Sewusilungele Yini Simo Lesiphutfumako Sekwelashwa?
Simo lesiphutfumako sekwelashwa singavela nobe kunini. (Jak 4:14) Ngako-ke, lohlakaniphile utawukwenta konkhe lokusemandleni akhe kuhlala asilungele. (Taga 22:3) Sewusentile yini sincumo sekutsi nguyiphi indlela yekwelashwa lotayemukela waphindze wayibhala ekhadini lakho? Kute utfole lusito lwekwenta njalo, i-video letsi, “Transfusion-Alternative Health Care—Meeting Patient Needs and Rights”, kanye nencenye yesibili ku-DVD letsi “Transfusion-Alternatives—Documentary Series” ilungiselwe leyo njongo. Nawusayibukela, yetama kubona kutsi ungakwati yini kuphendvula lemibuto lelandzelako. Ngesizatfu sekutsi le-video inetincenye talabahlindvwako, batali kufanele basebentise kuhlakanipha nabayibukela nebantfwana labancane.
(1) Kungani labanye bodokotela kanye nabocwephesha betekwelapha sebakuhlolisisa kabusha kumpontjelwa kwengati? (2) Niketa tibonelo letintsatfu tekuhlindvwa lokuyinkimbinkimbi lokwentiwe ngaphandle kwekumpontjelwa ingati. (3) Kungani tinkhulungwane tabodokotela emhlabeni wonkhe setifisa kwelapha tigulane tato ngaphandle kwekutimpompela ingati? (4) Luhlolo lwakamuva lwetibhedlela luveteni ngekusetjentiswa kwengati? (5) Ngutiphi tingoti temphilo letibangelwa kumpontjelwa ingati? (6) Bodokotela labanyenti bafinyelele kusiphi siphetfo mayelana netinzuzo tekusebentisa letinye tindlela letibenta babalekele kumpompela ingati? (7) Yini lebangela kuncipha kwetinhlayiya letibovu tengati emtimbeni, futsi yini lengasetjentiswa esikhundleni sato? (8) Tinhlayiya letibovu tingakhicitwa njani emtimbeni wesigulane? (9) Ngutiphi tindlela letisetjentiswako kute kuncishiswe kopha nakuhlindvwa? (10) Kwelapha ngaphandle kwengati kungasebenta yini kubantfwana labancane nobe kumuntfu losesimeni lesibucayi? (11) Ngusiphi lesinye simiso lesiyinhloko sekwelapha lokwemukelekako?
Imibiko ikhombisa kutsi bamemeteli labanyenti abakaligcwalisi likhadi labo i-Advance Medical Directive (dpa), labanye abaliphatsi njalo. Babonisi bemacembu kufanele baciniseke kutsi bonkhe labasemacenjini abo bayasilandzela lesicondziso lesibalulekile. Njengobe kwemukela letinye tetindlela tekwelashwa lokukhulunywe ngato kule-video kuyindzaba letsintsa nembeza wemuntfu ngamunye, ungalindzi kudzimate kufike simo lesiphutfumako kube ngukhona ucabanga ngaloko lotakwemukela naloko longeke ukwemukele. Sehluko 7 sencwadzi letsi Elutsandvweni LwaNkulunkulu netikhombo letikuso kanye nesengeto se-Msebenti Wetfu WeMbuso wa-November 2006, sitakusita kutsi utentele sincumo lesisekelwe kuloko lokufundzile. Nangabe ubhajatisiwe, bhala ekhadini lakho i-DPA kutsi yini loyikhetsako bese uliphetsa ngaso sonkhe sikhatsi.
[Blurb on page 3]
Sewusentile yini sincumo sekutsi nguyiphi indlela yekwelashwa lotayemukela waphindze wayibhala ekhadini lakho?