Utayilingisa Yini Inshisekelo YaJehova NeyaJesu Kulesikhatsi SeSikhumbuto?
1. Yini BoFakazi BaJehova labatimisela kuyenta ngesikhatsi seSikhumbuto?
1 Jehova uyifeza ngenshisekelo injongo yakhe. Nawukhuluma ngaletinye tibusiso teMbuso waNkulunkulu, umbhalo wa-Isaya 9:7 utsi: “Inshisekelo yaSimakadze longuSomandla iyawukwenta loko.” Ngendlela lefanako, ngesikhatsi iNdvodzana yaNkulunkulu iselapha emhlabeni, yakhombisa inshisekelo lenkhulu ngekukhonta kweliciniso. (Joh. 2:13-17; 4:34) Minyaka yonkhe ngesikhatsi seSikhumbuto, tigidzi tebamemeteli emhlabeni wonkhe tiyatimisela kulingisa inshisekelo yaJehova neyaJesu ngekutsi tandzise umsebenti wato wekushumayela. Utawuba ngulomunye wato yini nawe?
2. Inshisekelo itasikhutsata kutsi senteni kusukela ngaMarch 7?
2 Umkhankhaso WeSikhumbuto: Kulomnyaka lomkhankhaso wekumemela bantfu eSikhumbutweni utawucala ngeMgcibelo waMarch 7. Hlela nyalo kutsi nawe uhlanganyele ngenshisekelo kulomsebenti. Kutawuba nenjabulo lenkhulu emabandleni njengobe atawube atimisela kutsi ahlanganise incenye lenkhulu yensimi yawo. Timisele kutsi umeme bantfu lofundza nabo liBhayibheli, bantfu lobuyela kubo, losebenta nabo, tihlobo takho, kanye nalofundza nabo esikolweni, ungabaniketa simemo nobe usebentise i-jw.org.
3. Singawandzisa njani umsebenti wetfu wekushumayela ngaMarch nanga-April?
3 Kuba Ngemahlahlandlela Lasitako: Inshisekelo itawuphindze isikhutsate kutsi sandzise umsebenti wetfu wekushumayela. Asingabati kutsi labanyenti batawukhona kuba ngemahlahlandlela lasitako ngaMarch nanga-April ngobe sitawukhona kukhetsa kusebenta ema-awa langu-30. Ekukhonteni kwemndeni lokulandzelako nobe esifundvweni lotichubela sona, cabanga ngalendzaba futsi uthantaze ngayo kuze ubone kutsi ungakwenta kanjani loko. (Taga 15:22) Kutimisela kwakho kulomkhankhaso kungabakhutsata labanye kutsi nabo babe nenshisekelo kulomsebenti. Nawushintja timo takho kuze wandzise umsebenti wakho, utawube ulingisa inshisekelo leyakhonjiswa nguJesu.—Mak. 6:31-34.
4. Ngutiphi tinzuzo letitfolakala ngekulingisa inshisekelo yaJehova neyaJesu?
4 Kulingisa inshisekelo yaJehova neyaJesu kungasiletsela tinzuzo letinyenti kulesikhatsi seSikhumbuto. Sitawukhona kufakaza kubantfu labanyenti ensimini. Sitawutfola injabulo nekwenetiseka lokutfolakala ngekukhonta Jehova kanye nangekupha labanye. (Imis. 20:35) Ngetulu kwako konkhe, sitawujabulisa Nkulunkulu wetfu lonenshisekelo kanye neNdvodzana yakhe.