SIFUNDVO 14

Emaphuzu Lamcoka Agcanyisiwe

Hebheru 8:1

LOKUFANELE UKWENTE: Sita labakulalele bahambisane nawe kulenkhulumo, futsi ukwente kukhanye kutsi emaphuzu lamcoka ahlangana njani nesihloko senkhulumo yakho kanye nemgomo wakho.

INDLELA YEKUKWENTA:

Bani nemgomo. Tibute kutsi lenkhulumo yakho ufuna yendlulisele imininingwane letsite, ivete emaciniso latsite, nobe labakulalele bente lokutsite ngaloko lokushoko, bese uyitfutfukisa unalowo mgomo engcondvweni. Ciniseka kutsi onkhe emaphuzu layinhloko awuveta kahle umgomo wakho.

Tibute: ‘Ngumiphi imibuto lengahlupha labakulalele noma ibente bangavumelani nalesihloko? Lemibuto nobe loko labangavumelani ngako, bebangakuveta njani ngendlela lehlelekile?’ Hlela-ke emaphuzu akho ngendlela lefananako kute labakulalele bakhone kuhambisana nawe, bakuve kahle loko lokushoko futsi bakwemukele.
Gcizelela sihloko senkhulumo yakho. Kuyo yonkhe lenkhulumo chubeka ugcizelela emagama layinhloko alesihloko noma usebentise lamanye emagama lanemcondvo lofanako.
Wente ngendlela lemelula nalevakala kahle emaphuzu akho layinhloko. Khetsa kuphela emaphuzu layinhloko lavumelana kahle nesihloko sakho latakusita kutsi ufundzise ngendlela lephumelelako ngesikhatsi loniketwe sona. Emaphuzu akho lamcoka awangabi manengi kakhulu, liphuzu ngalinye lolishoko livete ngendlela lekhanyako, nawucedza kulisho bese uma kancane ngaphambi kwekusho liphuzu lelilandzelako.

Emaphuzu akho layinhloko ungawasho esetfulweni senkhulumo yakho kute labakulalele bakhone kuhambisana nawe nobe uwasho ekugcineni kute bakhone kuwakhumbula.