Wroko makandra leki osofamiri, so taki unu kan go na fesi na ini na anbegi

KRESTEN di wani yepi na osofamiri fu den fu kisi lobi gi Yehovah èn fu dini en, musu de klariklari fu wroko makandra. Di Yehovah ben meki a fosi man nanga uma, dan a ben tyari kon na krin o prenspari a de taki den wroko makandra. Eva ben musu de ’wan patna di ben fiti’ gi Adam (Gen. 2:18). Na ini a trowlibi, a masra nanga a wefi musu wroko makandra leki patna, èn den musu yepi makandra (Preik. 4:9-12). Sobun, papa, mama, nanga pikin kisi wan frantwortu fu Yehovah, èn efu den wani tyari a frantwortu dati na a yoisti fasi, dan den musu wroko makandra.

Anbegi Gado leki osofamiri

Barry nanga Heidi abi feifi pikin. Den kon si taki te den e wroko makandra fu studeri Bijbel leki osofamiri, dan dati e yepi den fu go na fesi. Barry e taki: „Son leisi, mi e gi den pikin wan makriki sani fu sreka, fosi wi e du na osofamiri-studie. Son leisi mi e aksi den fu sreka wan piki di den puru na ini wan artikel fu na Ontwaakt! Wi e oefen tu san wi o taki na ini a preikiwroko, so taki ibriwan fu den pikin kan sabi san a musu taki te a de na ini a preikiwroko.” Heidi e taki tu: „Wi alamala poti wan tu marki di wi wani doro na ini a diniwroko, èn te wi e hori na osofamiri-studie, dan ten na ten wi e luku sortuwan fu den marki wi doro kaba.” A trowpaar disi kon si tu taki te den no e luku telefisi na spesrutu neti, dan dati e gi ala sma na ini na osofamiri na okasi fu leisi wan sani gi densrefi.

Den gemeente konmakandra

Mike nanga Denise kweki fo pikin. Sortu wini den kisi fu di den wroko makandra leki osofamiri? Mike e taki: „Aladi wi ben sreka sani bun na fesi, toku son leisi wi ben e doro lati na den konmakandra. Ma wi kon si taki te wi ben e wroko makandra, dan dati ben e yepi wi fu doro biten na den konmakandra.” Denise e taki: „Di den pikin ben kon moro bigi, dan wi ben e gi ibriwan fu den wan wroko. Kim, na umapikin fu wi, ben yepi bori èn a ben musu poti den preti nanga den tra sani na tapu a tafra.” Michael, a boi fu den, e memre: „Ibri tudewroko neti, wi ben abi wan gemeente konmakandra na ini wi oso. Sobun, wi ben e krin a kamra nanga a gron, èn wi ben e seti den sturu gi a konmakandra.” Matthew, wan tra boi fu den, e taki: „Den neti te wi ben abi konmakandra, mi papa ben e sorgu taki baka wroko a ben e kon na oso fruku, so taki a ben kan yepi wi fu sreka gi a konmakandra.” San ben de a bakapisi?

A muiti di den meki tyari furu wini kon gi den

Mike e fruteri: „Na ini 1987, mi nanga Denise bigin pionier. Na a ten dati, dri fu den pikin fu wi ben e libi ete nanga wi. Tu pikin fu wi tron pionier tu, èn den trawan yepi fu bow Bethel-oso. Wan tra blesi di wi kisi leki osofamiri, na taki wi ben kan yepi 40 sma fu gi densrefi abra na Yehovah, èn fu teki dopu. Leki osofamiri, wi ben abi a grani tu fu yepi nanga bow-wroko, èn wi du dati srefi na ini tra kondre.”

Iya, a e tyari furu wini kon te osofamiri e wroko makandra. Yu man feni tra fasi fa yu nanga yu osofamiri kan wroko makandra? Yu kan de seiker taki te unu de klariklari fu wroko makandra, dan dati sa yepi yu osofamiri fu go na fesi na ini na anbegi.

[Prenki na tapu bladzijde 28]

Te osofamiri e oefen san den o taki na ini a preikiwroko, dan dati sa yepi den fu du a wroko disi moro bun