Hlela Nyalo Kwandzisa Sikhatsi Sekushumayela
1. Nguliphi litfuba lesitawuba nalo nga-March, April, nanga-May, futsi singatilungiselela njani?
1 Nga-March, April, nanga-May emnyakeni ngamunye, siba nalelinye litfuba ‘lekumemeta sibonge Simakadze.’ (Hla. 109:30) Utasandzisa yini sikhatsi emsebentini wekushumayela nga-March, njengendlela yekukhombisa kubonga sihlengo kuNkulunkulu? Nyalo sikhatsi sekukuhlelela loko.—Taga 21:5.
2. Wena kanye nalabanye nativa njani ngekuncishiswa kwema-awa ladzingekako kumahlahlandlela lasitako nga-April, emnyakeni lophelile?
2 Kuba Lihlahlandlela Lelisitako: Emnyakeni lophelile emabandla lamanyenti ajabula kakhulu ngelilungiselelo lekuncishiswa kwema-awa emahlahlandlela lasitako nga-April. Lomunye umzalwane wabhala: “Ngisesikolweni selibanga leliphakeme, futsi ngitfole kutsi angikhoni kuba lihlahlandlela lelivamile. Ngitawugcwalisa lifomu lekuba lihlahlandlela lelisebenta ema-awa langu-30, kodvwa ngitatibekela umgomo walangu-50 ngenyanga ya-April.” Lomunye dzadze losebentako wabhala: “Ngingakhona kufinyelela ema-awa langu-30.” Ngesikhatsi kumenyetelwa lelilungiselelo, lomunye dzadze lowake wabalihlahlandlela loseminyakeni yabo-80 watsi: “Lesi ngiso sikhatsi lebengisolo ngisimele. Jehova uyati kutsi ngesikhatsi ngiselihlahlandlela, leso kwakusikhatsi lesincono kakhulu ekuphileni kwami.” Labanye labangeke bakhone kuba ngemahlahlandlela lasitako batatibekela umgomo wekwandzisa sikhatsi sabo emsebentini wekushumayela.
3. Ngutiphi tizatfu lesinato letingasibangela sifise kuba ngemahlahlandlela lasitako nga-March, April, nanga-May?
3 Inyanga ya-March itawuba sikhatsi lesikahle ngobe emahlahlandlela lasitako atawuphindze avumeleke kusebenta ema-awa langu-30 nobe langu-50. Ngetulu kwaloko, kusukela ngeMgcibelo wa-March 17 sitawuba semkhankasweni lokhetsekile wekumema bantfu kutsi bete eSikhumbutweni lesitawuba nga April 5. Labanyenti batawujabulela kwandzisa sikhatsi sabo emsebentini wekushumayela futsi bangatsandza kuchubeka bangemahlahlandlela lasitako nga-April kanye nanga-May ngemgomo lovamile wema-awa langu-50.
4. Singasandzisa njani sikhatsi setfu emsebentini wekushumayela, futsi loko kungaba namiphi imiphumela?
4 EKukhonteni Kwemndeni kwakusihlwa lokulandzelako, angeke kube kuhle yini kutsi nicoce ngekutsi lilunga ngalinye lemndeni lingasandzisa njani sikhatsi salo emsebentini wekushumayela nga-March, April, nanga-May? (Taga 15:22) Celani Jehova kutsi abusise imetamo yenu. (1 Joh. 3:22) Nanandzisa sikhatsi lenisisebentisa emsebentini wekushumayela, loko kutawudvumisa Jehova kuphindze kwandzise nenjabulo yenu.—2 Khor. 9:6.