Sikhatsi SeSikhumbuto—Silitfuba Lekwandzisa Umsebenti Lesiwentako
1. Ngutiphi tizatfu lesinato tekutsi sicabangele kwandzisa umsebenti lesiwentako nga-March, April, kanye na-May?
1 Ungalandzisa yini lizinga lohlanganyela ngalo emsebentini wekushumayela ngesikhatsi seSikhumbuto lesisondzelako? Labanye bamemeteli batawube batfole sikhatsi sekuphumula emsebentini nobe esikolweni, futsi leso sikhatsi bangasisebentisa ensimini. Kusukela nga-April 2, sitawuba nemkhankaso wekumema bantfu labanenshisekelo kutsi babe natsi eSikhumbutweni nga-April 17. NgeMgcibelo, April 16, kutawube kuLilanga Lamagazini lelikhetsekile. Ngemuva kweSikhumbuto, sitawulwela kutfutfukisa inshisekelo yalabo labatawube bakhona, futsi sibamemele enkhulumeni lekhetsekile letawetfulwa ngeliviki la-April 25. Kuyacaca-ke kutsi tinyenti tizatfu tekucabangela kwandzisa umsebenti lesiwentako nga-March, April, kanye na-May.
2. Nguyiphi lenye indlela lenhle kakhulu yekwenta lokwengetiwe emsebentini wetfu wekushumayela?
2 Kuba Lihlahlandlela Lelisitako: Lenye indlela lenhle kakhulu yekwenta lokwengetiwe emsebentini wetfu kuba lihlahlandlela lelisitako. Njengobe sonkhe simatasatasa, loku kungase kudzinge kutsi sihlele kusenesikhatsi futsi sente lushintjo eluhlelweni lwetfu. (Taga 21:5) Ungase uhlehlise imisebenti letsite lengakabaluleki lovame kuyenta. (Fil. 1:9-11) Kungani ungatjeli labanye ebandleni ngesifiso sakho sekuba lihlahlandlela kute ubone kutsi angeke yini nabo bakhonte njengamahlahlandlela lasitako?
3. Imindeni ingahlela njani kwandzisa umsebenti lewentako?
3 Ekukhonteni kwenu kwemndeni kwakusihlwa lokulandzelako, kungaba kuhle kutsi nicoce ngemigomo yenu njengemndeni. (Taga 15:22) Nangabe nonkhe nibambisana, lamanye emalunga emndeni angaba ngemahlahlandlela lasitako, inyanga leyodvwa nobe letengetiwe. Kutsiwani nangabe nitfola kutsi loku angeke kwenteke? Nisengahlela kwandzisa umsebenti leniwentako ngekutsi ngalesinye sikhatsi nishumayele kusihlwa nobe nicitse sikhatsi lesengetiwe ensimini ngetimphelasontfo.
4. Ngutiphi tibusiso letitawutfolakala ngekwandzisa umsebenti lesiwenta ensimini kulesikhatsi seSikhumbuto?
4 Jehova uyakunaka konkhe lesikwentako kute simkhonte, futsi uyakujabulela kutidzela kwetfu. (Heb. 6:10) Injabulo itfolakala ngekupha Jehova kanye nalabanye bantfu. (1 Khr. 29:9; Imis. 20:35) Ungawandzisa yini umsebenti lowentako kulesikhatsi seSikhumbuto, futsi uvune injabulo kanye netibusiso letinyenti letitfolakala ngekwenta kanjalo?