Bemukele!
1. Ngumuphi umkhosi losiniketa litfuba lelihle lekufakaza, futsi kanjani?
1 Umkhosi weSikhumbuto saminyaka yonkhe usiniketa litfuba lelihle lekuniketa bufakazi. Ase ucabange ngaloku: Kulomnyaka silindzele tivakashi letingetulu kwetigidzi letilishumi eSikhumbutweni kutsi titotivela tindlela letimbili lokwakhonjiswa ngato lutsandvo ngenhlawulo. (Joh. 3:16; 15:13) Titawuva ngetibusiso letitatitfola ngalesipho lesivela kuJehova. (Isa. 65:21-23) Nome kunjalo, akusiso sikhulumi kuphela lesitawuniketa bufakazi kulomkhosi. Sonkhe sitawuba nelitfuba lekuniketa bufakazi ngekutemukela ngemusa tivakashi.—Rom. 15:7.
2. Singatemukela njani tivakashi?
2 Kunekutsi ufike uhlale phansi utibindzele nje ulindzele kutsi kucale Sikhumbuto, kungaba njani utsatse sinyatselo kucala utetfule kubantfu lodvutane nabo. Tivakashi tingase tesabe ngobe tingaciniseki kutsi kutawube kwentiwani. Kumomotseka nekuba nebungani kubantfu nasibabingelela kutabenta bative basekhaya. Kuze utfole kutsi umuntfu ute ngobe atfole simemo yini, ungase umbute kutsi uyacala yini kufika emihlanganweni yetfu nobe kutsi ukhona yini umuntfu lamatiko labandleni. Mhlawumbe ungase umcele kutsi atohlala nawe nibukisane liBhayibheli neliculo. Nangabe Sikhumbuto sitawubanjelwa eHholweni leMbuso, ungamkhombisa lona sikhashana nakungenteka. Nasesiphelile Sikhumbuto, ungase uyiphendvule kafishane imibuto lanayo. Nangabe kufanele nisheshe niphume kuze nidedele lelinye libandla, ungase utsi: “Kukhona yini lokutsandzile? Singakhona yini kuphindze sichumane?” Hlela kuya kuye kute nicoce kabanti. Labadzala bangatsandza kuphaphamela kukhutsata bamemeteli labapholile labatawube bakhona.
3. Kubaluleke ngani kutsatsa sinyatselo kucala semukele tivakashi eSikhumbutweni?
3 Tivakashi letinyenti titawube ticala kubona injabulo, kuthula nebunye lesibujabulelako tsine njengebantfu baJehova. (Hla. 29:11; Isa. 11:6-9; 65:13, 14) Natisuka eSikhumbutweni, titawukhumbulani? Kutawuya ngekutsi yini lesiyentile kuze sikhombise kutsi siyatemukela.