Incwadzi Levela eSigungwini Lesibusako

“Kufanele ngabe senibafundzisi.” (Heb 5:12) Asewucabange nje! Jehova longuMfundzisi lomuhle wendalo yonkhe, asimema kutsi sifundzise labanye ngaye! Nobe ngabe ngumuphi umsebenti wekufundzisa ngeliciso laJehova kungaba semdenini, ebandleni, nobe emsebentini wekushumayela, loko kulilungelo lelikhulu futsi kulukhuni nekukwenta. Singaphumelela kanjani?

Imphendvulo itfolakala emavini labhalwa nguphostoli Pawula, abhalela Thimothi, latsi: “Chubeka utimisela ekufundzeleni linyenti, ekukhutsateni, nasekufundziseni.” Pawula waphindze watsi: “Nawenta njalo utawutisindzisa wena nalabo labakulalelako.” (1Tm 4:13, 16) Kufanele simemetele umlayeto losindzisa kuphila. Ngako, kubalulekile kutfutfukisa indlela lofundza ngayo kanye nalofundzisa ngayo. Lencwajana yentelwe kusisita kutsi sikhone kwenta loko. Cabanga ngetintfo letimbalwa letikuyo.

Ekhasini ngalinye kunembhalo lotsite, kungaba simiso seliBhayibheli lesihambelana neliphuzu lesifundvo nobe sibonelo seliphuzu lokukhunywa ngalo

Jehova ‘unguMfundzisi Lomkhulu.’ (Isa 30:20) Lencwajana itakusita kutsi utfutfukise emakhono akho ekufundza nekufundzisa, kodvwa ungakhohlwa nekutsi Jehova ungumtfombo wemlayeto lesiwumemetelako, nekutsi nguye lodvonsela bantfu kuye. (Johane 6:44) Ngako ke, thantaza njalo kuJehova ucele umoya longcwele. Lifundze njalo liVi laNkulunkulu. Ungatidvumisi wena, kodvwa dvumisa Jehova. Yenta konkhe lokusemandleni akho kutsi wente labo labakulalele bamtsandze Jehova.

Uniketwe umsebenti lowengca yonkhe imisebenti leyake yaniketwa bantfu, lokungumsebenti lobalulekile wekufundzisa ngemlayeto waJehova. Siyaciniseka kutsi nasetsembele ‘emandleni lavela kuNkulunkulu,’ sitawuphumelela kulomsebenti.—1 Ph 4:11.

Bazalwane lofundzisa kanye nabo,

Sigungu Lesibusako saBoFakazi BaJehova