Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo

AUGUST 7-13

UMCEBO LOSEVINI LANKULUNKULU | HEZEKELI 28-31

“Jehova Wasiniketa Umvuzo Sive Lesingemacaba”

(Hezekeli 29:18) “Ndvodzana yemuntfu, Nebukhadnezari, inkhosi yaseBhabhulona, washucisa emabutfo akhe kamatima wahlasela iThire; tonkhe tinhloko tasingwa taba tincacadvu, nawo onkhe emahlombe abo aba nesikofu. Noko yena kanye nemabutfo akhe abazange babuyelwe lutfo ngalomkhankhaso labawenta ngekuhlasela iThire.

it-2 1136 ¶4

IThire

Kubhujiswa KweThire. Ngesikhatsi Nebukhednezari avimbetele iThire, tinhloko temasotja akhe “tasingwa” taba tincacadvu, nawo onkhe emahlombe abo “aba nesikofu” ngobe bekatfwala tintfo tekwakha. Njengobe Nebukhadnezari ‘abengabuyelwa ngulutfo’ kulomkhankhaso labewenta wekuhlasela iThire, Jehova wetsembisa kumbonga ngemcebo waseGibhithe. (Hez 29:17-20) Josephus sati mlandvo lesingumJuda satsi lokuvinjelwa kwatsatsa iminyaka lengu-13, (Against Apion, I, 156) futsi loko kwayibita kakhulu iBhabhulona. Umlandvo awuveti ngalokucondzile kutsi imetamo yaNebukhednezari yaphumelela yini. Kodvwa kufa kwebantfu nekonakala kwemphahla yaseThire kwaba buhlungu kakhulu.​—Hez 26:7-12.

(Hezekeli 29:19) Ngako-ke naku lokushiwo yiNkhosi Simakadze, itsi: Ngitawunikela iGibhithe kuNebukhadnezari, inkhosi yaseBhabhulona, uyawutfumba umcebo wayo. Uyawuphanga atfumbe ingcebo yalelive kube yinkhokhelo yemabutfo akhe.

it-1 698 ¶5

IGibhithe NemaGibhithe

Lenye incwadzi leyabhalwa baseBhabhulona babhalela Nebukhadnezari ngemnyaka wesi-37 (588 B.C.E.) yatfolwa ibhalwe ngemkhankhaso lomayelana nekuhlaselwa kweGibhithe. Akuzange kuchazwe kutsi bekukuncoba mbamba nobe bekumane kukushuca nje. Nebukhadnezari wawutfola umcebo waseGibhithe ngobe wawentela Jehova lomsebenti.​—Hez 29:18-20; 30:10-12.

(Hezekeli 29:20) Ngimnike iGibhithe, yaba yinkhokhelo yekukhandleka kwakhe, ngobe yena nemabutfo akhe bakwentela mine, kusho iNkhosi Simakadze.

g86 11/8 27 ¶4-5

Kufanele Silubhadale Lonkhe Yini Luhlobo Lwemtselo?

Kuze siphendvule, kudzingeka sibuke kutsi uMdali wetfu wawubhadala yini umtselo wahulumende wemisebenti letsite leyentiwako. Kutfukutsela kwaJehova kwamenta wakhipha sehlulelo sekubhujiswa kwelidolobha laseThire. Kuze afeze loku, Nkulunkulu wasebentisa libutfo laseBhubhulona lelicondziswa nguNebukhadnezari. Nanobe iBhabhulona yancoba, kodvwa lokulwa kwawacedza emandla. Jehova watsi kufanele babhadalwe ngaloko labakwenta. Emavi akhe lakuHezekeli 29:18, 19 atsi: “Ndvodzana yemuntfu, Nebukhadnezari, inkhosi yaseBhabhulona, washucisa emabutfo akhe kamatima wahlasela iThire. . . Noko yena kanye nemabutfo akhe abazange babuyelwe lutfo ngalomkhankhaso labawenta ngekuhlasela iThire. Ngako-ke naku lokushiwo yiNkhosi Simakadze, itsi: ‘Ngitawunikela iGibhithe kuNebukhadnezari, inkhosi yaseBhabhulona, uyawutfumba umcebo wayo. Uyawuphanga atfumbe ingcebo yalelive kube yinkhokhelo yemabutfo akhe.’”

Bafundzi beliBhayibheli bayati kutsi Nebukhadnezari abetigcabha, aticabangela yena futsi angumbusi lolicaba. IBhabhulona nelibutfo layo belatiwa ngekukhahlabeta bantfu labatfunjiwe. Jehova akazange akutsandze loko, kodvwa kuye sikweledi bekusikweledi futsi bekufanele sibhadalwe.

Funisisa Umcebo EVini LaNkulunkulu

(Hezekeli 28:12-19) “Ndvodzana yemuntfu, dzindza sililo ngenkhosi yaseThire, utsi kuyo: ‘Naku lokushiwo yiNkhosi Simakadze, itsi:“ ‘Wena bewusibonelo sekuphelela, ugcwele kuhlakanipha, futsi uphelele ngebuhle. ¹³ Wawuse-Edeni, sivandze saNkulunkulu. Wawuhlotjiswe ngawo onkhe ematje laligugu: ngemarubhi, nangemathophazi, nangema-emeraldi, nangemakhrisolithe, nangema-oniksi, nangemajasiphi, nangemasafire, nangemathekhosi, nangemabherili. Kwekuhlanganisa lamatje akho laligugu nekwekuwanamatsisela kwakwentiwe ngegolide. Kwalungiswa kahle konkhe loko ngelilanga lowadalwa ngalo. ¹⁴ Wagcotjwa waba likherubhi lelingumelusi, ngobe ngakugcobela kona loko. Wawusentsabeni lengcwele yaNkulunkulu; wawuhambahamba emkhatsini wematje emlilo. ¹⁵ Wawungasoleki etindleleni takho kusukela ngelilanga lowadalwa ngalo, kwadzimate kwaba ngumhlazana bubi butfolakala kuwe. ¹⁶ Ngekutsengisa kwakho lokunyenti wagcwala budlova, wase uyona. Ngako ngakulahla ngobe ungcolile ngekwemtsetfo, ngakususa entsabeni yaNkulunkulu, ngakucosha, awu, kherubhi lelalingumelusi, wesuka emkhatsini wematje emlilo. ¹⁷ Inhlitiyo yakho yakhukhumuka ngenca yebuhle bakho, wona buhlakaniphi bakho ngenca yekucwebetela kwakho. Ngako ngase ngikulahlela emhlabeni, ngakwenta inhlekisa embikwemakhosi. ¹⁸ Utingcolisile tindzawo takho letingcwele ngetono takho letinyenti nangekungetsembeki kwakho ekutsengiseni kwakho. Ngako ngase ngenta kutsi kuphume umlilo kuwe, waphuma wadla wena, ngakwehlisa waba ngumlotsa emhlabatsini, embikwabo bonkhe lababekubukile. ¹⁹ Tonkhe tive letatikwati, timangele ngawe; ngobe sewufike ekugcineni lokubi, futsi ngeke uphindze ube khona.’”

it-2 604 ¶4-5

Kuphelela

Soni sekucala nenkhosi yaseThire. Kuba nesono kwebantfu kwacala ngesidalwa semoya njengobe emavi aJesu lakuJohane 8:44 kanye nekulandzisa lokukuGenesisi sehluko 3 kuveta. Ingoma yekulila lebhalwe kuHezekeli 28:12-19 nanobe icondziswe ‘enkhosini yaseThire’ kuyafana nekutsi icondziswe nasendvodzaneni yaNkulunkulu yekucala leyona. “Inkhosi yaseThire,” beyitigcabha, itenta nkulunkulu, ibitwa ‘ngelikherubi’, futsi lamavi ekulila latsi ‘yayise-Edeni, insimu yaNkulunkulu’ avumelana kahle naloko liBhayibheli lelikushoko ngaSathane Develi, lobitwa ngekutsi ‘ngunkulunkulu walelive’ lamuhla, lowatigcabha waze wasebentisa inyoka e-Edeni.​—1Tm 3:6; Ge 3:1-5, 14, 15; Sem 12:9; 2Ko 4:4.

Inkhosi yaseThire lebeyihlala kulelidolobha beyititjela kutsi ‘yinhle futsi iphelele’ iphindze itsi igcwele kuhlakanipha futsi ayisoleki etindleleni tayo kusukela ngelilanga leyadalwa ngalo, kudzimate kube ngumhlazana bubi butfolakala kuyo. (Hez 27:3; 28:12, 15) Umusho wekucala lokulengoma lekuHezekeli kungenteka ucondziswe kubabusi baseThire. (Catsanisa nesiphrofetho lesabiketelwa mayelana nenkhosi yaseBhabhulona ku-Isaya 14: 4-20.) Kungenteka kutsi loku bekubhekiselwe kulobungani nekuvana babusi baseThire bebanako ngesikhatsi kubusa iNkhosi Davide neNkhosi Solomoni, ngesikhatsi iThire isita nakwakhiwa lithempeli laJehova eNtsabeni iMoriya. Ngako, babusi baseThire bacale bangasoleki. (1Kh 5:1-18; 9:10, 11, 14; 2Khr 2:3-16) Kodvwa emakhosi lalandzela enta lokubi futsi iThire yahlasela baphrofethi baNkulunkulu boJoweli, Amosi kanye naHezekeli. (Jow 3:4-8; Amo 1:9, 10) Ngaphandle kwebufakazi lobufanako ‘benkhosi yaseThire’ lobumayelana netimiso taNkulunkulu, lesiphrofetho sichaza indlela kuphelela nekungasoleki lokufanele kusetjentiswe ngayo.

(Hezekeli 30:13, 14) “ ‘Naku lokushiwo yiNkhosi Simakadze, itsi: “ ‘Ngiyawutibhubhisa tithico, ngiticedze tonkhe titfombe eMemfisi. Akusayikuba nambusi eGibhithe, futsi ngiyawusakata kwesaba kulo lonkhe live. ¹⁴ IPhathrosi ngiyakuyenta ibe lihlane, iSoyani ngiyilumeke ngemlilo, iThebesi ngiyehlisele sijeziso.

w03 7/1 32 ¶1-3

Kwentekani Kuwo?

LIGAMA lelitsi ‘Nofi’ nalelitsi ‘No’ ngemagama laseBhayibhelini emadolobha aseGibhithe akadzeni labedvumile, iMemfisi neThebesi. INofi (Memfisi) beyichele ngemakhilomitha langaba ngu-23 eningizimu yeCairo entshonalanga neMfula iNayile. Kodvwa ngekuhamba kwesikhatsi iMemfisi ayizange isaba lidolobha lelikhulu laseGibhithe. Ekucaleni kwelikhulu lesi-15 B.C.E., iGibhithe beseyinelidolobha lelisha, iNo (Thebesi), lebeyichele ngemakhilomitha langaba ngu-500 eningizimu yeMemfisi. Letinye tindzala taseThebesi lithempeli laseKarnak, lokusakhiwo lesikhulu kunato tonkhe letake takhiwa. IThebesi nelithempeli laseKarnak kwaniketelwa ku-Amoni, nkulunkulu wemaGibhithe lomkhulu.

Yini siphrofetho seliBhayibheli lesayibiketela ngeMemfisi neThebesi? Kwakhishwa sehlulelo ngaFaro waseGibhithe nangankulunkulu wabo, ikakhulukati “Amoni” nkulunkulu lomkhulu. (Jeremiya 46:25, 26) Ticumbi tebantfu lebetihlangana khona ‘betiyoncamuka.’ (Hezekeli 30:14, 15) Kwaba njalo vele. Lokwasala nje tindzala telithempeli la-Amoni. Lidolobha laseLuxor likulendzawo lapho iThebesi yasendvulo beyakhiwe khona, bese kuba khona nemadolobhana kuletindzala.

Ngalokucondzene neMemfisi, kuncane lokwasala ngaphandle kwemathuna akhona. Louis Golding losati seliBhayibheli utsi: “Emakhulwini eminyaka bancobi baseGibhithe labangema-Arabhu basebentisa tindzala taseMemfisi njengesizatfu sekwakha lidolobha labo lelikhulu [iCairo] ngesheya kwemfula. Bakhi labangema-Arabhu bawenta kahle umsebenti kangangekutsi kute ngisho nalinye litje lebelivela ngaphansi kwemhlabatsi.” Njengobe liBhayibheli belibiketele, iMemfisi ‘yasala yodvwa . . . ingasahlali muntfu.’​—Jeremiya 46:19.

Kufundvwa KweliBhayibheli

(Hezekeli 29:1-12) Ngemnyaka welishumi, enyangeni yelishumi, ngelilanga leli-12, kwefika livi laSimakadze kimi, latsi: ² “Ndvodzana yemuntfu, bhekisa buso bakho ngakuFaro, inkhosi yaseGibhithe, uphrofethe umelane nayo kanye nayo yonkhe iGibhithe. ³ Khuluma kuyo utsi: ‘Naku lokushiwo yiNkhosi Simakadze, itsi: “ ‘Ngimelene nawe, Faro, nkhosi yaseGibhithe, wena nyokangwenya lenkhulu, wena locambalele emkhatsini wemifudlana yakho. Ukhuluma utsi: “INayili yami, ngatakhela yona mine.” ⁴ Kodvwa ngiyawufaka emadweba emihlatsini yakho, ngente tinhlanti temifula yakho tinamatsele etincwencweni takho. Ngiyawukukhipha emkhatsini wemifudlana yakho, ngikukhiphe nato tonkhe tinhlanti letinamatsele etincwencweni letisemtimbeni wakho. ⁵ Ngiyawukulahla ehlane wena kanye nato tonkhe tinhlanti temifula yakho. Uyakuwela ebaleni kalashameshame, ungaphindzi ubutfwe nome ugcogcwe. Ngiyawukwenta ube kudla kwetilwane tesiganga nekwetinyoni tasemoyeni. ⁶ “ ‘Ngulapho-ke bonkhe labahlala eGibhithe bayawukwati khona kutsi mine nginguSimakadze. “ ‘Bewuyindvuku yemhlanga kuyo indlu yaka-Israyeli. ⁷ Batsi nabakubamba ngetandla tabo, wavavabuka ekhatsi, wadzabula emahlombe abo avuleka; batsi beyama kuwe, wephuka, imihlane yabo yashumphuka. ⁸ “ ‘Ngako-ke naku lokushiwo yiNkhosi Simakadze, itsi: Ngiyawutfumela inkemba imelane nawe, ngibulale bantfu bakakho netifuyo tabo. ⁹ IGibhithe iyawuba lihlane lelingenamsebenti walutfo. Ngulapho-ke bayawukwati khona kutsi mine nginguSimakadze. “ ‘Njengobe watsi: “INayili ngeyami, ngayenta,” ¹⁰ ngako-ke ngiyemelana nawe kanye nemifula yakho, live laseGibhithe ngiyawulenta libe yimfuhlululu, lisale likhala libhungane, kusukela eMigdoli kuye e-Aswani, kuze kuyewufika emnyeleni waseKushe. ¹¹ Kute lunyawo lwemuntfu nome lwesilwane loluyawunyatsela kulo. Kute loyawuhlala kulo kuze kuphele iminyaka lengema-40. ¹² Live laseGibhithe ngiyawulenta libe lihlane kunawo onkhe emave lagagadzekile, nemadolobha alo ayawusala angenabantfu iminyaka lengema-40 emkhatsini wemadolobha labhidlitiwe. Ngiyawubahlakata baseGibhithe ngibayise etiveni, ngibasakatele emaveni ngemave.

AUGUST 14-20

UMCEBO LOSEVINI LANKULUNKULU | HEZEKELI 32-34

“Umsebenti Lomatima Wemlindzi”

(Hezekeli 33:7) “Ndvodzana yemuntfu, sengikubeke kutsi ube ngumlindzi wendlu yaka-Israyeli; ngako-ke vani livi lengilikhuluma kuwe, ubanike secwayiso lesiphuma kimi.

it-2 1172 ¶2

Umlindzi

Umcondvo Longumfanekiso. Jehova wabeka baphrofethi kutsi babe balindzi besive saka-Israyeli ngemcondvo longumfanekiso (Jer 6:17), naseBhayibhelini leligama lelitsi umlindzi lihle lisetjentiswa ngemcondvo longumfanekiso. (Isa 21:6, 8; 52:8; 62:6; Ho 9:8) Labaphrofethi lababalindzi bekufanele batjele bantfu kutsi Jehova abetalibhubhisa lelive futsi nangabe bangasilaleli lesecwayiso nabo bebatawubhubha. Nangabe labantfu bangashiyi imikhuba yabo lemibi bebatawuba nelicala lengati. (Hez 3:17-21; 33:1-9) Umphrofethi longaketsembeki abetawufana nemlindzi loyimphumphutse nobe inja lengakwati nekukhonkhotsa.​—Isa 56:10.

(Hezekeli 33:8, 9) Nangikhuluma kumuntfu lomubi, ngitsi: ‘Awu wena muntfu lomubi, ngempela utakufa,’ wena-ke ungabe usakukhuluma loko kuye kutsi atiyekele tindlela takhe letimbi, lowo muntfu lomubi uyakufa ngenca yesono sakhe, mine-ke ngiyakuyibita kuwe ingati yakhe. ⁹ Kodvwa nangabe wena umecwayisa lomuntfu lomubi kutsi atiyekele tindlela takhe letimbi, yena angete atiyekela, lowo muntfu uyakufa ngenca yesono sakhe, kodvwa wena uyawube utisindzisile.”

w88 1/1 28 ¶13

Chubekani Nishumayela NgeMbuso

Kubalekela Licala Lengati

¹³ Umsebenti wekwecwayisa bantfu ngesehlulelo saJehova lonikwe BoFakazi BaJehova ufana nemsebenti lobewentiwa nguHezekeli ngesikhatsi sakhe. Abebekwe kutsi abe ngumlindzi wendlu yaka-Israyeli. Umsebenti wakhe bekukwecwayisa ema-Israyeli kutsi abetawubhujiswa nangabe angaphendvuki etindleleni tawo letimbi. Kube yena njengemlindzi wehluleka kwecwayisa bantfu, ngisho nobe lababi bebatawubhujiswa yena abetawuba nelicala lengati. Kuloku Jehova ukhombisa kutsi utiva njani nakajezisa bantfu, utsi: “Angikujabuleli kufa kwalomubi, kodvwa ngitsandza kutsi agucuke etindleleni takhe letimbi aphile. Gucukani! Gucukani etindleleni tenu letimbi! Ningafelani, ninendlu yaka-Israyeli?”​—Hezekeli 33:1-11.

(Hezekeli 33:11) Khuluma kubo utsi: ‘Ngifunga kuphila kwami, kusho iNkhosi Simakadze, angikujabuleli kufa kwalomubi, kodvwa ngitsandza kutsi agucuke etindleleni takhe letimbi aphile. Gucukani! Gucukani etindleleni tenu letimbi! Ningafelani, ninendlu yaka-Israyeli?’

(Hezekeli 33:14-16) Nangabe ngikhuluma kumuntfu lomubi, ngitsi: ‘Ngempela utakufa,’ kodvwa bese uyaphendvuka esonweni sakhe, ente loko lokucotfo nalokulungile, ¹⁵ nangabe abuyisela loko lakutsatsa njengesibambiso seseboleko, abuyisele naloko lakweba, alandzele timiso tekuphila, angakwenti lokubi, ngempela uyawuphila; angeke afe, ¹⁶ Kute nome sinye sono kuleto latentile lesiyawukhunjulwa simelane naye. Wente lokucotfo nalokulungile; ngempela uyawuphila.

w12 3/15 15 ¶3

Londvolota Umuva Wakho Wekuphutfuma

KUNGANI KUSHUMAYELA KWETFU KUPHUTFUMA?

³ Nawucabanga ngetinzuzo kanye nemiphumela yekushumayela, uyasibona sidzingo sekucocela labanye tindzaba letimnandzi ngekuphutfuma. (Rom. 10:13, 14) LiVi laNkulunkulu litsi: “Nangabe ngikhuluma kumuntfu lomubi, ngitsi: ‘Ngempela utakufa,’ kodvwa bese uyaphendvuka esonweni sakhe, ente loko lokucotfo nalokulungile, . . . ngempela uyawuphila; angeke afe. Kute nome sinye sono kuleto latentile lesiyawukhunjulwa simelane naye.” (Hez. 33:14-16) Naku liBhayibheli lelikutjela labo labafundzisa ngemlayeto weMbuso: ‘Nitawube nitisindzisa nine kanye nalabanivako.’​—1 Thim. 4:16; Hez. 3:17-21.

Funisisa Umcebo EVini LaNkulunkulu

(Hezekeli 33:32, 33) Yebo, kubo awusilutfo, ufanana nemuntfu lohlabela tingoma telutsandvo ngeliphimbo lelimnandzi, adlale nemntjingozi kamnandzi, ngobe emavi akho bayaweva, kodvwa bangawenti. ³³ “Kuyawutsi konkhe loku nase kwenteka, ngobe vele kutakwenteka, ngulapho-ke bayawukwati khona kutsi umphrofethi abesemkhatsini wabo.”

w91 3/15 17 ¶16-17

Hambisana Nencola YaJehova Yasezulwini

Kungakucedzi Emandla Kunganakwa

¹⁶ Hezekeli wasibekela sibonelo lesihle sekulalela kanye nekungavumeli kunganakwa kusicedze emandla. Ngendlela lefanako, nasihambisana nencola yaJehova, sisuke sivumelana neMgibeli weNcola yasebukhosini. Ngaleyondlela siceceshiwe kuze silalele imiyalo yaJehova futsi sikhone kucinisela nangabe bantfu lesibashumayelako bangasinaki nobe basihleka. NjengaHezekeli, Nkulunkulu wasecwayisa kusengaphambili kutsi labanye bantfu batasiphikisa, babenetinhloko letilukhuni kanye netinhlitiyo letilukhuni. Labanye bebangeke balalele. (Hezekeli 3:7-9) Labanyenti bebatawutentisa, njengobe Hezekeli 33:31, 32 asho, nakatsi: “Bantfu bami beta kuwe, njengobe bavame kwenta, bahlale embikwakho balalele emavi akho, kodvwa abawenti. Ngemilomo yabo bakhuluma kutsi batinikele, kodvwa tinhlitiyo tabo tibukhali, tifuna inzuzo lembi. Yebo, kubo awusilutfo, ufanana nemuntfu lohlabela tingoma telutsandvo ngeliphimbo lelimnandzi, adlale nemntjingozi kamnandzi, ngobe emavi akho bayaweva, kodvwa bangawenti.”

¹⁷ Bewutawuba yini umphumela? Livesi 33 litsi: “Kuyawutsi konkhe loku nase kwenteka, ngobe vele kutakwenteka, ngulapho-ke bayawukwati khona kutsi umphrofethi abesemkhatsini wabo.” Lamavi akhombisa kutsi Hezekeli akazange advube ngenca yekutsi bantfu bebangamlaleli. Kunganakwa akuzange kumcedze emandla. Ngisho nobe bantfu labanyenti bebangamlaleli, walalela Nkulunkulu ngekutsi ente umsebenti labetfunywe kutsi awente.

(Hezekeli 34:23) Ngiyawubeka etikwato umelusi abe munye, inceku yami Davide, yena uyawutinakekela; uyakuba ngumelusi wato, atinakekele.

w07 4/1 26 ¶3

Kutitfoba Kubelusi Labanelutsandvo

³ Siphrofetho sa-Isaya 40:10, 11 sigcizelela umusa Jehova lawukhombisa bantfu bakhe. (Tihlabelelo 23:1-6) Ngesikhatsi alapha emhlabeni, Jesu abebakhombisa umusa bafundzi bakhe kanye nalabanye bantfu. (Mathewu 11:28-30; Marku 6:34) Bobabili boJehova naJesu bebayenyanya indlela baholi baka-Israyeli lebebaphatsa ngayo bantfu, bebangabanaki futsi babagcilata. (Hezekeli 34:2-10; Matewu 23:3, 4, 15) Jehova watsi: “Ngitawusindzisa umhlambi wami, ungeke uphindze uphangwe, ngiyakwehlulela emkhatsini wemvu nemvu, ngiyawubeka etikwato umelusi abe munye, inceku yami Davide, yena uyawutinakekela; uyakuba ngumelusi wato, atinakekele.” (Hezekeli 34:22, 23) Kulesikhatsi sekuphela, Jesu Khristu, longuDavide Lomkhulu, nguye yedvwa “umelusi” lomiswe nguJehova kutsi anakekele tonkhe tinceku takhe emhlabeni, letifaka ekhatsi emaKhristu lagcotshiwe “naletinye timvu.”​—Johane 10:16.

Kufundvwa KweliBhayibheli

(Hezekeli 32:1-16) Ngemnyaka weli-12, enyangeni yeli-12, ngelilanga lekucala, livi laSimakadze lefika kimi, latsi: ² “Ndvodzana yemuntfu, lila, ulilele Faro, inkhosi yaseGibhithe, utsi: “ ‘Ufanana nelibhubesi emkhatsini wetive; ufanana nanyokangwenya etilwandle, ushaya lidamu emifudlaneni yakho, uphehle emanti ngetinyawo takho, udvunge lemifudlana. ³ “ ‘Naku lokushiwo yiNkhosi Simakadze, itsi: “ ‘Ngesicumbi lesikhulu sebantfu ngiyawuphonsa linetha lami etikwakho, bayawukuhudvulela ngaphandle ngelinetha lami. ⁴ Ngiyawukulahla emhlabatsini, ngikujikijele esigangeni. Ngiyawukwenta tonkhe tinyoni telizulu takhele etikwakho, bese kutsi tonkhe tilwane temhlaba tikudle tikushwabudzele. ⁵ Ngiyakwembesa tintsaba ngetidvumbu takho letibolako, ngigcwalise tihosha ngenseketse yakho. ⁶ Live ngiyakulenya engatini yakho legeletako yonkhe indlela kuya etintsabeni, kutsi tigodzi tigcwaliswe ngenyama yakho. ⁷ Nase ngikucisha, ngiyakuwasibekela emazulu, ngente tinkhanyeti tawo tibe mnyama. Lilanga ngiyakulimbonya ngelifu, nenyanga ingakukhiphi kukhanya kwayo. ⁸ Tonkhe tikhanyisi leticwebetelako emazulwini ngiyawutenta tibe mnyama etikwakho; ngiyakwehlisela bumnyama etikwelive lakho, kusho iNkhosi Simakadze. ⁹ “ ‘Ngiyawutihlupha tinhlitiyo tetive letinyenti, nase ngiletsa imbhubhiso yakho emkhatsini wetive, yebo, emaveni longazange sewuwati. ¹⁰ Tive letinyenti ngiyawutenta titfutfumele ngawe, nemakhosi ato ayawushaciswa kwesaba ngenca yakho, nase ngijikitisa inkemba yami embikwawo. Ngelilanga lekuwa kwakho ngulowo nalowo uyawutfutfumela ngekuphila kwakhe kuyo yonkhe imizuzwana yalelo langa. ¹¹ “ ‘Ngobe naku lokushiwo yiNkhosi Simakadze, itsi: “ ‘Inkemba yenkhosi yaseBhabhulona iyawuta itewukuhlasela. ¹² Ticumbi tebantfu bakho ngiyawutilahla phansi ngetinkemba temachawe lanemandla, yebo, emachawe lanelunya kwendlula tonkhe tive. Umgcabho waseGibhithe ayakuwuphihlita, kutsi tonkhe ticumbi tebantfu bayo tiketulwe. ¹³ Ngiyakutibhubhisa tonkhe tinkhomo tayo eceleni kwemanti lamanyenti, langaseyiwuphindze anyakatiswe lunyawo lwemuntfu, nome advungwe tinselo tetinkhomo. ¹⁴ Emanti ayo ngiyakuwenta aphindze ahlobe, nemifudlana yayo igelete njengemafutsa, kusho iNkhosi Simakadze. ¹⁵ Ngiyawutsi nase ngenta iGibhithe ibe lihlane, live ngilihlubule konkhe lelinako, nase ngibashaya bonkhe labaphilako lapho, ngulapho-ke bayawukwati khona kutsi mine nginguSimakadze.’ ¹⁶ “Lesi sililo labayakuyihlabelela sona. Emadvodzakati etive ayakusihlabela; ngobe ayawulilela iGibhithe neticumbi tayo, kusho iNkhosi Simakadze.”

AUGUST 21-27

UMCEBO LOSEVINI LANKULUNKULU | HEZEKELI 35-38

“Ngekushesha Gogi wakaMagogi Utawubhujiswa”

(Hezekeli 38:2) Ndvodzana yemuntfu, bhekisa buso bakho ngakuGogi waseveni lakaMagogi, indvuna lenkhulu yesive sakaMesheki nakaThubali. Phrofetha kuye.

w15 5/15 29-30

Imibuto Levela Kubafundzi

Ngako-ke ungubani Gogi wakaMagogi? Kuze sitfole imphendvulo, kufanele sihlole liBhayibheli kute sibone kutsi ngubani lohlasela bantfu baNkulunkulu. LiBhayibheli likhuluma ngekuhlasela ‘kwaGogi wakaMagogi,’ kuhlasela ‘kwenkhosi yasenyakatfo’ nekuhlasela ‘kwemakhosi emhlaba.’ (Hezekeli 38:2, 10-13; Danyela 11:40, 44, 45; Sembulo 17:14; 19:19) Lokuhlasela kwehlukahlukene yini? Akubonakali kunjalo. Kubonakala shengatsi liBhayibheli lisebentisa emagama lehlukahlukene kuze lichaze kuhlasela lokufanako. Kungani sisho njalo? Kungobe liBhayibheli lisitjela kutsi tonkhe tive temhlaba titawuba yincenye yalokuhlasela kwekugcina lokutawuholela emphini ye-Amagedoni.​—Sembulo 16:14, 16.

Nasicatsanisa onkhe lamavesi lakhuluma ngekuhlaselwa kwekugcina kwebantfu baNkulunkulu, kuyacaca kutsi ligama lelitsi Gogi wakaMagogi alisho Sathane. Esikhundleni saloko, lisho licembu letive. Lelicembu litawube liholwa ‘yinkhosi yasenyakatfo’ yini? Asiciniseki. Kodvwa kubonakala shengatsi lenchazelo ivumelana naloko Jehova lakusho mayelana naGogi nakatsi: “Uyawuchamuka endzaweni yakho lesenyakatfo lekhashane, wena netive letinyenti letikanye nawe, bonkhe bagibele emahhashi, inyakanyaka yemabutfo, imphi lenemandla kakhulu.”​—Hezekeli 38:6, 15.

(Hezekeli 38:14-16) “Ngako-ke, ndvodzana yemuntfu, phrofetha utsi kuGogi: ‘Naku lokushiwo yiNkhosi Simakadze, itsi: Ngalelo langa, mzukwana sive sami, ema-Israyeli, sesihlala sivikelekile, awuyiwukubona yini? ¹⁵ Uyawuchamuka endzaweni yakho lesenyakatfo lekhashane, wena netive letinyenti letikanye nawe, bonkhe bagibele emahhashi, inyakanyaka yemabutfo, imphi lenemandla kakhulu. ¹⁶ Uyawushuca usukele sive sami, ema-Israyeli, njengelifu lelisibekela live. Kulamalanga letako wena, Gogi, ngitakuyisa eveni lami, kuze tive titewungati mine nase ngitibonakalisa bungcwele bami ngawe tibukile.

w12 9/15 5-6 ¶8-9

Indlela Lelive Lelitawuphela Ngayo

⁸ Naseyibhujisiwe inkholo yemanga, tinceku taNkulunkulu titawube tihleli ngekulondzeka futsi ‘tingakavikeleki.’ (Hez. 38:11, 14) Yini letawenteka kuletinceku taJehova letitawube tibonakala tingakavikeleki? Kubonakala shengatsi titawuhlaselwa ‘tive letinyenti.’ LiVi laNkulunkulu lichaza leso sentakalo ngekutsi kuhlasela ‘kwaGogi waseveni lakaMagogi.’ (Fundza Hezekeli 38:2, 15, 16.) Kufanele sikutsatse njani loko kuhlaselwa?

⁹ Kwati kusenesikhatsi ngalokuhlaselwa kwebantfu baNkulunkulu akusenti sikhatsateke kakhulu. Esikhundleni saloko, sikhatsateka ngekungcweliswa kwelibito laJehova nekusekelwa kwebukhosi bakhe, hhayi ngekusindziswa kwetfu. Ecinisweni Jehova washo tikhatsi letingetulu kwa-60 kutsi: “Kuze nati kutsi mine nginguSimakadze.” (Hez. 6:7) Ngako-ke, sikubuke ngalabovu kugcwaliseka kwalesiphrofetho saHezekeli futsi siyetsemba kutsi Jehova ‘uyakwati kubakhulula ekulingweni labo labesaba Nkulunkulu.’ (2 Phet. 2:9) Nyalo sifuna kusebentisa onkhe ematfuba lesiwatfolako kute sicinise kukholwa kwetfu futsi sihlale sicotfo kuJehova ngisho nome singabhekana natiphi tilingo. Yini lokufanele siyente? Kufanele sithantaze, sitadishe liVi laNkulunkulu futsi sizindle ngalo siphindze sishumayele umlayeto weMbuso kulabanye. Nasenta njalo, siligcina licinile litsemba letfu lekuphila phakadze, “linjengesisimiso semkhumbi.”​—Heb. 6:19; Hla. 25:21.

(Hezekeli 38:21-23) “‘Ngiyawumbitela inkemba Gogi, imelane naye kuto tonkhe tintsaba tami. Inkemba yalowo nalowo muntfu iyawumelana nemnakabo, kusho iNkhosi Simakadze. ²² Ngiyawukhipha sigwebo sesifo lesibulalanako nesekucitseka kwengati; ngiyakwehlisela sihhuhhula semvula lenesangcotfo nesibabule lesivutsako etikwakhe nasetikwemabutfo akhe, nasetikwetive letinyenti letikanye naye. ²³ Ngiyawubukhombisa kanjalo-ke bukhulu bami nebungcwele bami, ngiyawutenta kutsi ngatiwe emehlweni etive letinyenti. Ngulapho-ke bayawungati khona kutsi mine nginguSimakadze.’”

w14 11/15 27 ¶16

‘Nyalo Senibantfu BaNkulunkulu’

¹⁶ Nasekubhujiswe iBhabhulona Lenkhulu, bantfu baJehova batawuhlaselwa kakhulu futsi ngaleso sikhatsi kutawudzingeka kutsi sibe sendzaweni lesivikelo Jehova latayentela tinceku takhe. Njengobe lokuhlaselwa kutawubangela kutsi kucale incenye yekugcina ‘yekuhlupheka lokukhulu,’ nguJehova lotawucondzisa tintfo futsi akhetse sikhatsi lesifanele sekucala kwemphi yakhe. (Mat. 24:21; Hez. 38:2-4) Ngaleso sikhatsi, Gogi utawuhlasela ‘bantfu lababutfwe etiveni ngetive,’ lokubantfu baJehova. (Hez. 38:10-12) Loko kuhlasela kutawenta kutsi Jehova angenele, akhiphe sehlulelo sakhe kuGogi nasebutfweni lakhe. Jehova utawukhombisa kutsi bukhosi bakhe bukhulu futsi angcwelise libito lakhe, njengobe atsi: “Ngiyawutenta kutsi ngatiwe emehlweni etive letinyenti. Ngulapho-ke bayawungati khona kutsi mine nginguSimakadze.”—Hez. 38:18-23.

Funisisa Umcebo EVini LaNkulunkulu

(Hezekeli 36:20, 21) Yonkhe indzawo lapho baya khona etiveni balihlambalata Libito lami lelingcwele, ngobe kwakukhulunywa ngabo kutsiwe: ‘Lesi sive saSimakadze, kodvwa noko kwakufanele balishiye live lakhe.’ ²¹ Ngaphatseka kabi ngeLibito lami lelingcwele, lelahlanjalatwa yindlu yaka-Israyeli emkhatsini wetive, lapho bebaye khona.

w02 6/15 20 ¶12

Fundza Futsi Ufundzise Indlela EmaKhristu Lokufanele Atiphatse Ngayo

¹² Umphostoli Pawula wagcizelela sizatfu lesiyinhloko sekufundza bese usebentisa timiso tekutiphatsa lotitfola eBhayibhelini? Kutiphatsa kabi kwemaJuda bekummelela kabi Jehova: “Wena lotigabatisa ngemtsetfo, wedzelela Nkulunkulu yini ngekwephula kwakho uMtsetfo? Ngobe ‘libito laNkulunkulu liyahlanjalatwa kubantfu betive ngenca yenu,’ njengobe nje kubhaliwe.” (Roma 2:23, 24) Nalamuhla, nangabe singayinaki indlela lesitiphatsa ngayo, sihlaza Jehova. Kodvwa nasibambelele sicinile etimisweni taNkulunkulu, simmelela kahle Jehova futsi simdvumise. (Isaya 52:5; Hezekeli 36:20) Kukwati loko kungakwenta utiphatse kahle ngisho nalapho uvivinywa nobe ubhekene netimo letingakubeka engotini yekutiphatsa kabi. Emavi aPawula asifundzisa nalokunye lokubalulekile. Ngetulu kwekwati kutsi kutiphatsa kwakho kumelela Nkulunkulu, kufanele usite labanye babone kutsi kusebentisa kwabo timiso labatifundzako kuyommelela kahle Jehova. Kutiphatsa kahle njengemaKhristu akugcini nje ngekusenetisa kanye nekusivikela, kuphindze kumelele Loyo lowasungula timiso tekutiphatsa.​—Tihlabelelo 74:10; Jakobe 3:17.

(Hezekeli 36:33-36) Naku lokushiwo yiNkhosi Simakadze, itsi: Mzukwana nginihlanta kuto tonkhe tono tenu, ngiyakuwatintisa kabusha emadolobha enu, netindzawo tenu lebetibhidlitiwe tiyakwakhiwa kabusha. ³⁴ Live lelase likhala libhungane liyawulinywa esikhundleni sekutsi lisale lilihlane lelingenalutfo emehlweni abo bonkhe labengca kulo. ³⁵ Bayawutsi: “Lelive belilihlane lelingenalutfo selihlume laba njengensimi yase-Edeni; emadolobha labesasele atindzala, sekukhala libhungane kuwo, asabhujisiwe, nyalo asabiyelwe futsi asahlalwa bantfu.” ³⁶ Lapho-ke tive leniyawube nakhelene nato letiyawube tisasele tiyawukwati kutsi mine Simakadze, ngikwakhe kabusha loko lokwase kubhujisiwe, ngabuye ngahlumisa loko lokwase kulihlane. Mine Simakadze sengikhulumile, futsi ngitawukwenta.’

w88 9/15 24 ¶11

‘Bayawukwati Kutsi Mine NginguJehova’

¹¹ Nasekabuyele emuva emaJuda eveni lawo, lelive lebeselilihlane lelingenalutfo lahluma laba njengensimu yase-Edeni. (Fundza Hezekeli 36:33-36.) Ngendlela lefanako, kusukela nga-1919, Jehova ugucule live lelake laba tindzala lalabagcotjiwe labasele laba yindzawo letselako, nesicumbi lesikhulu siyazuza kulo.’ Njengobe bantfu baNkulunkulu bandza emhlabeni wonkhe, shengatsi umKhristu ngamunye lotinikele angatimisela kuhlala endlini yaJehova.​—Hezekeli 36:37, 38.

Kufundvwa KweliBhayibheli

(Hezekeli 35:1-15) Livi laSimakadze lefika kimi, latsi: ² “Ndvodzana yemuntfu, bhekisa buso bakho ngaseveni letintsaba i-Edomu, phrofetha, umelane nayo, ³ utsi: ‘Naku lokushiwo yiNkhosi Simakadze, itsi: Ngimelene nawe, Edomu, live letintsaba, ngiyakwelula sandla sami ngimelane nawe, ngikwente ube lihlane lelingenalutfo. ⁴ Emadolobha akho ngiyakuwagucula abe ngemadzibikelo, live lakho libe lihlane. Ngulapho-ke uyawukwati khona kutsi mine nginguSimakadze. ⁵ “‘Njengobe wafukamela butsa bakadzeni, wanikela ema-Israyeli enkembeni ngesikhatsi senhlekelele yawo, ngesikhatsi sesijeziso sawo sekuphela, ehlulelwa ngenca yalokubi kwawo, ⁶ ngako-ke, ngifunga kuphila kwami, ngiyawukunikela ekucitfweni kwengati yakho, futsi kuyawukucosha ngemuva, kusho iNkhosi Simakadze. Njengobe ungazange sewukutondze kucitsa ingati, kucitsa ingati kuyawukucosha ngemuva. ⁷ Live laka-Edomu letintsaba ngiyawulenta libe lihlane lelingenalutfo, ngincamule bonkhe labaphuma bangene kulo. ⁸ Tintsaba takho ngiyawutigcwalisa ngalabo labagwaziwe; yebo, labo lababulewe ngenkemba bayakuwa etikwemagcuma akho, nasetihosheni takho, nakuyo yonkhe imifudlana yakho. ⁹ Ngiyawukwenta ube lihlane phakadze; emadolobha akho angeke abe nebantfu. Ngulapho-ke uyawukwati khona kutsi mine nginguSimakadze. ¹⁰ ‘“Njengobe ukhulume watsi: “Letive letimbili nalamave lamabili kutawuba kwetfu, futsi siyawukutsatsa kube kwetfu,” lite nome mine Simakadze bengikhona lapho, ¹¹ ngako-ke, ngifunga kuphila kwami, ngiyawukuphatsa ngentfukutselo nangemona lowakubonakalisa kubaka-Israyeli ngekubatondza kwakho, nami ngiyawutenta ngatiwe emkhatsini wabo, nangikwehlulela, kusho iNkhosi Simakadze. ¹² Ngulapho-ke uyawukwati khona kutsi mine Simakadze ngitivile tonkhe letintfo tekwedzelela letimbi lotikhulume ngetintsaba taka-Israyeli. Watsi: “Tentiwe taba lihlane, taniketwa tsine kutsi sitishwabudzele.” ¹³ Wangichoshela, wakhuluma kabi ngami ngaphandle kwekutibamba, ngakuva loko. ¹⁴ Naku lokushiwo yiNkhosi Simakadze, itsi: Kuyawutsi umhlaba wonkhe usajabula, wena ngikwente ube lihlane. ¹⁵ Njengobe wajabula ngesikhatsi lifa lendlu yaka-Israyeli liba lihlane, nami-ke ngiyawukuphatsa kanjalo. Uyawuba lihlane, wena live letintsaba taseSeyiri, yebo, wena nalo lonkhe laka-Edomu. Ngulapho-ke bayawukwati khona kutsi mine nginguSimakadze.’”

AUGUST 28–SEPTEMBER 3

UMCEBO LOSEVINI LANKULUNKULU | HEZEKELI 39-41

“Umbono WaHezekeli Welithempeli Ukutsintsa Njani?”

(Hezekeli 40:2) Emibonweni yaNkulunkulu wangitsatsa wangiyisa eveni laka-Israyeli, wafike wangimisa entsabeni lephakeme kakhulu, lekwatsi ngaseningizimu kwayo kwakunetindlu letatibukeka shangatsi ngulelikhulu lidolobha.

w99 3/1 11 ¶16

Lalelisisa Konkhe Lokushiwo NguNkulunkulu

¹⁶ Kuze sitfole imphendvulo, ake sicoce kafishane ngalombono. Hezekeli wabhala watsi: “Emibonweni yaNkulunkulu wangitsatsa wangiyisa eveni laka-Israyeli, wafike wangimisa entsabeni lephakeme kakhulu, lekwatsi ngaseningizimu kwayo kwakunetindlu letatibukeka shangatsi ngulelikhulu lidolobha.” (Hezekeli 40:2) ‘Intsaba lephakeme kakhulu,’ isikhumbuta Mika 4:1 lotsi: “Ngemalanga ekugcina intsaba yelithempeli laSimakadze iyawucina, ibe ngulephakeme kwendlula tonkhe tintsaba; iyawuphakanyiswa ibe ngetulu kwemagcuma, tive letinyenti tiyawubekelela tiye kuyo tingasakhawuli.” Sagcwaliseka nini lesiphrofetho? Mika 4:5 ukhombisa kutsi loku kucala tive tisakhonta bonkulunkulu bemanga. Ecinisweni, loku kwenteke esikhatsini setfu, “ngemalanga ekugcina,” lapho kukhonta lokuhlantekile kuye kwaphakanyiswa khona, kwabuyiselwa endzaweni yako lefanele ekuphileni kwetinceku taNkulunkulu.

(Hezekeli 40:3) Wangiyisa khona, ngafike ngabona indvodza leyayibukeka njengelitfusi; yayime esangweni inelucotfo lwelineni nendvuku yekulinganisa esandleni sayo.

(Hezekeli 40:5) Ngabona lubondza lolutungelete yonkhe lendzawo yelithempeli. Budze balendvuku yekulinganisa leyayisesandleni salendvodza babungemamitha labengaba matsatfu, wakala lolubondza. Lwalungemamitha labengaba matsatfu kuphakama, nemamitha labengaba matsatfu bucinsi balo.

w07 8/1 10 ¶2

Emaphuzu Lagcamile Encwadzi YaHezekeli​—II

40:3–43:17​—Kusho kutsini kukalwa kwelithempeli? Kukalwa kwelithempeli kuluphawu lwekutsi injongo yaJehova mayelana nekukhonta lokumsulwa iyogcwaliseka nakanjani.

(Hezekeli 40:10) Ngekhatsi kwalendlu yelisango langasemphumalanga kwakunemakamelo lamatsatfu luhlangotsi lulunye, omatsatfu abelingana ngebukhulu, naletibondza kuwo onkhe emacala awo tatilingana.

(Hezekeli 40:14) Lendvodza yakala kugudla lingembili letibondza, letiphume taphondla kutungeleta lingekhatsi lendlu yelisango, kwakungemamitha labengaba ngema-30. Lesilinganiso sasifikela kulomhubhe lowawubukene nesibuya.

(Hezekeli 40:16) Bekunemafasitelo lamancane kulolubondza lolungephandle lwalamakamelo abogadzi nakuleti letatisemkhatsini walamakamelo kanye nakulomhubhe yonkhe indzawo. Bekunetihlahla temasundvu letaticoshwe kuletibondza letingekhatsi letatibheke kulomhubhe wangekhatsi.

w07 8/1 11 ¶4

Emaphuzu Lagcamile Encwadzi YaHezekeli​—II

40:14, 16, 22, 26. Imidvwebo yetihlahla telusundvu leselubondzeni lolusekungeneni ethempelini ikhombisa kutsi ngulabatsembekile kuphela labavunyelwe kungena kulo. (Tihlabelelo 92:12) Loku kusifundzisa kutsi kukhonta kwetfu Jehova kwemukeleka kuphela nangabe setsembekile.

Funisisa Umcebo EVini LaNkulunkulu

(Hezekeli 39:7) Libito lami lelingcwele ngiyawulenta latiwe emkhatsini wesive sami, ema-Israyeli. Yebo, Libito lami lelingcwele ngingeke ngisaliyekela lihlanjalatwe, netive tiyawukwati kutsi mine nginguSimakadze, Longcwele ka-Israyeli.

w12 9/1 21 ¶2

“Tive Tiyawukwati Kutsi NginguJehova”

Jehova utsi: “Libito lami lelingcwele ngingeke ngisaliyekela lihlanjalatwe.” Nangabe bamsola kutsi ute bulungisa, basuke bahlambalata libito lakhe. Njani? EBhayibhelini ligama lelitsi “libito” lisho lidvumela lemuntfu. Lenye incwadzi itsi libito laNkulunkulu lisho “loko bantfu labakwatiko ngaye—loko lakwembulile ngaye; liphindze limelele ludvumo lwakhe nekuhlonipheka kwakhe.” Libito laJehova lifaka ekhatsi nelidvumela lakhe. Yini leyatiwako ngaJehova nangabe kutiwa endzabeni yekungabi nebulungisa? Uyakwenyanya! Ukhatsatekile ngebantfu labete bulungisa. (Eksodusi 22:22-24) Nangabe bantfu batsi Nkulunkulu wenta tintfo letimbi, basuke bamhlambalata. ‘Betfuka libito lakhe.’​—Tihlabelelo 74:10.

(Hezekeli 39:9) Labo-ke labahlala emadolobheni aka-Israyeli bayawuphuma bayewubutsa tikhali lebetilahlwe ngemabutfo akho batewutibasa. Bayawubasa emahawu lamakhulu nalamancane, nebutjoki, nemicibisholo, netizeze, netikhali. Kuyawuba ngiminyaka lesikhombisa basebentisa tona ekubaseni umlilo.

w89 8/15 14 ¶20

Kuvulwa Kwendlela Lebuyela EPharadisi

²⁰ Kodvwa kutsiwani ngato tonkhe tintfo letisetjentiselwa kulwa imphi letiyawusala emaveni lehlukene? Nakubukwa sibonakaliso lesingumfanekiso sebudze besikhatsi lesitawutsatfwa natishiswa, senta sibone kutsi tiyawube titinyenti kakhulu. (Hezekeli 39:8-10) Labasindze e-Amagedoni batawusebentisa letinye taletintfo lebetisetjentiswa emphini kuze bente umsebenti lobalulekile.​—Isaya 2:2-4.

Kufundvwa KweliBhayibheli

(Hezekeli 40:32-47) Lendvodza yangidzabulisa indlu yalelisango langasemphumalanga, yangingenisa esibuyeni sangekhatsi. Yayikala lendlu yelisango, yakhandza kutsi ilingana tjika naleti letinye. ³³ Emakamelo ayo abogadzi netibondza tayo tangekhatsi kanye nalomhubhe wayo kwakulingana ncamashi nekwaleti letinye. Lendlu yelisango nalomhubhe wayo kwakunemafasitelo yonkhe indzawo. Sebubonkhe budze bayo babungemamitha labengaba ngema-25, nebubanti bayo babungemamitha labengaba li-12 nesigamu. ³⁴ Lomhubhe wayo wawubheke esibuyeni sangephandle. Kwakucoshwe tihlahla temasundvu kuletibondza tayo tangekhatsi emaceleni omabili. Kwakunetitebhisi letisiphohlongo letatikhuphukela ekungeneni kwelisango. ³⁵ Lendvodza yase ingiyisa endlini yelisango langasenyakatfo. Yayikala, yakhandza kutsi ilingana tjika naleti letinye. ³⁶ Njengato nayo yayinemakamelo abogadzi, netibondza tangekhatsi, nemhubhe lobukene nesibuya, nemafasitelo yonkhe indzawo. Sebubonkhe budze bayo babungemamitha labengaba ngema-25, nebubanti bayo babungemamitha labengaba li-12 nesigamu. ³⁷ Lomhubhe wayo lomunye wawubheke kulesibuya sangephandle. Kwakucoshwe tihlahla temasundvu kuletibondza tangekhatsi emaceleni omabili. Kwakunetitebhisi letisiphohlongo letatikhuphukela ekungeneni kwelisango. ³⁸ Kulesibuya sangephandle kwakunesakhiwo, lesasichunywe kulendlu yelisango lelingekhatsi ngasenyakatfo. Sasiphumela kulomhubhe wayo lowawubheke kulesibuya, lapho-ke ngulapho babegezela khona letilwane letatitekwentiwa umhlatjelo wekushiswa samuku. ³⁹ Kulomhubhe lobukene nesibuya kwakunematafula lamane, kumunye ngamunye umhlubulo wawo amabili, kutsi kuhlatjelwe etikwawo tilwane temhlatjelo wekushiswa samuku, netemhlatjelo wesono, netemnikelo wenhlawulo. ⁴⁰ Ngephandle kwalomhubhe lobukene nesibuya kwakunematafula lamane lafananako, amabili ngala nangale kwemnyango welisango langasenyakatfo. ⁴¹ Asawonkhe lamatafula abesiphohlongo, lapho letilwane letatiba ngumhlatjelo tatibulawelwa khona: Lamane abengekhatsi kulomhubhe, lamane angephandle esibuyeni. ⁴² Lamatafula lamane lekwakulungiselelwa kuwo imihlatjelo leyayitawushiswa samuku, abengewematje lacotwe kahle. Abengaba sigamu selimitha kuphakama kwawo, bese kutsi lingetulu lawo lalisikwele lesasingemasentimitha labengaba ngema-75. Tonkhe letimphahla letatisetjentiswa ekuhlabeni letilwane temihlatjelo tatibekwa kulamatafula. ⁴³ Kwakunemingcengcema leyayingemamilimitha labengaba ngema-75 bubanti, leyayitungeleta lamatafula. Yonkhe inyama yemihlatjelo yayibekwa etikwalamatafula. ⁴⁴ Lendvodza yase ingimisa kulesibuya sangekhatsi. Kwakunemakamelo lamabili lavulekela kulesibuya sangekhatsi, lilinye laliseceleni kwelisango langasenyakatfo, lalibheke ngaseningizimu, leli lelinye liseceleni kwelisango langaseningizimu libheke ngasenyakatfo. ⁴⁵ Lendvodza yangitjela kutsi lelikamelo lelibheke ngaseningizimu lalilebaphristi lababekhonta ethempelini, ⁴⁶ lelikamelo lelalibheke ngasenyakatfo lalilebaphristi lababekhonta elatini. Labaphristi kwakuyintalelwane yaSadoki, kwakungabo kuphela emalunga labewesive semaLevi labenelilungelo lekusondzela ebukhoneni baSimakadze ayewumkhonta. ⁴⁷ Lendvodza yakala lesibuya sangekhatsi, yatfola kutsi sasisikwele lesasingemamitha labengaba ngema-50. Lithempeli lalingasenshonalanga, embikwalo kwakunelilati.