Ticondziso Talabo Lababelwa Tinkhulumo Emhlanganweni Wemsebenti
Kusukela kulo-Msebenti Wetfu WeMbuso wa-September, emagama latsite laseluhlelweni lweMhlangano Wemsebenti entiwe aba melula. Leticondziso kanye naletikhumbuto letilandzelako tilungisa futsi ticacise loko lokwashiwo esihlokweni lesitsi “Indlela Yokulungiselela Umhlangano Wenkonzo,” lesavela ku-Msebenti Wetfu WeMbuso wa-May 2009.
◼ Inkhulumo: Loku kusho inkhulumo lesekelwe ekwatisweni lokwabiwe nobe loniketwe kona, futsi tilaleli akukafaneli tihlanganyele. Sikhulumi kufanele sihlale kuloko lokutawuba lusito kakhulu ebandleni.
◼ Imibuto Netimphendvulo: Ngalokufanana neSifundvo se-Sicongosekulindza, lencenye iba nesetfulo kanye nesiphetfo lesifishane, futsi imibuto kufanele ibutwe kuto tonkhe tigaba. Umzalwane lowabelwe lencenye kufanele angakhulumi kakhulu. Imibhalo leyinhloko ingafundvwa nangabe sikhatsi sivuma. Tigaba akukafaneli tifundvwe ngephandle nangabe ticondziso tisho njalo.
◼ Inkhulumo Ledzingidvwa Netilaleli: Lena yinkhulumo lokuphindze kudzingeke tilaleli tihlanganyele kuyo. Akusiyo nje inkhulumo lecondzile, futsi akusiyo nenkhulumo yemibuto netimphendvulo.
◼ Imiboniso Nemicocandzaba: Sicondziso lesitsi umboniso sisho kutsi umzalwane lowabelwe leyo ncenye kufanele ahlele umboniso; akukafaneli kutsi awente yena loyo mboniso. Labo labakhetsa kutsi bamsite ngemboniso kufanele kube bantfu labaceceshekile futsi babe sibonelo. Nangabe kungenteka, kufanele ahlele nabo kusesenesikhatsi. Kuncono kungabasebentisi bamemeteli labete lokuhlangenwe nako, kunekutsi umane nje ubanike litfuba lekuba sesiteji. Nanobe kunjalo, labanye bangasetjentiswa njengebanikati bemakhaya. Bamemeteli labenta imiboniso kufanele babuke tilaleli. Labo labasetjentiswa emicocandzabeni kufanele bakhulume basesiteji hhayi etihlalweni tabo. Imiboniso kanye nemicocandzaba kufanele iphrakthizwe. Nangabe inkhulumo seyisalelwe sikhatsi lesincane futsi sikhulumi sekufanele siyifishanise, kufanele singayikhiphi imiboniso nemicocandzaba. Tinceku letisebentako kufanele titsintsane nemchumanisi wesigungu salabadzala nobe lomunye lomdzala ngembikwekutsi tikhetse bantfu labatawutisita.
Nangabe kunencenye letsite leneticondziso letehlukile, leto ticondziso kufanele tilandzelwe ngekucaphelisisa. Ngekusingatsa tincenye teMhlangano Wemsebenti ngalendlela lechazwe lapha ngenhla, bazalwane batawukwenta lomhlangano kutsi ‘uchubeke ngekuhleleka.’—1 Khor. 14:40.