Labo ‘Labatimisele’ Batanilalela

1. Yini bantfu labangahle bayente nabeva tindzaba letimnandzi? (Imisebenti 13:47, 48; 16:14, 15)

BANTFU labanyenti ngesikhatsi semaKhristu ekucala bemukela liciniso ngekushesha nje nabeva umlayeto weMbuso. (Fundza Imisebenti 13:47, 48; 16:14, 15.) Ngendlela lefanako lamuhla, labanye bayajabula nabeva tindzaba letimnandzi kwekucala. Ngisho nalabo labacale bangabi nendzaba nemlayeto weMbuso bangahle bashintje ngekuhamba kwesikhatsi, bawemukele. Yini lokufanele siyente nasitfola bantfu ‘labatimisele kutfola kuphila lokuphakadze’ nasishumayela?

2. Umsebenti wetfu wekwenta bafundzi ufana njani nemsebenti wemlimi?

² Cabanga nganangu umfanekiso. Umsebenti wetfu wekwenta bafundzi singawufananisa nemsebenti wemlimi. Nangabe lokunye kwaloko lakuhlanyele sekuvutsiwe, lomlimi kungenteka akuvune ngisho nobe asalima nobe asahlanyela kulensimu yakhe. Ngendlela lefanako, nasitfola umuntfu lokulungele kwemukela umlayeto weMbuso, sifuna kumsita kutsi abe ngumfundzi waKhristu ngekuphutfuma lokukhulu. Kodvwa kulabo labasengakakulungeli kuwemukela, siyachubeka setama kubasita babone kutsi kubaluleke ngani kufundza ngaNkulunkulu nangeliBhayibheli. (Joh. 4:35, 36) Kucondza kutasisita kutsi sikhetse indlela lekahle yekucoca nabo. Nyalo asesicoce ngekutsi yini lesingayenta nasicoca nebantfu kwekucala kuze sisite labo labalungele kusilalela. Sitawubese sicoca ngekutsi singabasita njani kutsi bachubeke batfutfuka.

NANGABE BANTFU BASILALELA

3. Yini lokufanele siyente nasitfola bantfu labasilalelako nasishumayela? (1 KubaseKhorinte 9:26)

³ Nangabe sitfola bantfu labasilalelako nasishumayela, sifuna kubasita kutsi basheshe bacale kuhamba ngendlela leya ekuphileni. Etimeni letinjalo, sifuna kucela kudadisha nabo liBhayibheli futsi sibamemele emihlanganweni yetfu nasicala nje kucoca nabo.​—Fundza 1 KubaseKhorinte 9:26.

4. Shano lokwenteka kulomunye lebekakulungele kudadisha liBhayibheli ngekushesha.

⁴ Cela kudadisha nabo liBhayibheli. Labanye lesicoca nabo basuke bakulungele kucala kudadisha liBhayibheli ngekushesha. Sibonelo nje, ngalelinye lilanga kunguLesine, lomunye sisi waseCanada waya encoleni yetfu futsi watsatsa incwajana letsi Jabulela Kuphila Kuze Kube Phakadze! Lodzadze lebekasencoleni wamchazela kutsi njengobe besekanalencwajana, bekangaphindze atfole sifundvo seliBhayibheli samahhala. Losisi wakutsandza loko futsi wanika lodzadze inombolo yakhe. Ntsambama ngalelo langa, losisi watfumelela lodzadze umlayeto mayelana nalesifundvo. Ngesikhatsi lodzadze acela kumvakashela ngemphelasontfo, losisi watsi: “Kungaba njani ute kusasa? Ngitawube ngikhona.” Ngaloyo Lesihlanu, bacala kudadisha liBhayibheli. Losisi waya kwekucala emihlanganweni ngayo leyo mphelasontfo, futsi wachubeka atfutfuka kahle kakhulu.

5. Singakukhombisa njani kucondza nasicela kudadisha liBhayibheli nalotsite? (Buka netitfombe.)

⁵ Kuliciniso kutsi akusibo bonkhe labalalela umlayeto wetfu labatawufuna kucala kudadisha liBhayibheli ngekushesha njengalosisi. Kungenteka labanye batawudzinga sikhatsi. Kungenteka kutawudzingeka sicale sicoce nabo ngesihloko labasitsandzako. Nobe kunjalo, nasichubeka sinembono lokahle futsi sichubeka sikhombisa kutsi sinendzaba nabo, mhlawumbe ngekushesha nje bangacala kudadisha liBhayibheli. Yini lesingayisho nasicela kudadisha nabo liBhayibheli? Lombuto wabutwa labanye bazalwane nabodzadze labaphumelelako ekucaliseni tifundvo teliBhayibheli.

6. Yini lesingayisho kuze sichubeke sicoca nemuntfu lofuna kulalela?

⁶ Labamemeteli nemahlahlandlela lababutwa mayelana nekucalisa tifundvo teliBhayibheli bachaza kutsi kuletinye tindzawo kuyasita kungasebentisi emagama latsi “kudadisha,” “sifundvo seliBhayibheli” nobe “kukufundzisa,” nawuchaza lesifundvo. Baveta kutsi kuyaphumelela kusebentisa emagama lanjengalatsi “kucoca,” nobe “kwati liBhayibheli.” Ungangenisa indzaba yekuchubeka nicoca ngekutsi utsi: “Kuyamangalisa kutsi liBhayibheli liyayiphendvula imibuto lebaluleke kakhulu ekuphileni,” nobe utsi: “LiBhayibheli alisiyo nje incwadzi yenkholo; lisisita ngetindlela letehlukahlukene.” Ungengeta utsi: “Akutsatsi sikhatsi lesidze; imizuzu lengu-10 kuya kulengu-15 yenele kuze ufundze lokutsite lokubalulekile.” Loko ungakusho ngaphandle kwekusebentisa emagama latsi “kubeka sikhatsi” nobe “njalo ngeliviki,” lokungamenta acabange kutsi sewuyatibopha.

7. Labanye balibone nini kwekucala liciniso leliseBhayibhelini? (1 KubaseKhorinte 14:23-25)

⁷ Bameme emhlanganweni welibandla. Kubonakala ngatsi ngesikhatsi semphostoli Pawula, labanye balibona kwekucala liciniso leliseBhayibhelini ngesikhatsi baya emihlanganweni yebuKhristu. (Fundza 1 KubaseKhorinte 14:23-25.) Kuvame kwenteka lokufanako nalamuhla. Labanyenti batfutfuka ngekushesha nasebacale kuya emihlanganweni yelibandla. Kufanele ubameme nini? Incwadzi letsi Jabulela Kuphila Kuze Kube Phakadze! inesimemo kusifundvo 10, kodvwa akukafaneli ulindze uze ufike kulesifundvo kungukhatsi ummema. Nawucala nje kucoca naye, ungammema emihlanganweni yangemphelasontfo, mhlawumbe umtjele sihloko senkhulumo yelinyenti nobe liphuzu lokutawube kucocwa ngalo eSifundvweni se-Sicongosekulindza.

8. Yini lesingayitjela umuntfu nasimmemela emihlanganweni yetfu? (Isaya 54:13)

⁸ Nawumema umuntfu lolitsandzako liciniso, mchazele kutsi imihlangano yetfu yehluke njani etinkonzweni telisontfo lokungenteka utijwayele. Ngesikhatsi lomunye sisi lokudadishwa naye liBhayibheli aba khona kwekucala eSifundvweni se-Sicongosekulindza, wabuta lona lomfundzelako watsi: “Lolochubako uwati onkhe yini emagama alabantfu?” Lodzadze wamchazela kutsi sonkhe siyetama kwati emagama alabo labasebandleni, njengobe nje sati emagama emalunga emindeni yetfu. Losisi wabona kutsi loku bekwehlukile kuloko lokwenteka esontfweni lakhe. Singaphindze simchazele lomuntfu lenye indlela imihlangano yetfu leyehluke ngayo. (Fundza Isaya 54:13.) Siyahlangana kuze sikhonte Jehova, sifundze ngaye futsi sikhutsatane. (Heb. 2:12; 10:24, 25) Ngenca yaloko, imihlangano yetfu ihlelekile futsi iyazuzisa, akwentiwa emasiko latsite. (1 Khor. 14:40) Ngetulu kwaloko, tindzawo tetfu tekuhlangana tenta kube melula kutsi sifundze. Kute licembu lepolitiki lesilisekelako ngenca yekutsi asitingeneli tindzaba tepolitiki; futsi asiyingeneli imibhikisho nobe timphikiswano. Kungasita nekukhombisa umfundzi i-video letsi Yini Leyentekako EHholweni LeMbuso? ngaphambi kwekutsi aye emihlanganweni yetfu. Loko kungamsita ati kutsi yini langayilindzela.

9-10. Nangabe simema lotsite emihlanganweni, yini lesingayenta kuze simcinisekise kutsi angeke simcindzetele kutsi abe nguFakazi waJehova nobe aphendvule? (Buka nesitfombe.)

⁹ Labanye bayangabata kuta emihlanganweni yetfu ngobe besaba kutsi batawucelwa kutsi babe BoFakazi BaJehova. Cinisekisa lomuntfu kutsi siyatsandza kuba netivakashi, nekutsi asiticindzeteli kutsi tibe yincenye yetfu nobe tiphendvule. Imindeni yemukelekile, lokufaka ekhatsi leyo lenebantfwana labancane. Emihlanganweni yetfu, bantfwana abafundziswa bodvwa. Kunaloko, batali nebantfwana bahlala ndzawonye futsi bafundziswe kanye kanye. Ngaleyondlela, batali bayati kutsi bantfwana babo banabobani nekutsi yini labafundziswa yona. (Dut. 31:12) Asihambisi lipuleti lemnikelo nobe sicele bantfu kutsi bafake imali etimvilophini. Kunaloko, silalela umyalo waJesu lotsi: “Niphiwe mahhala, nani phanini mahhala.” (Mat. 10:8) Ungaphindze umtjele lomuntfu kutsi akukalindzeleki kutsi agcoke timphahla letidulile. Nkulunkulu ubuka inhlitiyo, hhayi indlela umuntfu labukeka ngayo.​—1 Sam. 16:7.

¹⁰ Nangabe lomuntfu eta emihlanganweni, yenta konkhe longakwenta kuze umente ative emukelekile. Metfule kulabadzala belibandla nakulabanye bamemeteli. Nangabe ativa asekhaya, manyenti ematfuba ekutsi aphindze abuye. Nakusachubeka imihlangano, mbukise eBhayibhelini lakho nangabe ete, futsi umkhombise kutsi sihambisana njani nesikhulumi naloko lokufundvwako.

NASENICALILE KUDADISHA LIBHAYIBHELI

11. Ungakhombisa njani kutsi uyasihlonipha sikhatsi kanye neluhlelo lwemnikati welikhaya?

¹¹ Yini lokufanele siyikhumbule nasesicalile kudadisha liBhayibheli nalotsite? Hlonipha sikhatsi neluhlelo lwemnikati welikhaya. Sibonelo nje, nangabe nibeke sikhatsi lesitsite, sigcine, ngisho nobe bantfu basendzaweni yangakini banamuphi umbono ngekugcina sikhatsi. Ngetulu kwaloko, ungakutfola kulusito kungadvonsi sikhatsi lesidze esifundvweni sekucala. Labanye bamemeteli lesebanesikhatsi batsi kukahle kusheshe ucedze ngisho nobe lomuntfu asafuna kuva lokunyenti. Ngetulu kwaloko, ungakhulumi kakhulu. Vumela umnikati welikhaya akhulume.​—Taga 10:19.

12. Kufanele ube yini umgomo wetfu nasicalisa sifundvo seliBhayibheli?

¹² Kusukela nje ekucaleni, umgomo wakho kufanele kube kusita umfundzi ati Jehova naJesu futsi acale kubatsandza. Loko ungakwenta ngekutsi umente anake liVi laNkulunkulu kunekutsi anake wena nelwati lonalo ngeliBhayibheli. (Imis. 10:25, 26) Umphostoli Pawula nakafundzisa bekavame kukhuluma ngaJesu Khristu, lokunguye Jehova lamtfuma kuze asisite simati futsi simtsandze. (1 Khor. 2:1, 2) Pawula waphindze waveta kutsi kubaluleke ngani kusita bafundzi labasebasha kutsi babe nebuntfu lobuhle, lobungafananiswa neligolide, lisiliva nematje laligugu. (1 Khor. 3:11-15) Lobuntfu lobuhle bufaka ekhatsi kukholwa, kuhlakanipha, kucondza nekwesaba Jehova. (Hla. 19:9, 10; Taga 3:13-15; 1 Phet. 1:7) Lingisa indlela Pawula bekafundzisa ngayo ngekutsi usite umfundzi akhe kukholwa lokucinile futsi atakhele buhlobo naBabe wakhe wasezulwini lomtsandzako.​—2 Khor. 1:24.

13. Singakhombisa njani kutsi sinesineke nekucondza nasisasita umfundzi? (2 KubaseKhorinte 10:4, 5) (Buka nesitfombe.)

¹³ Lingisa indlela Jesu bekafundzisa ngayo ngekutsi ube nesineke futsi ube nekucondza. Kugweme kubuta umfundzi imibuto lementa angakhululeki. Nangabe kunesidzingo, ungahlali kakhulu ephuzwini lokumatima kutsi umfundzi alicondze, futsi ubuyele kulo ngekuhamba kwesikhatsi. Kunekutsi wetame kumphocelela kutsi emukele imfundziso letsite, asengakakulungeli kukwenta loko, mnikete sikhatsi sekutsi liciniso lakhele enhlitiyweni yakhe. (Joh. 16:12; Khol. 2:6, 7) LiBhayibheli lifananisa timfundziso temanga nekwetama kubhidlita umbhoshongo. (Fundza 2 KubaseKhorinte 10:4, 5.) Kunekutsi ugcobe lomfundzi ngalombhoshongo wakhe, msite kutsi ente Jehova Siphephelo sakhe.​—Hla. 91:9.

NABACALA KUTA EMIHLANGANWENI

14. Kufanele sibaphatse njani labo labacala kuta emihlanganweni yetfu?

¹⁴ Jehova ulindzele kutsi singababandlululi labo labacala kuta emihlanganweni yetfu, ngisho nobe banamaphi emasiko, sigaba nobe bakhulele kuphi. (Jak. 2:1-4, 9) Ngako singakhombisa njani kutsi siyabatsandza labo labavakashe emihlanganweni yetfu?

15-16. Yini lesingayenta kuze sisite labasivakashele bative bemukelekile emihlanganweni yetfu?

¹⁵ Labanye kungenteka bete emihlanganweni yetfu ngenca yekutsi bafuna kubona kutsi kwentekani nobe ngenca yekutsi bakhutsatwe ngulotsite lohlala kulenye indzawo. Ngako singesabi kuya kubo. Bemukele, kodvwa ngesikhatsi lesifanako ungabenti bative bangasakhululeki. Cela loyo lovakashile kutsi ahlale nawe. Mbukise liBhayibheli lakho nobe loko lokufundvwako nobe umnikete ikhophi yakhe. Ngetulu kwaloko, cabanga ngendlela lativa ngayo. Lenye indvodza lebeyivakashe eHholweni leMbuso yatjela umzalwane lowayemukela kutsi beyesaba ngobe beyingakagcoki njengalabanye. Lomzalwane wayenta yativa ikhululekile futsi wayichazela kutsi BoFakazi BaJehova babantfu labavamile. Lendvodza leyagcine ibhajatisiwe ayizange iyikhohlwe imphendvulo yalomzalwane. Kodvwa naku lesicela ukunake: Nawukhuluma nemuntfu lovakashile ngaphambi kwemihlangano nobe ngemuva kwayo, bani nendzaba naye kodvwa ungambuti tindzaba takhe.​—1 Phet. 4:15.

¹⁶ Singaphindze sente labo labasivakashele bative bemukelekile ngekutsi sikhombise inhlonipho nasisho lokutsite ngebantfu labangasibo boFakazi nobe ngetinkholelo tabo, kungaba ngulapho sicoca nabo, nasiphendvula nalapho sinenkhulumo. Kugweme kusho tintfo letingabakhuba nobe letingabonakala ngatsi tiyabetfuka. (Thit. 2:8; 3:2) Sibonelo nje, kufanele singakhulumi ngendlela leyedzelela tinkholelo tabo. (2 Khor. 6:3) Bazalwane lababeka tinkhulumo telinyenti kufanele bakunake kakhulu loku. Ngetulu kwaloko, kufanele bahlale bacabanga ngalabo labavakashile labangasibo boFakazi ngekutsi bachaze emagama lokungaba lukhuni kutsi bawacondze.

17. Uyini umgomo wetfu nasitfola labo ‘labatimisele kutfola kuphila lokuphakadze’ nasishumayela?

¹⁷ Umsebenti wetfu wekwenta bafundzi uya ngekuphutfuma kakhulu njalo ngelilanga futsi siyachubeka sitfola bantfu ‘labatimisele kutfola kuphila lokuphakadze.’ (Imis. 13:48) Nasibatfola, kufanele singangabati kucela kudadisha nabo liBhayibheli nobe kubamemela emihlanganweni yetfu. Nasenta njalo, sitawube sibasita kutsi batsatse sinyatselo sekucala lesiya ‘endleleni leya ekuphileni.’​—Mat. 7:14.