I-Video Letsi “Jehovah’s Witnesses—Organized to Share the Good News”
Sekuphele iminyaka lengetulu kwalelikhulu boFakazi BaJehova bashumayela tindzaba letinhle. Ngalomkhankaso wekushumayela lomkhulu kunayo yonkhe leyake yaba khona, sishumayela ngetilwimi letinyenti nasemaveni langetulu kwa-230. (Mat. 24:14) Kungani lomsebenti ubalulekile? Ufezwa njani emhlabeni wonkhe? I-video letsi “Jehovah’s Witnesses—Organized to Share the Good News,” iphendvula lemibuto ngekuchaza imininingwane leminyenti mayelana nemsebenti wetfu lowentiwa emhlabeni wonkhe. Ngemuva kwekubukela le-video, cabangisisa ngalemibuto lelandzelako.
Le-video ikwandzise njani kubonga kwakho (1) ngemetamo inhlangano yaJehova lewentako kute kushunyayelwe tindzaba letinhle? (2 Thim. 4:2) (2) ngemakhaya aseBethel lasemhlabeni wonkhe? (3) ngemfundvo leniketwa titfunywa telivangeli kanye nebabonisi? (2 Thim. 2:2) (4) ngekubaluleka kwekufundza umBhalo welusuku njalo kanye nekulungiselela imihlangano yelibandla maviki onkhe? (Imis. 17:11) (5) ngetinzuzo tekuya njalo emihlanganweni yebuKhristu? (Heb. 10:24, 25) (6) ngetibusiso lotawutitfola lapho liPharadisi selibuyiselwe emhlabeni? (Isa. 11:9) (7) ngelilungelo lonalo lekuhlanganyela kulomsebenti wekuvuna?—Joh. 4:35.
Le-video ilithulusi lelihle kakhulu lekwenta bantfu labanenshisekelo bawati umsebenti lowentiwa boFakazi BaJehova emhlabeni wonkhe. (8) Kunini lapho kukahle khona kubukelisa tifundvo tetfu teliBhayibheli, tihlobo tetfu kanye nalabanye le-video? (9) Bantfu bative njani nawubabukelisa le-video?
Njengobe sizindla ngaloko Jehova lakufezako, sikhutsateka kutsi sivumelane nemavi emhlabeli latsi: “Yebo, Simakadze, Nkulunkulu wami, timangaliso losentele tona tinyenti, tingeke tibalwe, wasikhumbula tikhatsi letinyenti. Kute nome munye nje lofana nawe!” (Hla. 40:5) Shengatsi singayisebentisa kahle le-video kute sisite labanye bambonge Jehova kanye nenhlangano yakhe!