SIHLOKO LESINGUMGOGODLA | BEKUDZINGEKE NGANI KUTSI JESU AHLUPHEKE APHINDZE AFE?
Wavuswa Mbamba Yini Jesu?
Jesu waseNazaretha wabulawa ngentfwasahlobo yanga-33 C.E. Wamangalelwa ngemanga ekutsi uvukela umbuso, wabhacabulwa futsi wabetselwa esigodvweni. Wafa kabuhlungu. Kodvwa Nkulunkulu wamvusa ekufeni futsi ngemuva kwemalanga langu-40 avusiwe, Jesu wenyukela ezulwini.
Lendzaba lengakavami itfolakala emaVangelini lamane lasemiBhalweni YemaKhristu YesiGriki, leyatiwa kakhulu ngekutsi Lithestamende Lelisha. Kwenteka mbamba yini loko lokukhulunywa ngako? Lona ngumbuto lobalulekile. Ngako, nangabe kungazange kwenteke, kukholwa kwemaKhristu kulite futsi nelitsemba lawo lekuphila phakadze ePharadisi limane liliphupho nje lelingayuze lifezeke. (1 Khorinte 15:14) Kodvwa nangabe loku kwenteka, bantfu banelikusasa lelihle futsi nawe ungaba yincenye yalo. Tiliciniso yini tindzaba letisemaVangelini nobe timane titinganekwane nje?
BUFAKAZI BALOKO
Ngalokungafani nebantfu lababhala tinganekwane, emaVangeli anemininigwane lehlolisisiwe nalecondzile. Sibonelo saloko kutsi agcwele emagama etindzawo letikhona mbamba, bantfu labangavakasha kuto lamuhla. EmaVangeli akhuluma ngebantfu mbamba, futsi netati temlandvo tiyakufakazela loko.—Lukha 3:1, 2, 23.
Babhali bangelikhulu lekucala nelesibili bakhuluma ngaJesu.a Indlela Jesu labulawa ngayo njengoba ichazwe emaVangelini, ivumelana nendlela emaRoma angaleso sikhatsi labekabulala ngayo bantfu. Ngetulu kwaloko, atichazwa ngendlela lecacile nalevakalako tintfo letenteka, aze akhulume nangemaphutsa lentiwa baphostoli baJesu. (Matewu 26:56; Lukha 22:24-26; Johane 18:10, 11) Konkhe loku kuveta kahle kutsi babhali bemaVangeli babhala liciniso ngaJesu.
BUFAKAZI BEKUTSI JESU WAVUSWA
Nanobe kwatiwa kutsi Jesu waphila wase uyafa, labanye abakholwa kutsi wavuswa. Ngisho nebaphostoli bakhe abazange bakholwe nabeva kwekucala kutsi uvusiwe ekufeni. (Lukha 24:11) Kungabata kwabo kwaphela ngesikhatsi labaphostoli kanye nalabanye bafundzi babona Jesu lovusiwe etindzaweni letehlukene. Ecinisweni, ngalesinye sikhatsi kwaba nabofakazi labangetulu kwa-500.—1 Khorinte 15:6.
Nanobe bekungenteka baboshwe futsi babulawe, bafundzi baJesu bamemetela ngesibindzi kutsi uvusiwe, bamemetela nakulabo labambulala. (Imisebenti 4:1-3, 10, 19, 20; 5:27-32) Bekungenteka yini kutsi bafundzi labanyenti babe nesibindzi sekwenta loko babe bangaciniseki kutsi Jesu uvuswe mbamba? Liciniso lekutsi Jesu wavuswa ngilo lelenta kutsi buKhristu bube nemandla emhlabeni lamuhla kanye nasesikhatsini lesendlulile.
Tindzaba letisemaVangelini letimayelana nekufa kwaJesu nekuvuswa kwakhe tiniketa bufakazi balokwenteka kadzeni. Kuwafundzisisa kutakwenta ubone kutsi letintfo tenteka mbamba. Kukholwa kwakho kutawucina kakhulu nawucondza kutsi tentekelani letintfo. Sihloko lesilandzelako sitawuchaza.
a Tacitus, lowatalwa nga-55 C.E., wabhala kutsi “Khristu, lokwatsatselwa kuye ligama lelitsi [emaKhristu], watfola sigwebo lesikhulu ngesikhatsi kubusa Thibheriyusi. Phontiyuse Pilatu naye bekakhona kulelicala.” BoSuetonius, (lowaphila ngelikhulu lekucala); sati semlandvo lesingu Josephus (lowaphila ngelikhulu lekucala) naPliny the Younger, lobekangumbusi waseBithynia (lowaphila ngasekucaleni kwelikhulu lesibili) nabo bakhuluma ngaJesu.