BATINIKELA NGEKUTITSANDZELA ENew York

EMINYAKENI lembalwa leyendlulile, Cesar nemfati wakhe Rocio, bebaphila imphilo lemnandzi eCalifornia. Cesar abesebenta sikhatsi sonkhe ekwakheni tintfo tekutifutfumeta netekungenisa umoya kantsi Rocio bekasebenta emalanga latsite evikini ehhovisi ladokotela. Bebanelikhaya lelitsi bona futsi bete bantfwana. Nobe kunjalo, kunentfo leyashintja kuphila kwabo. Bekuyini?

Nga-October 2009, lihhovisi leligatja laseMelika latfumela incwadzi kuwo onkhe emabandla lakulelo live, lamema bantfu labanemakhono kutsi bafake ticelo tekusebenta eBethel sikhashana kute basite ekukhuliseni sakhiwo seligatja lesiseWallkill, eNew York. Ngisho nalabo lasebangetulu kwebudzala lobudzingekako eBethel, bamenywa kutsi bafake ticelo tabo. Cesar naRocio batsi: “Ngesizatfu sekutsi sesibadzala, besati kahle kutsi leli ngulona tfuba lesinalo lekukhonta eBethel. Besingafuni lisigeje!” Ngako bamikisa ticelo tabo ngekushesha.

Kwaphela sikhatsi lesingetulu kwemnyaka solo boCesar naRocio bangabitwa eBethel. Nanobe kunjalo, batsatsa letinye tinyatselo kuze bente kuphila kwabo kube melula. Cesar utsi: “Sashintja ligalaji letfu laba likamelo khona sitewucashisa umuntfu lotsite. Ngemuva kwaloko, satfutsa endlini yetfu lenkhulu lebesiyakhe eminyakeni lembalwa leyendlulile futsi saya endlini lebeyiyincane kunaleyo. Kwenta letingucuko kwasenta saba sesimeni lesikahle sekwemukela simemo sekukhonta eBethel nakwenteka sisitfola.” Kwentekani ngemuva kwaloko? Rocio utsi: “Ngemuva kwenyanga sitfutsele endlini yetfu lencane, satfola simemo sekuyokhonta njengemavolontiya esikhashana eWallkill. Kwacaca kutsi ngekwenta kuphila kwetfu kube melula, sente kutsi Jehova asibusise.”

BATFOLA TIBUSISO NGENCA YEKUTIDZELA KWABO

NjengaCesar naRocio, bazalwane nabodzadze labanyenti batidzelile kute babe nencenye emsebentini wekwakha lowentiwa eNew York State. Labanye kulabazalwane basita ekukhuliseni sakhiwo lesiseWallkill, kantsi labanye batfole lilungelo lekusita ekwakheni indlunkhulu yemhlaba wonkhe leseWarwick.a Bantfu labanyenti labashadile bashiye emakhaya abo lamahle, imisebenti leholela kahle, kanye netilwane tabo tasekhaya kuze bakhonte Jehova ngalokugcwele. Jehova uwubusisile yini umoya wabo wekutidzela? Yebo, uwubusisile!

Sibonelo saloku kutsi Way, losebenta ngabogesi kanye naDebra, labaseminyakeni yabo-50 budzala, batsengisa likhaya labo kanye netintfo tabo letinyenti eKansas futsi batfutsela eWallkill kute bakhonte eBethel emalanga latsite evikini.b Nanobe kudzingeke kutsi bente tingucuko ekuphileni kwabo, beva shengatsi lokutidzela kubazuzise kakhulu. Nakakhuluma ngesabelo sakhe eBethel, Debra utsi: “Ngalesinye sikhatsi ngiva shengatsi nginencenye ekwakheni tindlu ePharadisi njengobe kuvame kuvela etincwadzini tetfu!”

BoMelvin naSharon batsengisa likhaya labo netintfo tabo eNingizimu Carolina kuze bakhone kuba nencenye emsebentini lowentiwa eWarwick. Nanobe bekungasimelula kutidzela, bativa babusisekile ngekuba nencenye kulomsebenti lobalulekile. Batsi: “Yinkhulu kakhulu injabulo letfolakala ngekwati kutsi wenta intfo letawuzuzisa inhlangano yemhlaba wonkhe.”

Kenneth, longumakhi losatsetse umhlalaphansi, naMaureen, labaseminyakeni yabo-50 budzala, batfutsela eCalifornia kute basite emsebentini lowentiwa eWarwick. Kuze bakhone kutfutsa, bacela lomunye dzadze ebandleni kutsi anakekele likhaya labo baphindze bacela umndeni wabo kutsi unakekele babe waKen losagugile. Bayatisola yini ngekutidzela kwabo kuze bakhonte eBethel? Cha! Ken utsi: “Sizuza kakhulu. Nanobe sibhekana netinsayeya, kodvwa siphila kuphila lokujabulisako futsi sikhutsata labanye ngenhlitiyo yonkhe kutsi bawucabangele lomsebenti.”

KUBHEKANA NETINSAYEYA

Linyenti lalabo labatidzelile kudzingeke kutsi libhekane netinsayeya letitsite. Nasi sibonelo: William naSandra, labaseminyakeni yabo-60 budzala bebaphila kahle futsi bajabulile ePennsylvania. Bebanenkampani lechuba kahle leyakha tinsimbi temishini futsi bebacashe bantfu labangu-17. Bebasolo bakhonta ebandleni lebebakulo kusukela babancane, futsi linyenti letihlobo tabo belihlala kuleyo ndzawo. Ngesikhatsi kuvuleka litfuba lekutsi bayosebenta emalanga latsite eWallkill, bebati kutsi loko bekutawusho kushiya cishe konkhe lebebakutayele. William utsi: “Intfo lebeyiyinkinga kakhulu kitsi bekukushiya imphilo yetfu lemnandzi.” Nanobe kunjalo, ngemuva kwekuthantaza tikhatsi letinyenti, bakhetsa kuchubeka nekutfutsa, futsi abatisoli ngaloko. William utsi: “Angeke uyicatsanise nalutfo injabulo lesiyitfola ngekuba nencenye kulomsebenti kanye nekukhonta nemalunga emndeni waseBethel. Mine naSandra sijabula ngendlela lesingazange sesijabule ngayo ekuphileni!”

Ricky, lobekangumphatsi wenkampani yekwakha eHawaii, wacelwa kutsi ayosebenta emalanga latsite eBethel kuze asite emsebentini loseWarwick. Umfati wakhe Kendra, abefisa kutsi asemukele lesicelo. Nobe kunjalo, bebakhatsateke ngenhlalakahle yendvodzana yabo Jacob, lebeyineminyaka lengu-11 budzala. Bebatibuta kutsi kukuhlakanipha yini kutfutsela eNew York State nekutsi indvodzana yabo beyitawukhona yini kujwayela indzawo lensha.

Ricky utsi: “Umgomo wetfu lomkhulu bekukutfola libandla lelinebantfwana labanebuhlobo lobuhle naNkulunkulu. Besifuna Jacob abe nebangani labanyenti labakahle.” Kodvwa libandla labagcine bakulo belinebantfwana labambalwa futsi linemalunga emndeni waseBethel lamanyenti. Ricky utsi: “Ngemuva kwekuya emhlanganweni welibandla kwekucala, ngabuta Jacob kutsi bekativa njani ngalelibandla lelisha, ikakhulukati ngobe bekute bontsanga yakhe. Watsi: ‘Ungakhatsateki Babe, bangani bami kutawuba bazalwane labasebasha labangemalunga aseBethel.’”

Nguloko lokwenteka. Bazalwane labasebasha labangemalunga aseBethel baba bangani baJacob. Loko kwaba namuphi umphumela? Ricky utsi: “Ngalelinye lilanga ebusuku, bengengca ekamelweni laJacob futsi ngabona kutsi abesolo akhanyisile. Bengicabanga kutsi ngitamkhandza adlala umdlalo we-video, kodvwa ngamkhandza afundza liBhayibheli! Nangimbuta kutsi wentani, watsi: ‘Ngilungiselela kuba lilunga laseBethel futsi ngitawucedza kufundza liBhayibheli ngemnyaka munye.’” Ricky naKendra bajabula kakhulu, hhayi ngobe nje Ricky anencenye emsebentini wekwakha eWarwick kodvwa nangesizatfu sekutsi kutfutsa kwabo kwente indvodzana yabo yatfutfuka ebuhlotjeni bayo naNkulunkulu.​—Taga 22:6.

ABAKHATSATEKI NGELIKUSASA

Umsebenti wekwakha eWallkill naseWarwick utawugcine uphelile, futsi labo labamenywe kutsi batewusita bayati kutsi lomsebenti wesikhashana. Labazalwane nabodzadze bakhatsateke kakhulu yini ngekutsi batawubese bayaphi nome benteni? Cha! Labanyenti bativa ngendlela imindeni lemibili yaseFlorida leseminyakeni yabo-50 budzala letiva ngayo. John, longumphatsi wenkampani yekwakha nemfati wakhe Carmen, labatisebenti tesikhashana eWarwick batsi: “Siyibonile indlela Jehova latinakekele ngayo tidzingo tetfu kuze kube ngunyalo. Siyati kutsi njengobe Jehova asinike lomsebenti ngeke asilahle esikhatsini lesitako.” (Hla. 119:116) Luis, lowakha tintfo tekucima umlilo, nemfati wakhe Quenia, basebenta eWallkill. Batsi: “Sisibonile sandla saJehova lesinemusa sinakekela tidzingo tetfu. Nanobe singati kutsi utasinakekela njani, nini futsi kuphi, kepha siyaciniseka kutsi utawuchubeka asinakekela.”​—Hla. 34:10; 37:25.

KUTFOLA “TIBUSISO LETINYENTI,” UZE UNGESWELI LUTFO

Labanyenti kulabo labasita ekwakheni eNew York bebangabeka taba tekungabi nencenye kulomsebenti. Kepha balinge Jehova njengobe sonkhe asimema kutsi sente njalo, nakatsi: “Ase ningilinge, . . . nitewubona kutsi ngingeke yini nginivulele emafasitelo asezulwini ekutfulula, nginitfululele tibusiso letinyenti, nize nehluleke kutfola indzawo leyenele yekutigcina.”​—Mal. 3:10.

Utamlinga yini Jehova kute utfole tibusiso takhe letinyenti? Ngemthantazo, hlola kutsi yini longayenta kuze ube nencenye emsebentini lomkhulu lowentiwako, kungaba kuseNew York nome kuletinye takhiwo tebuKhristu, futsi utibonele kutsi Jehova utakubusisa kangakanani.​—Mak. 10:29, 30.

Dale, longunjiniyela wekwakha, kanye naCathy, lababuya e-Alabama, babakhutsata kakhulu labanye kutsi babe nencenye kulomsebenti. Njengobe bavolontiya eWallkill, batsi: “Nawunesibindzi sekushiya imphilo yakho lemnandzi, utawubona umoya waJehova usebenta.” Yini ledzingekako kuze ube nencenye kulomsebenti? Dale utsi: “Yenta konkhe lokusemandleni akho kuze wente kuphila kwakho kube melula. Ngeke utisole!” Gary, lobuya eNyakatfo Carolina, sewusebente enkampaneni yekwakha iminyaka lengu-30. Yena nemfati wakhe Maureen, batsi lesinye sibusiso labasijabulelako eWarwick “kuhlangana nebazalwane nabodzadze labasebentisa kuphila kwabo ekukhonteni Jehova eBethel nekusebenta nabo.” Gary uchubeka atsi: “Kuze ube sisebenti saseBethel, kufanele wente kuphila kwakho kube melula, lokuyindlela lencono kakhulu yekuphila kulelive lelibi.” Jason, lobekasebenta enkampaneni lefakela bantfu gesi, kanye naJennifer, labasuka e-Illinois, batsi kusebenta eWallkill futsi wente umsebenti waseBethel “kukwenta utive shengatsi sewuvele useveni lelisha.” Jennifer uchubeka atsi: “Kujabulisa kakhulu kwati kutsi yonkhe intfo loyentako iyamjabulisa Jehova futsi uyitsatsa njengalebaluleke kakhulu. Jehova utawuciniseka kutsi ukubusisa kakhulu.”