No gi abra esi

SAN A WANI TAKI?

Wan sma di no e gi abra e kisi ensrefi snel baka te wan problema miti en. A fasi disi no e kon fu ensrefi. O moro wan sma e miti sani, o moro a kan leri fu kisi a fasi disi. Neleki fa wan pikin no kan leri waka sondro fu fadon wan tu leisi, na so a de tu taki yu no o man leri fu abi bun bakapisi ini a libi efu yu no e kisi fu du nanga muilek situwâsi.

FU SAN EDE A PRENSPARI?

Son pikin e lasi-ati te sani no e go bun, te a no e go leki fa den wani noso te trawan feni fowtu na den tapu. Son wan no e meki muiti moro srefisrefi. Ma den musu frustan den prenspari sani disi:

• A no ala ten sani o go leki fa wi wani.​—Yakobus 3:2.

• Ala sma e kisi fu du nanga problema.​—Preikiman 9:11.

• Yu o man du sani moro bun, soso te tra sma e taigi yu san yu no e du bun.​—Odo 9:9.

Te yu pikin no e gi abra esi, dan dati o yepi en fu si taki a o man lusu problema di a o kisi ini en libi.

LERI YU PIKIN FU NO GI ABRA

Efu wan sani no go bun.

BIJBELTEKST: „Bika awinsi wan reti-ati sma fadon seibi tron a o opo tanapu.”​—Odo 24:16.

Yepi yu pikin fu si a problema na yoisti fasi. Fu eksempre, san a ben o du efu a no kisi wan bun cijfer na skoro? A kan denki: „Mi no man du noti bun!”

Leri a pikin fu no gi abra, fu di yu e yepi en fu luku fa a kan du en moro bun tra leisi. Na so a e leri fu lusu a problema, na presi fu libi ensrefi gi dati.

No lusu a problema gi en, ma yepi en fu ensrefi lusu en. Efu a no kisi wan bun cijfer, yu kan aksi en: „San yu kan du fu frustan a les moro bun?”

Te wan ogri sani pasa.

BIJBELTEKST: „Un no sabi fa a libi fu unu o de tamara.”​—Yakobus 4:14.

Yu no man sabi fa a libi o de. Wan sma di gudu tide kan kon pôti tamara èn wan sma di gosontu tide kan kon siki. Bijbel e taki: „A no den wan di gaw e wini a streilon. A no den trangawan e wini a feti. . . bika ogri ten nanga sani di den no e fruwakti kan miti den alamala.”​—Preikiman 9:11.

Leki papa nanga mama, yu e du ala san yu man fu kibri yu pikin. Ma toku yu no o man kibri yu pikin gi ala den ­ogri di e pasa.

A kan taki yu pikin yongu ete fu frustan san a wani taki fu lasi en wroko noso fu abi moni problema. Toku yu kan leri en fu no gi abra te a e kisi fu du nanga tra muilek situwâsi​—kande te a lasi wan mati noso efu wan famiriman lasi libi.a

Te yu pikin e kisi rai.

BIJBELTEKST: „Arki rai . . . so taki yu kan tron wan koni sma bakaten.”​—Odo 19:20.

Te wan sma gi yu pikin rai fu kenki wan sani di a no e du bun, dan disi a no fu hati en firi noso fu meki a frede, ­ma na fu yepi en fu du sani moro bun.

Te yu e leri yu pikin fu teki rai, dan un ala tu o kisi wini fu dati. John di de wan papa e taki: „Efu yu no e meki yu pikin si den fowtu fu den, dan noiti den o leri wan sani fu dati. Den o go ini a wan problema baka a trawan, èn yu o abi fu yepi den lusu den problema yu heri libi. Dati o meki a libi muilek gi yu èn gi a pikin.”

Fa yu kan yepi yu pikin fu kisi wini fu bun rai di a e kisi fu trawan? Te wan sma gi yu pikin rai​—kande na skoro noso wan tra presi​—dan no de esi fu taki dati a rai a no gi en. Na presi fu dati, aksi en:

• „Fu san ede yu denki taki a sma gi yu a rai dati?”

• „San yu kan du moro bun?”

• „San yu o du tra leisi te so wan sani pasa?”

Hori na prakseri taki bun rai kan yepi yu pikin nownow kaba, èn te a kon tron wan bigisma.