Umkhankaso Wekumemela Bantfu ESikhumbutweni Ucala Nga-March 17
1. Ngumuphi umkhankaso lotawucala nga-March 17?
1 Kugubha Sikhumbuto umnyaka ngamunye, kumemetela kufa kwaJesu. (1 Khor. 11:26) Ngaleso sizatfu, sifisa kutsi nalabanye babe khona baphindze bafundze ngesipho saJehova selutsandvo, lokusihlengo. (Joh. 3:16) Kulomnyaka, umkhankaso wetfu wekumemela bantfu eSikhumbutweni utawucala ngeMgcibelo, March 17. Uyakulangatelela yini kuba nencenye kuwo?
2. Singasihambisa njani simemo?
2 Lesingakusho: Kuncono kusebentisa inshumayelo lemfishane. Singase sitsi: “Sawubona. Sikuvakashele kute sinikete umndeni wakho nasi simemo semkhosi lobalulekile waminyaka yonkhe lotawugujwa emhlabeni wonkhe nga-April 5. Kulomkhosi, kutawuba nenkhulumo yeliBhayibheli yamahhala letawuchaza loko lokwafezwa kufa kwaJesu kanye naloko lakwentako manje. Lesimemo siveta indzawo kanye nesikhatsi lokutawugujwa ngaso lomkhosi endzaweni yangakitsi.” Nasibanencenye ekuhambiseni letimemo ngetimphelasontfo, kufanele sitihambise nabomagazini nangabe sikubona kufaneleka.
3. Bobani lesingabamema?
3 Mema Bantfu Labanyenti: Umgomo wetfu kumema bantfu labanyenti. Ngaleso sizatfu, ciniseka kutsi umema lofundza nabo liBhayibheli, loke wacoca nabo ngeliBhayibheli, losebenta nabo, lofundza nabo esikolweni, bomakhelwane kanye nalojwayelene nabo. Labadzala batawuniketa sicondziso mayelana nendlela yekuhlanganisa insimu. Umkhankaso wetfu waminyaka yonkhe wekumemela bantfu eSikhumbutweni uba nemiphumela lemihle. Ngesikhatsi lomunye wesifazane angena ehholeni lokwagujelwa kulo lomkhosi emnyakeni lophelile, umlindzi wetsembisa kumsita atfole lommemeteli lobekammemile. Lowesifazane watsi akati muntfu lapho futsi lesimemo usinikwe ngulomunye umuntfu lobekangena umuti ngemuti ekuseni ngalelolanga.
4. Sinatiphi tizatfu tekukhutsala kulomkhankaso?
4 Kungenteka kutsi lomunye walabatawubakhona eSikhumbutweni utfole simemo lesishiywe nguwe. Imetamo yetfu itawuniketa bufakazi ngisho nome ngabe bantfu betile nome bangaketi. Timemo lotawutihambisela bantfu titawumemetela kutsi Jesu uyiNkhosi lenemandla. Kukhutsala kwakho kulomkhankaso kutawukhombisa bonkhe labakubonako—labo labasensimini yenu, bamemeteli, futsi kakhulu Jehova, kutsi uyasijabulela lesipho sesihlengo.—Khol. 3:15.