Yetfula Indzaba Ngendlela Letakwakha Sifiso Sekulalela
1. Singafundzani kumaKhristu ekucala ngekwetfula indzaba ngetindlela letehlukehlukene?
1 EmaKhristu ekucala ashumayela tindzaba letimnandzi kubantfu betive netinkholo letehlukehlukene. (Khol. 1:23) Nanobe bewanemlayeto munye lomayelana neMbuso waNkulunkulu, indlela labebawetfula ngayo beyehluka kuye ngetilaleli. Sibonelo saloku kutsi ngalesikhatsi Phetro akhuluma nemaJuda labeyihlonipha kakhulu imiBhalo, wacala ngekucaphuna emavi emphrofethi Joweli. (Imis. 2:14-17) Ngakulolunye luhlangotsi, naka indlela Pawula layisebentisa nakabonisana nemaGriki njengobe ilandziswe ku-Misebenti 17:22-31. Lamuhla, bantfu kulamanye emasimu bayayihlonipha imiBhalo, loko kwenta kutsi sikhone kulisebentisa ngekukhululeka liBhayibheli nasishumayela emtini ngemuti. Nome kunjalo, kungase kudzingeke sihlakaniphe nasicoca nebantfu labangalitsandzi liBhayibheli, labangayitsandzi inkholo nome labasenkholweni lengesiyo yebuKhristu.
2. Singatisebentisa njani tincwadzi letihanjiswako ekusiteni bantfu labalihloniphako liBhayibheli nalabangalitsandzi?
2 Sisebentise Ngemphumelelo Sipho Senyanga: Tipho tenyanga talomnyaka wemsebenti titawushintja ngemuva kwetinyanga letimbili futsi kutawuvela kakhulu bomagazini, emapheshana netincwajana. Nangabe bantfu ensimini yetfu bangalitsandzi liBhayibheli, singakhona kucoca nabo ngesihloko lesikumagazini, lesisepheshaneni nobe lesisencwajaneni lesingase sakhe sifiso sekulalela kubo. Ngisho nome singakawufundzi umbhalo nobe singakawukhulumeli ekuhambeleni kwekucala, nangabe umuntfu anesifiso sekulalela singase sibuyele kuye sinemgomo wekumsita kutsi akhe kukholwa kuMdali naseVini laKhe. Ngakulolunye luhlangotsi, nangabe sishumayela kubantfu labalihloniphako liBhayibheli, singase sisebentise tincwadzi nendlela yekukhuluma lekhombisa kutsi sikhuluma nebantfu labalihloniphako liBhayibheli. Singase sihambise incwadzi letsi Lokufundziswa LiBhayibheli nobe incwajana letsi “Listen to God” naletsi Lalela Nkulunkulu Kute Uphile Phakadze nome nini, ngisho tingasiso sipho saleyo nyanga. Intfo lebalulekile kwetfula indzaba ngendlela letakwakha lutsandvo ngaJehova.
3. Tinhlitiyo tebantfu ensimini tifanana njani nemhlabatsi?
3 Lungisa Umhlabatsi: Inhlitiyo yemuntfu ifanana nemhlabatsi. (Luk. 8:15) Lomunye umhlabatsi udzinga kulungiswa kahle kuze inhlanyelo leliciniso leliBhayibheli imile futsi ikhule. Bashumayeli bangesikhatsi sebaphostoli baphumelela kuhlanyela kulo lonkhe luhlobo lwemhlabatsi futsi loko kwabenta benetiseka baphindze bajabulka. (Imis. 13:48, 52) Natsi singaphumelela njengabo nasinaka indlela lesetfula ngayo indzaba yetfu.