Aksi di opo kon
◼ Yehovah Kotoigi musu prati lezing di den teki na tapu cassette noso di skrifi na tapu papira?
Wi e kisi krakti nanga deki-ati fu Bijbel lezing (Tori. 15:32). Dati meki wi wani fruteri trawan di no ben de na a konmakandra, fu den moi sani di wi leri. Boiti cassette, difrenti sani de di wi kan gebroiki fu poti lezing na tapu, èn dati e meki en makriki fu prati lezing gi trawan. Son sma kon abi wan lo fu den lezing disi, sosrefi lezing di brada ben hori furu yari pasa. Den e leni mati den lezing disi, noso den e meki kopie gi den so taki den mati disi kan kisi wini fu dati. Trawan poti den lezing tapu wan Website tapu Internet so taki iniwan sma kan teki den drape.
A no de fu taki dati a no fowtu fu teki lezing tapu cassette noso tra sani gi wisrefi noso gi memre fu wi osofamiri. Boiti dati, owruman kan seti sani so taki lezing kan teki na tapu cassette gi preikiman di siki èn di no man kon na den konmakandra. Ma bun reide de fu san ede wi no o prati lezing di teki na tapu cassette noso di skrifi na tapu papira.
Nofo tron, a de so taki den brada e hori lezing nanga a situwâsi fu a gemeente na prakseri. Dati meki a kan pasa makriki taki wi frustan den sortu lezing disi na wan fowtu fasi. Disi kan pasa fu di wi no sabi fa a situwâsi ben de di a lezing hori. Boiti dati, a ben o muilek gi wi tu fu kon sabi suma ben hori a lezing èn o ten a lezing ben hori. Na so fasi wi no ben o sabi efu den sani di taki na ini a lezing de soifri soleki fa wi e si sani now (Luk. 1:1-4). Wan tra sani na taki te wi e prati den lezing disi, dan son sma kande o wani gi grani noso poti tumusi furu prakseri na trawan. A kan de so tu taki trawan o wani kisi grani na wan fasi di no fiti.—1 Kor. 3:5-7.
A getrow èn koni srafu e wroko tranga fu sorgu gi „nofo” nyanyan èn den e gi dati na „a reti ten” (Luk. 12:42). Disi wani taki sosrefi dati den seti sani so, taki lezing e hori na den difrenti gemeente fu Yehovah Kotoigi èn taki sma kan teki sani na tapu a Website fu Yehovah Kotoigi. Wi kan de seiker taki a getrow èn koni srafu nanga a Tiri Skin o sorgu gi ala san wi abi fanowdu fu tranga a bribi fu wi.—Tori. 16:4, 5.