Ematfuba Lengetiwe Ekudvumisa Jehova
1. Nguliphi lilungiselelo lelisha lelingasisita kutsi ‘sidvumise Jehova’?
1 Nga-March lowendlulile, kucalise lilungiselelo lelisha, leliniketa bamemeteli litfuba lekuba ngemahlahlandlela lasitako langasebentela umgomo wema-awa langu-30 ngenyanga ya-March na-April kanye nangetinyanga tekuvakasha lokuvamile kwembonisi wesifundza. Nangabe emalanga ekuvakasha kwembonisi wesifundza atawuwela etinyangeni letimbili, bamemeteli labafaka ticelo tekuba ngemahlahlandlela labika ema-awa langu-30, bangakhetsa kwenta kuba ngemahlahlandlela kuyinye yaletinyanga. Onkhe emahlahlandlela lasitako angaba khona kuwo wonkhe umhlangano umbonisi wesifundza laba nawo nemahlahlandlela lavamile nalakhetsekile. Loko kusho kutsi noma ngabe singeke sikhone kusebenta ema-awa langu-50, ‘sisengamdvumisa Jehova’ ngekutsi sibe ngemahlahlandlela lasitako lokungenani tikhatsi letine ngemnyaka, sisebentisa lelilungiselelo lemgomo wema-awa langu-30—Hla. 109:30; 119:171.
2. Yini letawujatjulelwa ngulabo labatawuba ngemahlahlandlela lasitako ngesikhatsi sekuvakasha kwembonisi wesifundza?
2 Ngesikhatsi Sekuvakasha Kwembonisi Wesifundza: Manje labanyenti batawukhona kuba ngemahlahlandlela lasitako ngesikhatsi sekuvakasha kwembonisi wesifundza futsi bajabulele kukhutsatana lokuba khona nabasebenta nembonisi wesifundza ensimini. (Rom. 1:11, 12) Emahlahlandlela lasitako lamanyenti kungenteka atsatse lilanga emsebentini wekutiphilisa emkhatsini neliviki kuze akhone kuba sensimini nembonisi wesifundza. Labo labasebentako emkhatsini weliviki bangambuta umbonisi wesifundza kutsi kungamlungela yini kuba sensimini naye ngeMgcibelo nangeLisontfo. Ngetulu kwaloko, kujabulisa kakhulu kutsi emahlahlandlela lasitako abe semhlanganweni kanye nemahlahlandlela lavamile nalakhetsekile.
3. Yini leyenta sikhatsi seSikhumbuto sibe kahle kakhulu ekubeni lihlahlandlela lelisitako?
3 Nga-March na-April: Labo labake balisebentisa lelilungiselelo lekuba ngemahlahlandlela lasitako labika ema-awa langu-30 enyangeni leyodvwa yangesikhatsi seSikhumbuto sebangawuphindza ‘umnikelo wabo wekudvumisa.’ (Heb. 13:15) Totimbili letinyanga, March na-April, tisikhatsi lesikahle sekwandzisa lizinga lemsebenti wetfu wekushumayela ngekutsi sibe ngemahlahlandlela lasitako. Njalo ngemnyaka, ngaleto tinyanga sisuke sisemkhankasweni lojabulisako wekumemela bantfu eSikhumbutweni. Ngetulu kwaloko, ngesizatfu sekutsi labanyenti bayalandzisa lizinga labo lekushumayela ngalesikhatsi seSikhumbuto, singakhona kusebenta insimu nebamemeteli labehlukehlukene. Ngemuva kweSikhumbuto, sivame kuvakashela labo labebakhona eSikhumbutweni, sibakhutsate kutsi baphindze bete nasenkhulumeni lekhetsekile. Awutiva yini unenkhaphunkhaphu yekuwasebentisa kahle lamatfuba lengetiwe lasivulekele ngekutsi ube lihlahlandlela lelisitako?—Luk. 6:45.