Kuphindzaphindza Ngenjongo Yekugcizelela

KUPHINDZAPHINDZA kuyasita kuze ufundzise ngalokuphumelelako. Nangabe liphuzu lelibalulekile liphindvwa, labo labalalele batawulikhumbula. Nangabe lelo phuzu liphindze lishiwo ngendlela leyehlukile, kungenteka bakhone kulicondza kancono.

Nangabe labo labakulalele bangakukhumbuli loko lokushito, emavi akho ngeke akutsintse loko labakukholelwako nobe indlela labaphila ngayo. Emaphuzu labatawuchubeka bacabanga ngawo ngulawo lowagcizelele.

Jehova, uMfundzisi wetfu Lomkhulu, usibekela sibonelo sekuphindzaphindza. Waniketa sive sema-Israyeli iMiyalo Lelishumi. ENtsabeni iSinayi wasebentisa ingilosi kutsi inikete lesive lemiyalo. Ngekuhamba kwesikhatsi, lemiyalo wabese uyiniketa Mosi ibhalwe phansi. (Eks. 20:1-17; 31:18; Dut. 5:22) Acondziswa nguJehova, Mosi waphindze wayisho lemiyalo kulesive ngaphambi kwekutsi singene eVeni Lesetsembiso, futsi acondziswa ngumoya longcwele, Mosi waphindze wayibhala phansi, njengobe itfolakala kuDutheronomi 5:6-21. Lemiyalo leyaniketwa ema-Israyeli beyifaka ekhatsi umyalo lotsi kufanele atsandze futsi akhonte Jehova ngenhlitiyo yawo yonkhe, umphefumulo wawo wonkhe kanye nangemandla awo onkhe. Naloku futsi kwaphindvwa tikhatsi letinyenti. (Dut. 6:5; 10:12; 11:13; 30:6) Kungani? Kungobe lona “ngiwo umtsetfo lomkhulu newekucala,” njengobe nje naJesu asho. (Mat. 22:34-38) Asebentisa umphrofethi Jeremiya, Jehova wakhumbuta bantfu bakaJuda tikhatsi letingetulu kwaletingu-20 mayelana nekubaluleka kwekumlalela kuto tonkhe tintfo labayale ngato. (Jer. 7:23; 11:4; 12:17; 19:15) Asebentisa umphrofethi Hezekeli, Nkulunkulu waphindzaphindza tikhatsi letingetulu kwaletingu-60, watsi: “Bayakungati kahle kutsi mine nginguSimakadze.”​—Hez. 6:10; 38:23.

Ekulandziseni lokumayelana nemsebenti waJesu wekushumayela, siphindze sibone indlela kuphindzaphindza lokusetjentiswe ngayo ngemphumelelo. Nasi sibonelo: KunemaVangeli lamane, ngalinye likhuluma ngetintfo letibalulekile letenteka lokukhulunywa ngato nakulamanye emaVangeli, kodvwa letibekwe ngalenye indlela. Nakafundzisa, Jesu wakuphindzaphindza tikhatsi letingetulu kwalesisodvwa loko labefundzisa ngako, kodvwa ngetindlela letehlukene. (Mak. 9:34-37; 10:35-45; Joh. 13:2-17) Ngesikhatsi aseNtsabeni Yemincuma, emalangeni lambalwa ngaphambi kwekutsi afe, Jesu waphindzaphindza kuze agcizelele leliphuzu lelibalulekile, watsi: “Hlalani nilindzile ngobe anilati lilanga iNkhosi yenu letawufika ngalo.”​—Mat. 24:42; 25:13.

Emsebentini Wekushumayela. Nangabe ufakaza kubantfu, usuke unelitsemba lekutsi batakukhumbula loko lokushoko. Kuze uwufeze lowo mgomo kufanele uphindzaphindze ngalokuphumelelako.

Esikhatsini lesinyenti, kuphindzaphindza ngesikhatsi nisakhuluma ngendzaba letsite kwenta kutsi umuntfu ayikhumbule. Ngako-ke nawucedza kufundza umbhalo, ungawugcizelela ngekutsi ugcamise incenye yawo lebalulekile futsi ubute nangu umbuto: “Unakile yini kutsi lencenye ibekwe njani?”

Imisho leshiwo ekugcineni nayo ingasetjentiswa ngemphumelelo. Nasi sibonelo: Ungase utsi: “Liphuzu leliyinhloko lengetsemba kutsi utalikhumbula kuloku lesicoce ngako nguleli . . . ” Phindze ulisho ngendlela lemelula. Ungase utsi: “Injongo yaNkulunkulu ikutsi umhlaba ube lipharadisi. Leyo njongo itawugcwaliseka nakanjani.” Mhlawumbe utsi: “LiBhayibheli likukhombisa ngalokucacile kutsi siphila emalangeni ekugcina alelive lelibi. Kuze sikhone kusindza nakufika kuphela, kudzingeka sifundze ngaloko Nkulunkulu lakufunako kitsi.” Nobe utsi: “Njengobe sibonile, liBhayibheli lineteluleko letisebentako tendlela lesingabhekana ngayo netinkinga temndeni.” Ngaletinye tikhatsi ungaphindze usho emavi lacashunwe eBhayibhelini abe liphuzu lokufanele likhunjulwe. Kuliciniso kutsi kwenta loku ngemphumelelo kudzinga kutsi ucabange kusengaphambili.

Nawubuyela kulococe nabo, kuhlanganise netifundvo teliBhayibheli, ungaphindzaphindza ngekusebentisa imibuto yekubuketa.

Nangabe umuntfu akutfola kumatima kucondza nobe kusebentisa seluleko seliBhayibheli, kungadzingeka kutsi ukhulume ngaleyo ndzaba tikhatsi letingetulu kwalesisodvwa. Kufanele uyetfule ngetindlela letehlukehlukene. Akudzingeki nitsatse sikhatsi lesidze nicoca ngalendzaba, kodvwa ekugcineni umfundzi kufanele achubeke acabanga ngayo. Khumbula kutsi naJesu wayisebentisa lendlela yekuphindzaphindza kuze asite bafundzi bakhe bancobe sifiso sekufuna kuba phambili.​—Mat. 18:1-6; 20:20-28; Luk. 22:24-27.

Nawetfula Tinkhulumo. Nawetfula tinkhulumo, umgomo wakho awusiko kwendlulisela kwatiswa nje kuphela. Ufuna kutsi labo labakulalele bakucondze loko lokushoko, bakukhumbule futsi bakusebentise. Kuze ukufeze loko, kudzingeka kutsi uphindzaphindze.

Kodvwa-ke, nangabe uwaphindzaphindza kanyenti emaphuzu layinhloko, labo labakulalele kungenteka bangasakunaki. Wakhetse ngekucophelela emaphuzu lokufanele agcizelelwe. Ngalokuvamile lawa kuba ngemaphuzu layinhloko inkhulumo yakho lesekelwe kuwo, kodvwa kungaphindze kube ngulamanye emaphuzu labalulekile kulabo lokhuluma nabo.

Kuze uphindzaphindze kahle, ungase ucale ngekusho emaphuzu layinhloko esetfulweni. Loko ungakwenta ngekusho emavi lambalwa laveta loko lotawukhuluma ngako, ungasebentisa imibuto nobe usho tibonelo letimbalwa letiveta tinkinga letitawucatululwa. Ungase usho kutsi mangakhi emaphuzu layinhloko bese uwasho ngekulandzelana. Ngemuva kwaloko, coca ngeliphuzu ngalinye njengobe uchubeka nenkhulumo yakho. Ungagcizelela ekhatsi nenkhulumo yakho ngekutsi uphindze uwasho emaphuzu layinhloko ngembikwekutsi wendlulele kulelinye. Lenye indlela yekugcizelela kusebentisa sibonelo lesikhombisa kutsi lelo phuzu leliyinhloko lingasetjentiswa njani. Emaphuzu layinhloko ungawagcizelela nangekutsi esiphetfweni sakho uwaphindze, uwagcamise ngekusebentisa kucatsanisa, uphendvule imibuto loyivetile ekucaleni nobe usho kafishane indlela yekucatulula tinkinga lotivetile.

Ngetulu kwekwenta loku lokungenhla, sikhulumi lesinalokuhlangenwe nako siyabanakisisa bantfu labasilalele. Nangabe kumatima ngalabanye kucondza liphuzu lelitsite, lesikhulumi siyakubona loko. Siphindze silichaze lelo phuzu nangabe libalulekile. Nobe kunjalo, kuphindza emagama lafanako kungenteka kungawufezi umgomo lesinawo. Kufundzisa kudzinga lokungetulu kwaloko. Lesikhulumi kufanele sivumelane netimo. Kungase kudzingeke kutsi sengete tintfo letitsite lebesingakatihleli enkhulumeni yaso. Kufundza kutinaka tidzingo tebantfu labakulalele kutawuba nesandla ekuphumeleleni kwakho ekufundziseni.