Jabulela Sikhatsi SeSikhumbuto Kulomnyaka
1. Nguyiphi indlela lesingandzisa ngayo injabulo yetfu ngesikhatsi seSikhumbuto?
1 Ungatsandza yini kwandzisa injabulo yakho nga-March, April, nanga-May? Lenye indlela yekuyandzisa kucitsa sikhatsi lesinyenti ensimini futsi nawungakhona, ungaba lihlahlandlela lelisitako. Loko kungayandzisa njani injabulo yakho?
2. Kucitsa sikhatsi lesinyenti emsebentini wekushumayela kungayandzisa njani injabulo yetfu?
2 Yandzisa Injabulo Yakho: Jehova wasidala kute sikhone kujabula futsi senetiseke nasimkhonta njengobe senetisa sidzingo setfu lesitalwa naso sekumati. (Mat. 5:3) Waphindze wasidala ngendlela yekutsi sitfole injabulo nasipha labanye. (Imis. 20:35) Umsebenti wekushumayela uyasivumela kutsi sikwente kokubili, kukhonta Nkulunkulu kanye nekusita bantfu. Ngako-ke, kunengcondvo kuphetsa ngekutsi singatfola injabulo lenyenti nasandzisa sikhatsi sekushumayela. Lenye inzuzo kutsi nasicitsa sikhatsi lesinyenti emsebentini wekushumayela, emakhono etfu ayatfutfuka. Njengobe sichubeka sitfutfukisa emakhono etfu, siba nesibindzi futsi kancane kancane luyancipha luvalo lesinalo. Sitawuba nematfuba lamanyenti ekufakaza newekucalisa tifundvo teliBhayibheli. Konkhe loku kwenta kutsi sikujabulele kakhulu kushumayela.
3. Kungani March na-April kutawuba tinyanga letikahle tekuba ngemahlahlandlela lasitako?
3 Nga-March nanga-April kutawuba tinyanga letikahle tekutsi sibe ngemahlahlandlela lasitako ngobe singakhetsa kutsi sitakwenta ema-awa langu-30 nobe langu-50. Kusukela ngeMgcibelo wamhlaka 22 ku-March kute kufike lilanga leSikhumbuto, ngeMsombuluko mhlaka 14 April, sitawuba nelitfuba lelijabulisako lekuhlanganyela emkhankhasweni wekumema labanye kutsi bete eSikhumbutweni. Emabandla atawujabula kakhulu njengobe bamemeteli labanyenti batawube “bahlangene lihlombe ngelihlombe” basebenta ngemandla abo onkhe kute bahlanganise emasimu lamanyenti kuleso sikhatsi lesibekiwe.—Zef. 3:9.
4. Yini lokufanele siyente nasifuna kuba ngemahlahlandlela lasitako?
4 Tilungiselele Nyalo: Nangabe usengakakwenti loko, tinikete sikhatsi sekuhlola luhlelo lwakho kute ubone kutsi nguluphi lushintjo longalwenta kute wandzise sikhatsi sakho sekushumayela kuyinye noma kuleletinye tinyanga. Thantaza kuNkulunkulu ucele lusito. (Jak. 1:5) Coca ngaloko nemndeni wakho kanye nalabanye ebandleni. (Taga 15:22) Ungatfola kutsi ngetulu kwekuba netinkinga temphilo nome kuba semsebentini wekutiphilisa wamalanga onkhe, nawe ungayitfola injabulo ngekuba lihlahlandlela lelisitako.
5. Yini letakwenteka nangabe sandzisa sikhatsi sekushumayela ngesikhatsi seSikhumbuto?
5 Jehova ufuna kutsi tikhonti takhe tijabule. (Hla. 32:11) Nasenta konkhe lokusemandleni etfu kute sicitse sikhatsi lesinyenti emsebentini wekushumayela ngesikhatsi seSikhumbuto, ngeke nje sigcine ngekutfola injabulo lenyenti kodvwa loko kutawuphindze kujabulise Babe wetfu losezulwini.—Taga 23:24; 27:11.