sa jepi wi foe de loyaal?
18 San sa jepi wi foe teki a tjalensi foe de loyaal tapoe den fo kontren disi: foe de loyaal na Jehovah, na en organisâsi, na a gemeente, èn na wi trowpatna? Wan sani di e jepi na, taki wi moesoe froestan taki te wi e teki a tjalensi foe de loyaal, dan dati abi foe doe nanga a regtfardiki foe a soevereiniteit foe Jehovah. Ija, te wi e tan loyaal, dan wi e sori taki wi e si Jehovah leki na Universeel Soeverein. Èn na so fasi wi kan abi lespeki toe gi wisrefi èn wi kan abi a howpoe foe kisi têgo libi na ini Jehovah en njoen grontapoe. Wi kan jepi wisrefi foe tan loyaal te wi e prakseri den moi eksempre di sma gi di ben de loyaal, foe Jehovah te go miti den wan di kari na ini bijbel èn na ini den Waktitoren poeblikâsi foe wi, so srefi den tori di froeteri na ini den Jaarboek.
19. San bribi abi foe doe nanga a de di wi de loyaal?
19 Tranga bribi na ini Jehovah Gado èn a frede di wi abi foe doe sani di a no feni boen kwetikweti, sa jepi wi foe teki a tjalensi foe de loyaal. Wi e meki a bribi di wi abi na ini Jehovah kon moro tranga èn a frede di wi abi gi en kon moro bigi, te wi e studeri Gado Wortoe fajafaja èn te wi e go na ini a kresten diniwroko. Disi sa jepi taki wi e handri soleki fa a rai foe Paulus e taki na ini Efeisesma 4:23, 24: „Oenoe moesoe meki kon njoen na ini a krakti di e poesoe a prakseri foe oenoe, èn oenoe moesoe weri a njoen fasi fa wan sma de, di ben meki akroederi a wani foe Gado na ini troetroe regtfardikifasi nanga loyaalfasi.”
20. Sortoe eigifasi sa jepi wi, moro ala tra sani, foe de loyaal na Jehovah èn na ala tra sma di wi de froeplekti foe de loyaal na den?
20 Te wi e warderi den eigifasi foe Jehovah, dan dati sa jepi wi foe de loyaal. Ma a moro prenspari sani na, taki te wi lobi wi hemel Tata sondro taki wi e prakseri wi eigi afersi nomo, èn te wi abi warderi gi ala sani di a doe gi wi, te wi lobi en nanga wi heri ati nanga sili nanga prakseri nanga krakti, dan a sa jepi wi foe de loyaal na en. Boiti dati, te wi abi a lobi di Jesus ben taki dati nanga disi, sma ben sa kon sabi den bakaman foe en, dan dati sa jepi wi foe de loyaal na ala kresten na ini a gemeente èn na ini wi osofamiri. Foe taki en na wan tra fasi, te joe loekoe en boen, dan a de wan sani di abi foe doe nanga efoe wan sma e prakseri en eigi afersi nomo efoe no. Efoe wan sma no de loyaal, dan a e prakseri en eigi afersi nomo. Efoe wan sma de loyaal, dan a no e prakseri en eigi afersi nomo. — Markus 12:30, 31; Johanes 13:34, 35.
21. Fa joe kan taki sjatoe san na a tjalensi foe de loyaal?
21 Foe taki en sjatoe: Loyaalfasi na a tranga eigifasi di Jehovah Gado, Jesus Krestes, nanga ala den troe foetoeboi foe Jehovah ben sori. Efoe wi wani abi wan boen matifasi nanga Jehovah Gado, dan wi moesoe teki a tjalensi foe de loyaal na en foe di wi e libi akroederi den regtfardiki markitiki foe en, foe di wi no abi noti foe doe nanga den feanti foe en, èn foe di wi e opo taki gi Jehovah te wi e gi kotoigi oso foe oso èn na tra okasi. Wi moesoe teki a tjalensi toe foe de loyaal na Jehovah en organisâsi di wi kan si. Wi moesoe de loyaal na a gemeente foe wi èn wi moesoe de loyaal na wi trowpatna. Te wi e teki a tjalensi foe de loyaal èn abi boen bakapisi nanga dati, dan wi sa abi wan prati na a regtfardiki foe Jehovah en soevereiniteit, èn wi sa teki en sei na ini a strei disi. Na a fasi disi a sa feni wi boen èn wi sa kisi a pai foe têgo libi. San na apostel Paulus ben taki foe a gi di wan sma e gi ensrefi na ini a dini foe Gado, wi kan taki toe foe a teki di wi e teki a tjalensi foe de loyaal. A de wan wini gi a libi di wi abi now èn a libi di moesoe kon ete. — Psalm 18:25; 1 Timoteus 4:8.
Fa joe ben sa piki?
◻ Na sortoe fasi wi kan teki a tjalensi foe de loyaal na Gado?
◻ San a e aksi foe wi foe de loyaal na a organisâsi foe Jehovah?
◻ Fa owroeman kan teki a tjalensi foe de loyaal?
◻ Nanga sortoe tjalensi di abi foe doe nanga loyaalfasi, kresten di trow, e kisi foe doe?
◻ Sortoe eigifasi sa jepi wi foe teki a tjalensi foe de loyaal?
[Prenki na tapoe bladzijde 25]
Foe de loyaal na memre foe a gemeente, sa tapoe owroeman foe froeteri trawan a froetrow takimakandra foe wan sma
[Prenki na tapoe bladzijde 26]
Te wan sma de loyaal na a trowpatna foe en, dan dati e tranga a banti ini a trowlibi