Sondzela KuNkulunkulu

Nakasitsetselela Nkulunkulu, Uyakhohlwa Yini?

NGALAMAFISHANE nje, kunjalo. Setsembiso saJehova kubantfu labemukelwa nguye sitsi: “Ngiyawubatsetselela bubi babo, tono tabo ngingasaphindzi ngitikhumbule.” (Jeremiya 31:34) Ngako-ke, Jehova usicinisekisa ngekutsi nangabe atsetselela toni letiphendvukako, akaphindzi atikhumbule tono tato. Loko kusho kutsi uMdali wendzawo yonkhe akatikhumbuli yini tono latitsetselele? Emavi latfolakala encwadzini yaHezekeli asicacisela indlela Nkulunkulu latsetselela futsi akhohlwe ngayo.—Fundza Hezekeli 18:19-22.

Asebentisa umphrofethi Hezekeli njengemkhulumeli wakhe, Jehova wamemetela sehlulelo lesimayelana nebantfu bakaJuda nebaseJerusalema lebebangaketsembeki. Sonkhe lesive sakushiya kukhonta Jehova futsi sabangela kutsi live ligcwale budlova. Jehova washo kutsi baseBhabhulona batalibhubhisa liJerusalema. Nanobe akhipha sehlulelo lesinjalo, Jehova wabatjela nemlayeto welitsemba. Umuntfu ngamunye bekanenkhululeko yekutikhetsela futsi bekatatitfolela imiphumela yetento takhe.—Emavesi 19, 20.

Kutsiwani-ke nangabe umuntfu ayekela kwenta lokubi ente lokuhle? Jehova utsi: “Nangabe umuntfu lomubi aphendvuka kuto tonkhe tono latentile, agcine tonkhe timiso tami, ente lokucotfo nalokulungile, akasayikufa, uyawuphila.” (Vesi 21) Kuliciniso kutsi Jehova ‘abekulungele kutsetselela’ soni lesiphendvukako etindleleni taso letimbi, nasiphendvuke ngebucotfo.—Tihlabelelo 86:5.

Kutsiwani ngetono soni lesitentile? Jehova utsi: “Kute nasinye setono labesatentile lesiyawukhunjulwa kuye simelane naye.” (Vesi 22) Naka kutsi tono tebantfu labaphendvukako ngeke ‘tikhunjulwe timelane nabo.’ Kubaluleke ngani loku?

EBhayibhelini, ligama lesiHebheru lelihunyushwe ngekutsi “khumbula” lingasho lokungetulu kwekumane nje ukhumbule lokwentekile. Mayelana naleligama, lenye incwadzi itsi: “Etikhatsini letinyenti livame kusho sento nobe inhlanganisela yetento.” Ngako “kukhumbula” kungasho “kwenta lokutsite.” Ngaleso sizatfu, ngalesikhatsi Jehova atsi soni lesiphendvukako tono taso ngeke ‘tikhunjulwe timelane naso,’ abesho kutsi ngeke amelane nemuntfu lowonile, amlahle nobe amjezise ngenca yetono lasamtsetselele tona.a

Emavi laku-Hezekeli 18:21, 22 asakhela sitfombe lesitsintsa inhlitiyo ngendlela Jehova latsetselela ngayo. Nakasitsetselela tono tetfu, Jehova akayuze asikhumbute ngato esikhatsini lesitako. Esikhundleni saloko, utsatse tono tebantfu labaphendvukile watilahla ngemuva kwakhe. (Isaya 38:17) Kufana nekutsi utesulile.—Imisebenti 3:19.

Njengobe sibantfu labanesono, sidzinga umusa waNkulunkulu. Ngetulu kwaloko, sona kanyenti. (Roma 3:23) Jehova ufuna sati kutsi nasiphendvuka mbamba, ukulungele kusitsetselela. Nase asitselele uyakhohlwa, ngeke asijezisele sono lasitsetselele sona. Kuyasidvudvuta loko. Umusa waNkulunkulu awukwenti yini ufune kusondzela kuye?

[Umbhalo longentansi]