LES 50
San yu musu du fu abi wan koloku osofamiri?—Pisi 2
Pikin na wan kado fu Yehovah. Dati meki Yehovah wani taki papa nanga mama sorgu den pikin fu den bun. A e gi papa nanga mama bun rai di kan yepi den. A e sori pikin tu san den kan du fu meki ala sma na ini na osofamiri de koloku.
1. Sortu rai Yehovah e gi papa nanga mama?
Yehovah wani taki papa nanga mama lobi den pikin èn taki den meki nofo ten gi den. A wani taki den musu sorgu taki ogri no miti den pikin fu den èn taki den gebroiki Bijbel fu gi den leri (Odo 1:8). A e taigi papa: ’Tan kweki den pikin fu unu nanga den rai fu Yehovah.’ (Leisi Efeisesma 6:4.) Yehovah breiti te papa nanga mama e gebroiki den rai fu en fu kweki den pikin fu den èn te den no e skoifi a frantwortu dati gi wan tra sma.
2. Sortu rai Yehovah e gi pikin?
Yehovah e taigi pikin: „Gi yesi na un papa nanga mama.” (Leisi Kolosesma 3:20.) Te pikin e lespeki den papa nanga mama èn te den e gi yesi na den, dan den e meki Yehovah nanga den papa nanga mama prisiri (Odo 23:22-25). Yesus na wan bun eksempre gi pikin. Di a ben yongu a ben e gi yesi na en papa nanga mama èn a ben e lespeki den aladi den ben de sondusma.—Lukas 2:51, 52.
3. Fa ala sma na ini na osofamiri kan de bun mati fu Yehovah?
Efu yu na wan papa noso mama, dan seiker yu wani taki yu pikin lobi Yehovah neleki fa yu lobi en. Fa yu kan yepi den? Bijbel e taki: ’Un musu leri un pikin den wortu fu Yehovah ibri tron baka, so taki den no frigiti den. Taki fu den sani disi te unu e sidon na ini un oso èn te unu e waka na strati’ (Deuteronomium 6:7). Efu yu no wani taki den pikin fu yu frigiti san yu e leri den, dan nofo tron yu musu taki fu den sani dati wan tu leisi. A tekst disi e sori taki yu musu tan suku okasi fu taki nanga den pikin fu yu fu Yehovah. A bun fu meki ten ibri wiki fu studeri Bijbel nanga yu osofamiri. Awinsi yu no abi pikin, toku a bun fu studeri Gado Wortu ibri wiki.
SORTU TRA SANI YU KAN LERI?
Wi o luku san yu kan du fu meki yu osofamiri de koloku èn fu sorgu taki ogri no miti den.
4. Kweki yu pikin nanga lobi
A no makelek fu kweki pikin. Fa Bijbel kan yepi yu? Leisi Yakobus 1:19, 20 èn taki fu den aksi disi:
Fa papa nanga mama kan sori den pikin fu den taki den lobi den te den e taki nanga den?
Fu san ede papa nanga mama no musu piri-ai noso strafu den pikin te den e atibron?a
5. Kibri yu pikin gi ogri
Efu yu no wani taki ogri miti den pikin fu yu, dan a prenspari fu taki nanga ibriwan fu den fu seks. Kande yu e syen fu du disi. Prei a FELEM èn taki fu den aksi disi:
Fu san ede a muilek gi son papa nanga mama fu taki nanga den pikin fu seks?
Fa son papa nanga mama taki nanga den pikin fu den fu seks?
Soleki fa Bijbel e sori, dan dei fu dei a grontapu fu Satan e kon moro ogri. Leisi 2 Timoteyus 3:1, 13 èn taki fu na aksi disi:
Vers 13 e sori taki sma ben o kon ogri moro nanga moro. Wan fu den ogri di den ben o du, na taki den ben o abi seks nanga pikin. Fu san ede a prenspari taki papa nanga mama e taki nanga den pikin fu den fu seks èn taki den e leri den fu kibri densrefi gi den sortu sma disi?
Yu ben sabi a sani disi?
Yehovah Kotoigi abi furu buku nanga felem di kan yepi papa nanga mama fu taki nanga den pikin fu seks èn fu kibri den gi sma di wani abi seks nanga den. Disi na wan tu fu den sani:
Kibri yu pikin (Felem)
„Taki nanga yu pikin fu seks” (Ontwaakt! Nr. 5 2016)
6. Lespeki yu papa nanga mama
Pikin-nengre nanga yonguwan musu sori lespeki gi den papa nanga mama. Wan fasi fa den kan du disi na fu taki nanga den na wan lespeki fasi. Prei a FELEM èn taki fu den aksi disi:
Fu san ede a bun taki yonguwan e taki na wan lespeki fasi nanga den papa nanga mama?
Fa wan yonguwan kan taki na wan lespeki fasi nanga en papa nanga mama?
Leisi Odo 1:8 èn taki fu na aksi disi:
San wan yonguwan musu du te en papa nanga mama e gi en rai?
7. Studeri Bijbel leki osofamiri
Osofamiri di de Yehovah Kotoigi e poti ten na wan sei ibri wiki fu studeri Bijbel. San na wan tu sani di den e du? Prei a FELEM èn taki fu den aksi disi:
Fa wan osofamiri kan meki ten ibri wiki fu studeri Bijbel?
San papa nanga mama kan du fu meki den pikin lobi na Osofamiri Anbegi èn fu meki den leri wan sani fu en?—Luku a prenki na a bigin fu a les.
San kan meki en muilek gi unu fu studeri nanga makandra?
Yehovah ben wani taki den osofamiri na ini Israel ben musu abi a gwenti fu taki fu a Wortu fu en. Leisi Deuteronomium 6:6, 7 èn taki fu na aksi disi:
Fa yu kan du san skrifi na ini a tekst disi?
Sani di yu kan du na a Osofamiri Anbegi:
Sreka gi den konmakandra.
Leisi èn taki fu wan tori na ini Bijbel di yu osofamiri o lobi.
Efu yu abi yongu pikin, dan download noso print wan fu den sani di yu kan du nanga pikin-nengre di de tapu jw.org.
Efu yu abi moro bigi pikin, dan taki fu wan fu den artikel gi yonguwan di de tapu jw.org.
Prei wan toneel fu wan fu den tori na ini Bijbel.
Luku wan felem tapu jw.org èn taki fu en.
SON SMA E TAKI: „Bijbel muilek tumusi gi pikin-nengre.”
San yu ben o taki?
SAN YU LERI?
Yehovah wani taki papa nanga mama musu lobi den pikin fu den, den musu gi den leri èn den musu kibri den. A wani taki pikin musu lespeki den papa nanga mama èn taki den gi yesi na den. Èn a wani taki osofamiri e anbegi en makandra.
Fa yu ben o piki den aksi disi?
Fa papa nanga mama kan gi den pikin fu den leri èn fa den kan kibri den?
Fa pikin kan sori lespeki gi den papa nanga mama?
Sortu wini osofamiri e kisi te den e poti ten na wan sei ibri wiki fu studeri Bijbel?
TRA SANI DI YU KAN LUKU
Fa yu kan yepi yu pikin fu tron wan sma di kan tyari frantwortu?
„Siksi prenspari les di yu musu leri yu pikin” (Ontwaakt! Nr. 2 2019)
Na ini na artikel disi yu kan si sortu rai Bijbel abi gi sma di e sorgu gi den papa nanga mama di kon owru.
„San Bijbel e taki fu a sorgu di wi musu sorgu wi papa nanga mama di kon owru kaba?” (Web-artikel)
Na ini a felem disi yu o si fa wan man di no ben sabi kweki pikin tron wan bun papa.
Na ini na artikel disi yu o si san papa kan du fu tron wan mati fu den boi fu den.
„San kan yepi wan papa fu de bun nanga en manpikin?” (A Waktitoren, 1 november 2011)