Wan man di no e frede

LUKU fa den sma e spotu a yonkuman disi! Yu sabi suma na en? Na Yeremia. Yeremia na wan tumusi prenspari profeiti fu Gado.

Syatu baka di Kownu Yosia bigin pori den popki fu den kruktugado na a kondre, dan Yehovah e taigi Yeremia fu de en profeiti. Na a tra sei, Yeremia e denki taki a de tumusi yongu fu de wan profeiti. Ma Yehovah e pramisi taki a sa yepi en.

Yeremia e taigi den Israelsma fu den tapu fu du ogri sani. ’Den gado di den nâsi e anbegi na falsi gado’, a e taki. Ma furu Israelsma moro furu wani fu anbegi popki fu kruktugado leki fu anbegi a tru Gado Yehovah. Te Yeremia e taigi den sma taki Yehovah o strafu den fu a takrudu fu den, dan den e lafu en.

Yari e pasa. Yosia e dede èn dri mun na baka en manpikin Yoyakim e tron kownu. Yeremia e tan taigi a pipel: ’Yerusalem sa kon pori efu unu no kenki den ogri fasi fu unu.’ Den priester e grabu Yeremia èn den e bari taki: ’Fu den sani disi ede di yu e taki, meki yu musu dede.’ Dan den e taigi den granman fu Israel: ’Yeremia musu dede, bika a taki sani kontrari a foto fu wi.’

San Yeremia sa du now? A no e frede! A e taigi den alamala: ’Yehovah ben seni mi fu taigi unu den sani disi. Efu unu no kenki un takru fasi fu libi, dan Yehovah sa pori Yerusalem. Ma prakseri disi: efu unu kiri mi, dan unu sa kiri wan man di no du nowan kruktudu.’

Den granman e meki Yeremia tan na libi, ma den Israelsma no e kenki den ogri fasi fu den. Bakaten Nebukadnesar, a kownu fu Babilon, e kon feti nanga Yerusalem. Te fu kaba a e meki den Israelsma tron en futuboi. A e tyari dusundusun fu den go na Babilon. Fa yu ben sa feni en efu sma di yu no sabi ben sa teki yu na yu oso tyari gowe na wan kondre di yu no sabi?