Aksi di opo kon

◼ San wi musu hori na prakseri te wi wani taki wan tu fu den gudu fu wi noso ala den gudu fu wi go na a organisâsi fu Yehovah baka te wi dede?

Te wan sma dede, a no man du noti moro nanga den gudu fu en (Preik. 9:5, 6). Fu dati ede, furu sma e meki wan testamenti pe den e skrifi suma musu kisi den gudu fu den (2 Kow. 20:1). Nofo tron wan machtiging papira e meki tu pe skrifi suma kisi a frantwortu fu luku den tori disi fu a sma. Efu wan sma no meki a machtiging papira, dan na ini furu kondre lanti o bosroiti fa den gudu fu a sma di dede musu prati. Fu dati ede, efu wi wani taki son sani di wi abi noso ala den gudu fu wi e go na a organisâsi fu Yehovah, dan a de prenspari fu skrifi dati finifini na ini wan testamenti. Boiti dati, wi musu luku bun tu suma wi o teki fu luku den tori disi.

A sma di musu luku den tori disi, abi wan bigi frantwortu. A kan teki furu ten èn a sma disi o abi fu du furu muiti fu luku den tori disi. Boiti dati, sani musu du tu soleki fa lanti wani. A no ben o bun fu teki iniwan sma fu a gemeente fu luku den tori disi gi yu. A sma di yu teki musu sabi san a musu du fu tyari a frantwortu, a musu de wan sma di yu kan frutrow, èn a musu de klariklari fu du san yu wani.​—Luku „Gi sani nanga prisiri èn nanga yu heri ati”, na ini A Waktitoren fu 15 november 2009, blz. 19.

Efu wan sma aksi yu fu luku den tori fu en: Efu wan sma aksi yu fu luku den tori fu en baka te a dede, dan yu musu denki a tori bun fosi èn begi fu a tori fu si efu yu o man tyari a frantwortu disi (Luk. 14:28-32). Baka te a sma dede, yu sa musu piki ala den sma di kari na ini a testamenti. Te yu mag du dati, dan yu o abi fu prati den gudu soleki fa lanti e taki èn soleki fa a skrifi na ini a testamenti. Awinsi o furu gudu musu prati, a gemachtigde musu hori ensrefi finifini na san skrifi na ini a testamenti. Ala sani di wan sma e gi na Yehovah organisâsi, na sani di de fu den wawan.​—Luk. 16:10; 21:1-4.