Ungaba Yini Lihlahlandlela Lelisitako?
1. Yini leyenta March, April na-May abe sikhatsi lesikahle sekwengeta sikhatsi lesishumayela ngaso?
1 Inyanga ya-March, ya-April neya-May isikhatsi lesikahle sekwengeta sikhatsi lesisisebentisa ekushumayeleni. Lesi sikhatsi sekukhombisa kubonga ngelutsandvo lolukhulu lwaJehova ngekutsi wanikela ngeNdvodzana yakhe yaba yinhlawulo. (Joh. 3:16) Lenhlawulo isenta sibonge siphindze sijulise sifiso setfu sekutjela labanye ngaJehova nangaloko lakwentela bantfu. (Isa. 12:4, 5; Luk. 6:45) Kuphindze kube sikhatsi lesijabulela ngaso umkhankaso lokhetsekile wekumema bantfu lesibatiko nalabasensimini kutsi babe natsi eSikhumbutweni. Nase sendlulile, sitakwetama kubuyela kulabo lesibameme baphumelela. Utasandzisa yini sikhatsi losicitsa ushumayela ngekutsi ube lihlahlandlela lelisitako nga-March, April nobe nga-May?
2. Yini leyenta inyanga ya-March ibe yinyanga lekahle yekuba lihlahlandlela lelisitako?
2 Yenta March Abe Yinyanga Lekhetsekile: Inyanga ya-March itawuba sikhatsi lesikahle sekuba lihlahlandlela lelisitako. Labatawubhalisa batawukhetsa kutsi batawusebenta ema-awa langu-30 nobe langu-50. Nangabe liviki lelikhetsekile litawuba nga-March, emahlahlandlela lasitako angaba khona kuwo wonkhe umhlangano wemahlahlandlela lavamile nalakhetsekile. Sikhatsi semkhankaso wekuhambisa timemo teSikhumbuto lesitawuba ngaLesibili, nga-March 26, 2013, seseluliwe kunaseminyakeni leyengcile, ngobe lomkhankaso utawucala nga-March 1. Ngetulu kwaloko, March unetimphelasontfo letisihlanu. Ngako-ke, kungaba njani uhlele timo takho kuze wente March abe yinyanga lekhetsekile kulomnyaka.
3. Singahlela njani kuze sikhone kwandzisa sikhatsi lesishumayela ngaso?
3 Hlela Nyalo: Nyalo sikhatsi sekutsi uhlole timo takho ubuke kutsi ngutiphi tingucuko lokudzingeka utente kuze ukhone kuba lihlahlandlela. Kubalulekile kutsi umndeni ubambisane. Ngako-ke, ngesikhatsi sekuKhonta Kwemndeni kwakusihlwa cocani ngemigomo yenu njengemndeni futsi nente luhlelo lwekuyifinyelela. (Taga 15:22) Nangabe ungeke ukhone kuba lihlahlandlela lelisitako, loko kungakuvisi buhlungu. Ungetama yini kuhlela kutsi usebente lilanga lonkhe ngemalanga lotawuya ngawo ensimini? Emalangeni lovame kuya ngawo ensimini liviki ngalinye, ungalengeta yini lilanga linye?
4. Ngutiphi tintfo letinhle lesitatitfola ngekwandzisa sikhatsi lesitasisebentisa sishumayela nga-March, nga-April nanga-May?
4 Njengobe sitawusebentisa sikhatsi lesinyenti sishumayela nga-March, nga-April nanga-May, injabulo yetfu itawukhula nekwenetiseka lokutfolakala ngekukhonta Jehova nangekupha, kutawukhula. (Joh. 4:34; Imis. 20:35) Lokubaluleke nakakhulu kutsi imetamo yetfu yekutidzela itamjabulisa Jehova.—Taga 27:11.