September

Nkulunkulu unikete Jesu emandla ekucedza tonkhe tinkinga tebantfu. Ngesikhatsi Jesu enta timangaliso, bekakhombisa kutsi angaticedza tonkhe tinkinga lesingeke sikhone kuticedza. Sibonelo nje, unemandla ekusikhulula kuloko lokusibangela tinkinga, lokusono lesasitfola kubokhokho betfu kanye nako konkhe lokubangelwa sono, lokufaka ekhatsi kugula nekufa. (Mat. 9:1-6; Rom. 5:12, 18, 19) Timangaliso latenta tikhombisa kutsi angakwelapha “konkhe kugula” futsi avuse nalabafile. (Mat. 4:23; Joh. 11:43, 44) Ngetulu kwaloko, unemandla ekulawula umoya lomkhulu kanye nekukhulula bantfu emadimonini. (Mak. 4:37-39; Luk. 8:2) Kuyasijabulisa kwati kutsi Jehova unikete iNdvodzana yakhe emandla ekwenta loku! Singaciniseka kutsi tibusiso letitawuletfwa nguMbuso waNkulunkulu titawuba khona. Timangaliso letentiwa nguJesu ngesikhatsi angumuntfu tisifundzisa ngaloko latakwenta emhlabeni njengobe ayiNkhosi yeMbuso waNkulunkulu losezulwini. w23.04 3 ¶5-7

Nangabe libandla lokulo linebamemeteli labanyenti, kungenteka uhle ungakhonjwa, futsi kungenteka ulingeke kutsi ungasaphakamisi. Kodvwa ungayekeli kwetama kuphendvula. Lungiselela timphendvulo letinyentana njalo nawuya emihlanganweni. Nangabe ungakhonjwa ngasekucaleni kwesifundvo, utawube solo usenawo ematfuba ekuphendvula njengobe umhlangano uchubeka. Nawulungiselela Sifundvo se-Sicongosekulindza, cabanga ngekutsi sigaba ngasinye sihlangana njani nesihloko lokufundvwa ngaso. Nawenta njalo, utawuba nalokutsite longakusho njengobe lesifundvo sichubeka. Ngetulu kwaloko, lungiselela timphendvulo tetigaba letinemaciniso lajulile lokumatima kuwachaza. Leni? Ngobe kungenteka batawuba bancane labatawufuna kuphendvula kuleto tigaba. Kutsiwani nangabe kuphela emaviki solo ungakhonjwa? Ungaya kumchubi ngaphambi kwemihlangano futsi umtjele ngesigaba longatsandza kuphendvula kuso. w23.04 21-22 ¶9-10

Josefa bekasisebentisa ngekushesha sicondziso saJehova, futsi loko kwamenta waba yindvodza lekahle. Watfola sicondziso lesivela kuNkulunkulu cishe tikhatsi letintsatfu lesimayelana nemndeni wakhe. Sikhatsi ngasinye, bekasilalela ngekushesha ngisho nobe kwenta njalo bekusho kwenta lushintjo lolukhulu. (Mat. 1:20; 2:13-15, 19-21) Ngekulalela sicondziso saNkulunkulu, Josefa wavikela Mariya, wamsekela futsi wamnakekela. Kusenekwenteka loko lokwentiwa nguJosefa kwenta Mariya wamtsandza kakhulu futsi wamhlonipha kakhulu! Nine madvodza, ningamlingisa Josefa ngekutsi nifune seluleko lesiseBhayibhelini sekunakekela imindeni yenu. Nangabe nisisebentisa leseluleko ngisho nobe loko kusho kwenta lushintjo, nikhombisa kutsi niyabatsandza bafati benu futsi nicinisa imishado yenu. Lomunye dzadze waseVanuatu, lesekuphele iminyaka lengetulu kwalengu-20 ashadile utsi: “Nangabe indvodza yami ifuna sicondziso saJehova futsi isisebentisa, ngiyihlonipha kakhulu. Ngitiva ngivikelekile futsi ngiyatetsemba tincumo tayo.” w23.05 21 ¶5

EmaJuda lebekabuya eBhabhulona bekufanele abe ‘bantfu labangcwele’ baNkulunkulu wawo. (Dut. 7:6) Kodvwa loko bekungasho kutsi bekungakafaneli ente lushintjo kuze ajabulise Jehova. Linyenti lemaJuda latalelwa eBhabhulona, ngako kusenekwenteka beletayele kucabanga njengebantfu baseBhabhulona futsi liphila ngendlela lebebaphila ngayo. Ngemuva kweminyaka leminyenti lamanye emaJuda abuyele ka-Israyeli, uMbusi Nehemiya wamangala kutsi bantfwana labatelwe ka-Israyeli bebangalwati lulwimi lwemaJuda. (Dut. 6:6, 7; Neh. 13:23, 24) Labantfwana bebatakufundza njani kutsandza Jehova futsi bamkhonte nangabe bangasati siHebheru, njengobe liVi laNkulunkulu belibhalwe ngalolo lwimi? (Ezra 10:3, 44) Ngako lamaJuda bekufanele ente lushintjo lolukhulu, kodvwa bekutawuba melula kulwenta ka-Israyeli, lapho khona kukhonta lokuhlantekile bekubuyiselwa kancane kancane.​—Neh. 8:8, 9. w23.05 15 ¶6-7

Ngisho nobe unesifiso lesinganani noma utimisele kanganani kufeza umgomo, kungahle kube netintfo letikubuyisela emuva. Sibonelo saloko kutsi ‘timo letingakalindzeleki’ tingatsatsa sikhatsi lebekufanele sisisebentise kuze sifeze umgomo wetfu. (Shu. 9:11) Singahle sibhekane nenkinga lengasishiya sidvumatekile futsi site emandla. (Taga 24:10) Ngenca yekutsi sinesono, singenta emaphutsa langenta kube matima kutsi sifinyelele umgomo wetfu. (Rom. 7:23) Nobe singahle sitive sikhatsele. (Mat. 26:43) Yini lesingayenta kuze sibhekane naloku? Khumbula kutsi nakunalokutsite lokukuvimbela kutsi ufinyelele umgomo wakho, akusho kutsi wehlulekile. LiBhayibheli liyasho kutsi singahle sibhekane netinkinga tilandzelane. Nobe kunjalo, liphindze lisho kutsi singetama kufinyelela imigomo yetfu. Nawuchubeka wetama kufinyelela umgomo wakho ngisho nobe kumatima, usuke ukhombisa Jehova kutsi uyafuna kumjabulisa. Jehova ujabula kakhulu nakakubona uchubeka wetama kufinyelela umgomo wakho! w23.05 30 ¶14-15

Kuba lihlahlandlela kusita umzalwane losemusha kutsi akhone kusebenta kahle nebantfu labehlukahlukene. Kuphindze kumsite kutsi akhone kuhlela kusebentisa kahle imali futsi anamatsele kuloluhlelo. (Fil. 4:11-13) Indlela lekahle yekuba sisebenti sasikhatsi sonkhe kutsi ucale ube lihlahlandlela lelisitako, lokusita kutsi ukulungele kuba lihlahlandlela lelivamile. Kuba lihlahlandlela kungavula ematfuba ekwenta leminye imisebenti yasikhatsi sonkhe, lefaka ekhatsi kwenta umsebenti wekwakha nobe kuba lilunga lemndeni waseBethel. Bazalwane labangemaKhristu kufanele batibekele umgomo wekutsi bakufanele kuba ngulabadzala belibandla kuze bakhonte bazalwane babo nabodzadze ebandleni. LiBhayibheli litsi emadvodza lafisa kwenta lomsebenti “afisa umsebenti lomuhle.” (1 Thim. 3:1) Umzalwane kufanele acale akufanele kuba yinceku lesebentako. Tinceku letisebentako tisita labadzala belibandla ngetindlela letinyenti letehlukene. Labadzala belibandla netinceku letisebentako bakhonta bazalwane babo nabodzadze futsi bayatimisela emsebentini wekushumayela. w23.12 28 ¶14-16

INkhosi Josaya beyineminyaka lengu-16 ngesikhatsi icala kufuna Jehova. Beyifuna kufundza ngaJehova futsi yente intsandvo yakhe. Nobe kunjalo, beyetfwele kamatima lenkhosi leseyincane. Bekufanele imelele kukhonta lokuhlantekile ngesikhatsi kugcwele kukhonta kwemanga kulelive, futsi yakhona kukwenta loko. Ngaphambi kwekutsi Josaya abe neminyaka lengu-20, wacala kususa kukhonta kwemanga kulelive. (2 Khr. 34:1, 2) Ngisho nobe usemncane, ungamlingisa Josaya ngekutsi ufundze lokunyenti ngaJehova nangebuntfu bakhe lobuhle. Loko kutakukhutsata kutsi utinikele kuye. Kutinikela kuye kutakutsintsa njani kuphila kwakho? Luke, lowabhajatiswa aneminyaka lengu-14, utsi: “Kusukela nyalo, ngitawenta kukhonta Jehova kute kucala ekuphileni kwami, futsi ngitawetama kumjabulisa.” (Mak. 12:30) Utawubusiswa nangabe nawe wetama kwenta lokufanako! w23.09 11 ¶12-13

Ngesikhatsi umphostoli Pawula abhala lencwadzi, bewungakapheli umnyaka libandla laseThesalonika lisunguliwe. Emadvodza laholako kulelibandla bekete lwati lolunyenti futsi kungenteka bekenta emaphutsa. Nobe kunjalo, bekufanele ahlonishwe. Njengobe kuhlupheka lokukhulu kusondzela, kusenekwenteka sitakudzinga kakhulu kwendlula nyalo kwetsembela kulabadzala kuze basicondzise. Kusenekwenteka singasitfoli sicondziso lesivela endlunkhulu nobe ehhovisini leligatja; ngako kubalulekile kutsi sifundze nyalo kutsandza labazalwane futsi sibahloniphe. Ngisho nobe kungentekani, shengatsi singahlale sisangulukile, singanaki emaphutsa abo kodvwa sinake kutsi Jehova ucondzisa lamadvodza letsembekile asebentisa Khristu. Njengobe sigcoko sekutivikela sivikela inhloko yelisotja, litsemba letfu lensindziso livikela imicabango yetfu. Siyabona kutsi kute lokuphatsekako lesingakunikwa ngulelive. (Fil. 3:8) Litsemba letfu lisisita kutsi sihlale sehlise umoya futsi sime sicinile. w23.06 11-12 ¶11-12

Labo labeva ‘lomfati losilima’ kufanele bente sincumo: Batasemukela yini simemo sakhe nobe ngeke basemukele? Kunetizatfu letivakalako letenta kudzingeke sigweme kutiphatsa kabi. “Umfati losilima” utsi: “Emanti ekwebiwa amnandzi.” (Taga 9:17) Ayini ‘lamanti ekwebiwa’? LiBhayibheli lifananisa kuya ecansini kwebantfu labashadene nemanti lacabulako. (Taga 5:15-18) Indvodza nemfati labashade ngalokusemtsetfweni bavumelekile kuya ecansini. Kodvwa kungulokwehlukile ‘ngemanti ekwebiwa.’ Lokusho kuya ecansini lokungakavumeleki. Loku kuvame kwenteka emasitseleni njengobe nelisela livame kweba emasitseleni. ‘Lamanti ekwebiwa’ angabonakala amnandzi nangabe labo labawanatsako babona ngatsi bayakhona kukufihla loko labakwentako. Bayatiyenga! Jehova ubona konkhe. Kute lokubuhlungu kwendlula kungasatsandvwa nguye, ngako kute ‘lokumnandzi’ ngaloko.​—1 Khor. 6:9, 10. w23.06 22 ¶7-9

Yini longayenta nawuva shengatsi imithantazo yakho ayisuki enhlitiyweni nobe kutsi awusakujabuleli kwenta umsebenti wekushumayela njengakucala? Ungacabangi kutsi sewute umoya waJehova. Unesono, futsi indlela lotiva ngayo itawushintjashintja. Nangabe ucala kuphelelwa ngemandla, cabanga ngesibonelo semphostoli Pawula. Nanobe etama kulingisa Jesu, bekati kutsi bekangahle aphelelwe ngemandla ngaletinye tikhatsi. Pawula bekatimisele kuchubeka enta umsebenti wakhe wekushumayela angayi ngekutsi utiva njani ngaleso sikhatsi. Ngako nawe ungavumeli indlela lotiva ngayo ikwentise tincumo. Timisele kwenta lokulungile ngisho nobe utiva njani. Nawuchubeka wenta lokulungile, kungenteka ishintje indlela lotiva ngayo.​—1 Khor. 9:16. w24.03 11-12 ¶12-13

Natsi singakhombisa kutsi siyabatsandza bazalwane betfu nabodzadze ngekutsi sibente bangani betfu. (2 Khor. 6:11-13) Linyenti letfu lisemabandleni lanebazalwane nabodzadze labakhule ngetindlela letingafani futsi labanebuntfu lobungafani. Singachubeka sibatsandza bonkhe ngekutsi sinake buntfu babo lobuhle. Nasifundza kubuka labanye ngendlela Jehova lababuka ngayo, sisuke sikhombisa kutsi siyabatsandza. Lutsandvo lutawubaluleka kakhulu ngekuhlupheka lokukhulu. Nakucala kuhlupheka lokukhulu, sitasitfolaphi sivikelo? Naka naku Jehova latjela bantfu bakhe kutsi bakwente nakuhlaselwa iBhabhulona ngesikhatsi sasendvulo. Watsi: “Hambani bantfu bami niyongena emakamelweni enu langekhatsi, nivale iminyango ngemuva kwenu. Bhacani sikhashana kuze kwendlule lulaka lwami.” (Isa. 26:20) Kubonakala ngatsi lamavi atawusebenta ngesikhatsi sekuhlupheka lokukhulu. w23.07 6-7 ¶14-16

Labanye abakwati ngekutsi uyacabangela. Tibute: ‘Bantfu bacabanga kutsi ngiyacabangela yini, anginamatseli emibonweni yami nekutsi ngiyababeketelela yini labanye? Nobe bacabanga kutsi ngicinisa kakhulu sandla, ngite umusa futsi nginengcondvo lelukhuni? Ngiyabalalela yini labanye futsi ngihambisane nemibono yabo nangabe ikahle?’ Lizinga lesicabangela ngalo liveta lizinga lesilingisa ngalo Jehova naJesu. Kucabangela kufaka ekhatsi kuvumelana netimo tetfu natishintja. Letimo letishintjako tingasibangela tinkinga lebesingakatilindzeli. Singahle sigule singakalindzeli. Nobe kube nelushintjo kutemnotfo nobe kutepolitiki lasihlala khona futsi kwente kuphila kwetfu kube lukhuni. (Shu. 9:11) Ngisho nelushintjo etabelweni tetfu lungenta tintfo tibe matima. Singakhona kubhekana netimo letinsha nasenta naku lokune lokulandzelako: (1) kwemukela tintfo njengobe tinjalo, (2) kubuka likusasa, (3) kunaka tintfo letinhle (4) nekusita labanye. w23.07 21-22 ¶7-8

Umphrofethi Danyela bekalijaha ngesikhatsi baseBhabhulona bamtfumba, bamsusa eveni lakubo. Kodvwa kusebaleni kutsi bamtsandza. Babona loko “lokubonakala ngephandle,” kutsi Danyela ‘akanasici, ubukeka kahle’ nekutsi uchamuka emndenini lobalulekile. (1 Sam. 16:7) Ngenca yaloko, bamcecesha kutsi abe ngumuntfu lobalulekile emmangweni. (Dan. 1:3, 4, 6) Jehova wamtsandza Danyela, ngenca yeluhlobo lwemuntfu lelijaha lelakhetsa kuba ngilo. Ecinisweni, kusenekwenteka Danyela bekaseminyakeni yabo-20 ngesikhatsi Jehova akhuluma kahle ngaye, ambala naNowa naJobe, emadvodza lacitsa iminyaka leminyenti atakhela ligama lelihle naNkulunkulu. (Gen. 5:32; 6:9, 10; Jobe 42:16, 17; Hez. 14:14) Jehova wachubeka amtsandza Danyela kuko konkhe kuphila kwakhe.​—Dan. 10:11, 19. w23.08 2 ¶1-2

Nawufuna kutsenga indlu, ungatsandza kubona konkhe ngalendlu lofuna kuyitsenga. Singenta lokufanako nangalapho sifundza liBhayibheli futsi silidadisha. Nawufundza ngekushesha, ungahle ugcine ngekwati emaciniso lasisekelo, ‘lokutintfo letimelula temavi aNkulunkulu.’ (Heb. 5:12) Kodvwa njengobe kudzingeka kutsi ungene ngekhatsi kulendlu kuze ubone tintfo letinyenti ngayo, kufanele ulifundze ngekucophelela liBhayibheli kuze ulicondze kahle. Indlela lekahle yekudadisha liBhayibheli kubuka kutsi tintfo lelitisho kulenye indzawo tihlangana njani nalelitisho kulenye indzawo. Yetama kucondza emaciniso lowakholelwako nekutsi yini lekwenta uwakholelwe. Kuze silicondze kahle lonkhe liVi laNkulunkulu, kufanele sifundze emaciniso lajulile lakulo. Umphostoli Pawula wakhutsata bazalwane bakhe nabodzadze kutsi balidadishe ngekucophelela kuze bakwati “kubucondzisisa bubanti, budze, kuphakama, kanye nekujula” kweliciniso. Nabenta njalo, ‘bebatawucina futsi basime’ ekukholweni. (Ef. 3:14-19) Natsi kufanele sente lokufanako. w23.10 18 ¶1-3

LiBhayibheli linetibonelo letinyenti tebantfu lababeketela. Tinike sikhatsi sekucwaninga ngaletibonelo. Sibonelo nje, nanobe Davide agcotjwa asemncane kutsi utawuba yinkhosi yaka-Israyeli, kwadzingeka kutsi alindze iminyaka leminyenti ngaphambi kwekutsi acale kubusa. Simeyoni na-Ana bakhonta Jehova ngekwetsembeka njengobe bebasalindzele Mesiya. (Luk. 2:25, 36-38) Njengobe usafundza ngaletibonelo, yetama kuphendvula nayi imibuto: Yini lokungenteka yasita lomuntfu kutsi abeketele? Kwamsita njani kubeketela? Ngingamlingisa njani? Kungakusita nekufundza ngalabo labangazange babeketele. (1 Sam. 13:8-14) Ungatibuta: ‘Yini lokungenteka yenta bangabeketeli? Ngumiphi imiphumela lababhekana nayo?’ w23.08 25 ¶15

Umphostoli Phetro beketsembekile; akazange avumele lutfo kutsi lumyekelise kuba ngumlandzeli waJesu. Nasi sibonelo, ngalelinye lilanga Jesu washo lokutsite lebebangakucondzi bafundzi bakhe. (Joh. 6:68) Kunekutsi balindzele kutsi abachazele, labanyenti bayekela kulandzela Jesu. Kodvwa hhayi Phetro. Bekati kutsi nguJesu kuphela “lonemavi laholela ekuphileni lokuphakadze.” Jesu bekati kutsi Phetro kanye nalalabanye baphostoli bebatamshiya. Nobe kunjalo, Jesu washo kutsi bekaciniseka kutsi Phetro bekatawubuya futsi ahlale atsembekile. (Luk. 22:31, 32) Jesu bekati kutsi “umoya . . . uyalangatelela, kodvwa inyama ibutsakatsaka.” (Mak. 14:38) Ngako ngisho nobe Phetro amphika, Jesu akazange amlahle. Ngemuva kwekuvuswa kwakhe wabonakala kuPhetro, mhlawumbe wabonakala kuye ayedvwa. (Mak. 16:7; Luk. 24:34; 1 Khor. 15:5) Loku kungenteka kwamcinisa kakhulu lomphostoli lobekadvumatekile! w23.09 22 ¶9-10

Nkulunkulu ucolela nobe ambonye tono talabo labanekukholwa kuye. Ubacolela ngalokuphelele futsi angababaleli letono. (Hla. 32:1, 2) Bantfu labanjalo ubatsatsa njengalabangasoleki nalabalungile ngenca yekukholwa kwabo. Nanobe Abrahama, Davide kanye naletinye tikhonti taNkulunkulu letetsembekile kwatsiwa tilungile, betisolo tinaso sono. Kodvwa ngenca yekutsi betinekukholwa, Nkulunkulu watitsatsa njengaletingasoleki ikakhulukati naticatsaniswa nalabo lebebangamkhonti. (Ef. 2:12) Njengobe umphostoli Pawula akucacisa encwadzini yakhe, kukholwa kubalulekile kuze umuntfu abe nebuhlobo lobuhle naNkulunkulu. Nguloko lokwasita Abrahama kanye naDavide, futsi nguloko lokungasisita natsi. w23.12 3 ¶6-7

Lamuhla, onkhe emaKhristu anelitfuba lelihle lekunikela imihlatjelo kuJehova ngekutsi asebentise sikhatsi sawo, emandla kanye netintfo tawo kuze akhonte Nkulunkulu. Singakhombisa kutsi sibonga kakhulu ngelitfuba lesinalo lekukhonta Jehova ngekutsi simnike imihlatjelo lencono kakhulu. Umphostoli Pawula washo tintfo letiphatselene nekukhonta kwetfu Nkulunkulu lokungakafaneli sitiyekele. (Heb. 10:22-25) Letintfo tifaka ekhatsi kuthantaza kuJehova, kushumayela, kuhlangana ndzawonye emihlanganweni yelibandla, kanye nekukhutsatana, ‘ikakhulukati njengobe sibona lilanga [laJehova] lisondzela.’ Ngasekwephetseni kwencwadzi yeSembulo, ingilosi yaJehova yawasho kabili emavi latsi: “Khonta Nkulunkulu,” kuze igcizelele. (Semb. 19:10; 22:9) Shengatsi singahlale silikhumbula leliciniso lelijulile lelimayelana nelithempeli laJehova lelingumfanekiso kanye nelitfuba lelihle lesinalo lekukhonta Nkulunkulu wetfu. w23.10 29 ¶17-18

Sonkhe siyafuna ‘kuchubeka sitsandzana.’ Nobe kunjalo, kubalulekile kutsi sikhumbule secwayiso saJesu sekutsi “bantfu labanyenti batawuphelelwa lutsandvo.” (Mat. 24:12) Jesu bekangasho kutsi linyenti lebafundzi bakhe belitawuyekela kuba nelutsandvo. Nobe kunjalo, kufanele sigadze kutsi ungasingeni umoya walelive wekuba bete lutsandvo. Sinaloko engcondvweni, ase sicoce nganangu umbuto lobalulekile lotsi: Kukhona yini lokungasisita sibone kutsi lutsandvo lwetfu ngebazalwane nabodzadze lucinile? Lenye indlela lesingabona ngayo kutsi lucine kangakanani lutsandvo lesinalo ngalabanye, kubuka indlela lesenta ngayo nakuvela timo letitsite. (2 Khor. 8:8) Umphostoli Phetro wakhuluma ngalesinye saletimo nakatsi: “Ngetulu kwako konkhe, tsandzanani kakhulu, ngobe lutsandvo lumbonya tono letinyenti.” (1 Phet. 4:8) Ngako butsakatsaka balabanye nemaphutsa abo kungasenta sibone kutsi lucine kangakanani lutsandvo lwetfu ngabo. w23.11 10-11 ¶12-13

Angeke sisho kutsi siyawulalela umyalo waJesu wekutsi sitsandzane nangabe sitsandza labanye ebandleni kodvwa labanye singabatsandzi. Kuliciniso kutsi singahle sisondzelane kakhulu nalabanye njengaJesu. (Joh. 13:23; 20:2) Kodvwa umphostoli Phetro usikhumbuta kutsi kufanele setame ‘kubatsandza bonkhe bazalwane’ betfu, sibatsandze ngatsi bangemalunga emindeni yetfu. (1 Phet. 2:17) Phetro wasikhutsata kutsi ‘sitsandzane kakhulu ngalokusuka enhlitiyweni.’ (1 Phet. 1:22) Kulendzaba, kutsandza “kakhulu” kusho kutsandza lotsite ngisho nobe kumatima kumtsandza. Sibonelo nje, kutsiwani nangabe umzalwane akuphetse kabi nobe akuvise buhlungu? Kungekwemvelo kutsi sifune kutiphindziselela kunekutsi sikhombise lutsandvo. Nanobe kunjalo, Phetro wafundza kuJesu kutsi kutiphindziselela akumjabulisi Nkulunkulu. (Joh. 18:10, 11) Phetro wabhala watsi: “Ningaphindziseli lokubi ngalokubi, nobe kwetfukwa ngekwetfuka. Esikhundleni saloko busisani.” (1 Phet. 3:9) Nangabe ubatsandza kakhulu bazalwane nabodzadze utawuba nemusa futsi ubacabangele. w23.09 28-29 ¶9-11

Iyasimangalisa indlela umntfwana lasheshe akhule ngayo. Kubonakala ngatsi loko kuyatentakalela. Nobe kunjalo, kuba ngumKhristu lovutsiwe akutentakaleli. (1 Khor. 13:11; Heb. 6:1) Kuze sifinyelele lomgomo, kufanele sibe nebuhlobo lobuhle naJehova. Ngetulu kwaloko, sidzinga umoya wakhe longcwele kuze usisite sibe nebuntfu lobumjabulisako, sifundze emakhono lalusito futsi sitilungiselele imisebenti lokungenteka siyente esikhatsini lesitako. (Taga 1:5) Jehova wenta bantfu kwaba ngumfati nendvodza. (Gen. 1:27) Kusebaleni kutsi indvodza yakheke ngendlela leyehlukile kunemfati, kodvwa kunaletinye tindlela labehlukene ngato. Sibonelo nje, Jehova wenta kutsi indvodza nemfati badlale indzima lengafanani, ngako kufanele babe nebuntfu lobutsite futsi bafundze emakhono latawubasita kutsi bakhone kufeza lendzima yabo.​—Gen. 2:18. w23.12 18 ¶1-2

Jesu bekafuna yini kutsi labanye basebentise ligama laBabe wakhe? Yebo. Kungenteka labanye baholi benkholo bangaleso sikhatsi bebakholelwa kutsi kubita ligama laNkulunkulu kukhombisa kungahloniphi, kodvwa Jesu akazange avumele lamasiko langakasekelwa emibhalweni amvimbele kutsi advumise libito laBabe wakhe. Cabanga ngalesikhatsi elapha lenye indvodza lebeyinemadimoni endzaweni yemaGerasa. Bantfu bakulendzawo besaba kakhulu futsi bamncenga kutsi ahambe, ngako Jesu wahamba. (Mak. 5:16, 17) Nobe kunjalo, bekafuna kutsi libito laNkulunkulu latiwe kulendzawo. Ngako watjela lendvodza lebekayelaphile kutsi itjele bantfu ngaloko bekwentiwe nguJehova, hhayi loko bekwentiwe nguye. (Mak. 5:19) Ufuna lokufanako nalamuhla, ufuna kutsi sente libito laBabe wakhe latiwe emhlabeni wonkhe! (Mat. 24:14; 28:20) Nasenta njalo, sisuke sijabulisa Jesu loyiNkhosi yetfu. w24.02 10 ¶10

Sibusiseke kakhulu ngekuba yincenye yenhlangano yaJehova kulamalanga ekugcina lamatima. Njengobe lelive liya liba libi kakhulu, Jehova usinikete umndeni lonebunye, lowakhiwa bazalwane betfu nabodzadze. (Hla. 133:1) Usisita kutsi sibe nebudlelwane lobuhle nemalunga emindeni yetfu. (Ef. 5:33–6:1) Uphindze asinikete kucondza kanye nekuhlakanipha lesikudzingako kuze sibe nekuthula mbamba. Nanobe kunjalo, kufanele sente konkhe lesingakwenta kuze sichubeke sikhonta Jehova ngekwetsembeka. Ngasiphi sizatfu? Ngenca yekutsi ngaletinye tikhatsi sihle sitfukutseliswa ngemaphutsa lentiwa ngulabanye. Singahle sidvumateke nasenta emaphutsa, ikakhulukati nangabe siphindzaphindza liphutsa linye. Kufanele sichubeke sikhonta Jehova (1) ngisho nobe umzalwane nobe dzadze asivisa buhlungu, (2) nangabe lesishade naye asidvumata, (3) nalapho sidvunyatwa ngemaphutsa lesiwentako. w24.03 14 ¶1-2

Utawuhle uva ngalokwentiwe bazalwane nabodzadze kuze bente lokunyenti ekukhonteni Jehova. Mhlawumbe baye eSikolweni Sebavangeli BeMbuso nobe batfutsele lakunesidzingo lesikhulu khona sebamemeteli. Nangabe ungakhona kutibekela lomgomo, yenta njalo. Bantfu baJehova bahlale bafuna ematfuba ekwenta lokunyenti emsebentini wakhe. (Imis. 16:9) Kodvwa yini longayenta nangabe ungakhoni kwenta njalo nyalo? Ungacabangi kutsi awusilutfo nawucatsaniswa nalabo labakhonako kukwenta. Lokubalulekile kutsi uchubeke ucinisela. (Mat. 10:22) Hlale ukhumbula kutsi Jehova ujabula kakhulu ngaloko lokhona kukwenta kuye ngemakhono akho netimo takho. Leyo yindlela lebalulekile yekuchubeka ulandzela Jesu ngemuva kwekubhajatiswa.​—Hla. 26:1. w24.03 10 ¶11

Babe wetfu wasezulwini wetsembisa kusicolela nasiphendvuka. (Hla. 86:5) Ngako nangabe siphendvuke mbamba etonweni lesitentile, singametsemba nakatsi usicolele. Khumbula kutsi Jehova akasilukhuni futsi uyacabangela. Akalindzeli kutsi sente lokungetulu kwemandla etfu. Uyajabula ngaloko lesikwentako, kuphela nje nasenta konkhe lesingakhona kukwenta. Cabanga ngalabo lokukhulunywa ngabo eBhayibhelini labakhonta Jehova ngemphefumulo wabo wonkhe. Sibonelo nje, cabanga ngemphostoli Pawula. Kwaphela iminyaka leminyenti asebenta ngekutimisela, ahamba libanga lelidze futsi asungula emabandla lamanyenti. Kodvwa ngesikhatsi timo tenta kutsi angasakhoni kwenta lokunyenti emsebentini wekushumayela, Nkulunkulu wabese akasamemukeli yini? Cha. Wachubeka enta loko langakhona kukwenta futsi Jehova wambusisa. (Imis. 28:30, 31) Ngendlela lefanako, loko lesingakwentela Jehova kungahle kushintje. Kodvwa lokubalulekile kuye sizatfu setfu sekukwenta. w24.03 27 ¶7, 9

Jesu wabekela bafundzi bakhe sibonelo labangasilingisa asebentisa imithantazo yakhe. Kuso sonkhe lesikhatsi enta umsebenti wakhe wekushumayela, Jesu bekathantaza tikhatsi letinyenti. Bekabekela eceleni sikhatsi sekuthantaza ngobe bekahlale amatasatasa futsi bekavame kuba nebantfu labanyenti. (Mak. 6:31, 45, 46) Bekavuka ekuseni kakhulu kuze athantaze ayedvwana. Ngalelinye lilanga, wathantaza busuku bonkhe ngaphambi kwekwenta sincumo lesibalulekile. (Luk. 6:12, 13) Ngetulu kwaloko, Jesu wathantaza ngalokuphindzaphindziwe ngebusuku lebebungaphambi kwekufa kwakhe njengobe bekanake kakhulu kucedzisa incenye lematima yesabelo sakhe salamhlabeni. (Mat. 26:39, 42, 44) Sibonelo saJesu sisifundzisa kutsi kufanele sibekele eceleni sikhatsi sekuthantaza ngisho nobe simatasatasa kangakanani. NjengaJesu, kufanele sisibekele eceleni sikhatsi sekuthantaza. Loko kungasho kusheshe sivuke nobe kuphutaphuta kulala. Nasenta njalo, sikhombisa Jehova kutsi siyabonga ngalesipho lesiligugu. w23.05 3 ¶4-5

Naka emavi latsi “lugcwaliswe etinhlitiyweni” labhalwe kulombhalo welusuku walamuhla. Lenye incwadzi iluchaza ngekutsi “lwehlela kitsi njengemfula.” Lesi sitfombe mcondvo lesinemandla, futsi siveta kutsi Jehova ubatsandza kakhulu labagcotjiwe! Nabo bayati kutsi Nkulunkulu uyabatsandza. (Juda 1) Umphostoli Johane waveta indlela labativa ngayo nakabhala atsi: “Asenibuke kutsi lukhulu kangakanani lutsandvo Babe lasikhombise lona! Usibite ngekutsi sibantfwana bakhe.” (1 Joh. 3:1) Jehova utsandza labagcotjiwe kuphela yini? Cha, usikhombisile kutsi usitsandza sonkhe. Yini lesicinisekisa kakhulu kutsi Jehova uyasitsandza? Yinhlawulo. Ngalesipho, Jehova ukhombise kwendlula nobe ngubani kutsi usitsandza kakhulu!​—Joh. 3:16; Rom. 5:8. w24.01 28 ¶9-10

Lelivesi lelingenhla liveta indlela Davide lakuncoba ngayo kwesaba kwakhe. Ngisho nobe kuphila kwakhe bekusengotini, wacabangisisa ngaloko Jehova bekasetawumentela kona. Davide bekati kutsi Jehova utamkhulula ngesikhatsi lesifanele. Ngetulu kwako konkhe, Jehova bekatsite Davide utawuba yinkhosi lelandzelako yaka-Israyeli. (1 Sam. 16:1, 13) KuDavide, nobe yini Jehova layetsembisile bekufana nekutsi seyentekile. Yini Jehova latsembise kukwentela yona? Asikalindzeli kutsi asivikele kuto tonkhe tinkinga. Nobe kunjalo, nobe ngutiphi tinkinga longabhekana nato kulelive, Jehova utawuticedza emhlabeni lomusha. (Isa. 25:7-9) UMdali wetfu unemandla lamakhulu ekuvusa labafile, ekuselapha nekususa bonkhe labo labasiphikisako.​—1 Joh. 4:4. w24.01 6 ¶12-13

Cabanga ngekutsi yini leyakwenta wanikela kuphila kwakho kuJehova futsi wabhajatiswa. Loko wakwenta ngobe bewufuna kuba seluhlangotsini lwaJehova. Cabanga nangekutsi yini leyakusita waciniseka kutsi ulitfolile liciniso. Wangenisa lwati lolungulonalona ngaJehova futsi waya ngekumhlonipha kakhulu waphindze wamtsandza kakhulu njengobe anguBabe wakho wasezulwini. Waba nekukholwa futsi waphendvuka. Inhlitiyo yakho yakwenta kutsi uyekele kwenta tintfo letimbi futsi uphile ngekuvumelana nentsandvo yaNkulunkulu. Wativa ukhululekile nawubona kutsi Nkulunkulu ukucolele. (Hla. 32:2) Wacala kuya emihlanganweni yebuKhristu futsi wacocela labanye tintfo lebewutifundzile. Njengobe nyalo ungumKhristu lotinikele kuJehova futsi wabhajatiswa, uhamba endleleni leya ekuphileni futsi utimisele kuchubeka uhamba kuyo. (Mat. 7:13, 14) Shengatsi singema sicine futsi sihlale sitsandza Jehova, silalele nemiyalo yakhe. w23.07 17 ¶14; 19 ¶19

Kucabanga ngemthantazo lowawenta nawutinikela kuJehova kutakunika emandla ekulwa nesilingo. Sibonelo nje, utawutisondzeta kakhulu yini kumuntfu webulili lobehlukile loshadile? Cha! Sewumetsembisile Jehova kutsi awuyuze uyente intfo lenjalo. Nawenta njalo, ngeke kwakheke imiva lengakafaneli lokutawutsi ngekuhamba kwesikhatsi ulwe kamatima kuze uyisuse ngemuva kwekutsi seyakhekile. Angeke ‘usondzele’ “endleleni yalabakhohlakele.” (Taga 4:14, 15) Kukhumbula kutsi Jesu bekatimisele kujabulisa Babe wakhe kutakwenta ume ucine futsi ukugweme ngekushesha kwenta tintfo lowatiko kutsi ngeke timjabulise Nkulunkulu lotinikele kuye. (Mat. 4:10; Joh. 8:29) Liciniso likutsi tinkinga netilingo kukunika litfuba lekukhombisa kutsi utimisele kuchubeka ulandzela Jesu. Ungaciniseka kutsi Jehova utakusita. w24.03 9-10 ¶8-10