Imbewu Kufanele Iniselwe Kute Ikhule
1. Yini lekufanele siyinisele kute ikhule?
1 Nawuhlanyele imbewu, kufanele uyinisele kute ikhule. Kungulokufananako nangembewu yeliciniso lesiyihlanyela etinhlitiyweni tebantfu labasensimini yetfu. (1 Khor. 3:6) Nangabe sifuna kutsi lembewu imile, ikhule, futsi itsele, kufanele sibuyele kulabo bantfu kute siyinisele sisebentisa liVi laNkulunkulu.
2. Nasicoca nemuntfu kwekucala, singamchazela njani ngaloko lesitawubuye sicoce ngako?
2 Buta Umbuto: Nawulungiselela inshumayelo yakho, kungani ungalungiseleli umbuto lotawuvusa lilukuluku kumuntfu futsi lotawuphendvula esikhatsini lesitako? Lombuto kufanele uwubute ngemuva kwekucoca kwenu kwekucala, futsi kufanele uhlele kubuyela. Labanyenti bakutfola kulusito kubuta umbuto losencwadzini letsi Lokufundziswa LiBhayibheli. Loku kuyabasita ekutseni bakhone nekukhombisa umuntfu indlela sifundvo seliBhayibheli lesichutjwa ngayo.
3. Nawubhala imininingwane yemuntfu lonenshisekelo, yini longase uyifake?
3 Gcina Imininingwane: Ngekushesha ngemuva kwekucoca nemuntfu kwekucala, bhala phansi imininingwane. Bhala libito lakhe kanye nendzawo lahlala kuyo. Kuhle nekubhala lusuku kanye nesikhatsi lenicoce ngaso, loko lenicoce ngako, kanye naloko lomhambisele kona nangabe kukhona. Usenkholweni letsite yini? Unawo yini umndeni? Ukushito yini loko lakutsandzako kanye naloko lokumkhatsatako? Imininingwane lenjalo itawukusita kutsi ulungiselele loko lenitawucoca ngako esikhatsini lesitako. Bhala nekutsi wetsembise kutsi utawubuyela nini kanye nembuto lotawube uyowuphendvula.
4. Nakutiwa endzabeni yekulandzelela inshisekelo, kungani kufanele ungapheli emandla?
4 Ungapheli Emandla: Sathane angeke atibeke phansi, utawuchubeka etama ‘kutsatsa livi’ lelihlanyelwe etinhlitiyweni tebantfu. (Mak. 4:14, 15) Ngako-ke ungapheli emandla nangabe kumatima kutfola bantfu lococe nabo emakhaya abo. Longakwenta kutsi ubabhalele incwadzi nobe lipheshana bese ulishiya emnyango. Lelinye lihlahlandlela lacalisa sifundvo nalomunye make lisemnyango, kodvwa nalibuyela kuye alimkhandzanga. Ngako-ke lambhalela incwadzi. Lapho limtfola ekhaya, lomake watsi kumtsintse kakhulu kubona kutsi lelihlahlandlela liyamkhatsalela. Njengobe sinisela imbewu yeliciniso, singatfola injabulo ngekubona leyo mbewu imila, ikhula, futsi itsela ‘ngemashumi lamatsatfu, nome lasitfupha nome ngelikhulu.’—Mak. 4:20.