Kutfutfukisa Emakhono Etfu Emsebentini Wekushumayela—Kukhombisa Kutsi Uyabanaka Labanye

Kubaluleke Ngani?: Jesu abenaka umuntfu ngamunye, futsi akhombisa kutsi uyabatsandza bantfu. Nasi sibonelo: Ngalelinye lilanga Jesu wabona indvodza lebeyingeva etindlebeni futsi kungenteka wabona nekutsi yetfukile, ngako wayitsatsa wayisusa esicumbini sebantfu, wase uyayelapha. (Mak. 7:31-35) Wakhombisa kutsi uyabacabangela bafundzi bakhe ngekutsi angabafundzisi tintfo letinyenti ngasikhatsi sinye ngobe bebangeke bakhone kutibamba. (Joh. 16:12) Ngisho nobe asezulwini, Jesu ukhombisa kutsi uyabanaka bantfu. (2 Thim. 4:17) Njengobe sibalandzeli baKhristu, sifuna kumlingisa. (1 Phet. 2:21; 1 Joh. 3:16, 18) Ngetulu kwaloko, sitawuphumelela kakhulu emsebentini wetfu wekushumayela nangabe sikhombisa kubacabangela labo lesicoca nabo, sitinaka timo tabo, tintfo labatitsandzako, kanye netintfo letibakhatsatako. Umuntfu utawulalela nangabe abona kutsi umgomo wetfu awusiko nje kuphela kumtjela loko lesishumayela ngako nobe kumshiyela incwadzi, kodvwa nekutsi naye siyamnaka.

Indlela Yekukwenta:

Lungiselela kahle. Khululeka, mamatseka, futsi ube nebungani.
Naka. Kukhona yini lokubonako lokukhombisa kutsi lomuntfu unebantfwana, kutsi utsandza ingadze nobe kutsi unetilwane tasekhaya, kanye nalokukhombisa kutsi unetinkholelo letitsite? Mhlawumbe ungayishintja inshumayelo yakho kuze ihambelane netimo takhe.
Mcele kutsi avete umbono wakhe, futsi umlalelisise, ungamphazamisi nangabe kute sidzingo. Mbuke kuze ukhombise kutsi umlalele. Mbonge ngekuveta imibono yakhe, futsi umncome ngalokusuka enhlitiyweni. Ungaphikisani naye.
Vumelana netimo. Nangabe kudzingeka, shintja inshumayelo yakho kuze ukhulume ngetintfo letimkhatsatako. Loku kungaba melula kukwenta, ngobe emapheshana etfu, tincwajana, kanye nabomagazini bakhuluma ngetindzaba letinyenti letehlukehlukene. Nangabe ufike ngesikhatsi lesikabi, mhlawumbe umtfola umatasatasa, khombisa kutsi uyakunaka loko futsi ufishanise inshumayelo yakho.

Yetama Loku Kulenyanga:

Banini nencenye yekuphrakthiza ekukhonteni kwemndeni nobe nawusemsebentini wekushumayela lapho ummemeteli kufanele ashintje inshumayelo yakhe kuze acoce ngaloko umnikati welikhaya lakushoko.
Emhlanganweni wangaphambi kwekuya ensimini, umzalwane lochubako angase acoce ngetindlela tekukhombisa kutsi uyabanaka labanye bantfu nobe ente umboniso waloko.